4 ოპოზიციური პარტია ბორელსა და ევროკავშირის ქვეყნების საგარეო მინისტრებს წერილით მიმართავს
ოპოზიციური პარტიების მიმართვა
4 პროდასავლური ოპოზიციური პარტია, რომლებმა 5%-იანი ბარიერი გადალახეს, 26 ოქტომბრის საპარლამენტო არჩევნების გაყალბების საკითხზე საგარეო პოლიტიკისა და უსაფრთხოების საკითხებში ევროკავშირის უმაღლეს წარმომადგენელს, ჯოზეფ ბორელსა და ევროკავშირის წევრი სახელმწიფოების საგარეო საქმეთა მინისტრებს ერთობლივი წერილით მიმართავს და აცხადებს, რომ საპარლამენტო არჩევნებში ოთხმა ოპოზიციურმა ძალამ, ჯამში, ხმების 52% მიიღო, თუმცა “ქართულმა ოცნებამ” შედეგები გააყალბა.
გაყალბების მტკიცებულებად, ოპოზიციის წერილში მაგალითად მოყვანილია დამოუკიდებელი კვლევითი ორგანიზაციების, როგორიცაა Edison Research და HarrisX-ის მიერ ჩატარებული ეგზიტპოლების შედეგები, ამავდროულად, არასამთავრობო ორგანიზაციების ანგარიშები საარჩევნო დარღვევებთან დაკავშირებით.
ოპოზიციური პარტიები მოუწოდებენ ევროკავშირს, არ აღიაროს საქართველოში ჩატარებული არჩევნები და საქართველოს ხელისუფლებაზე ზეწოლის მოსახდენად შემდეგი ნაბიჯები გადადგას:
- ჩაატაროს გამოძიება 26 ოქტომბრის არჩევნების გაყალბებასა და არჩევნებში როგორც შიდა, ასევე გარე ჩარევასთან დაკავშირებით.
- მოუწოდოს საქართველოს ხელისუფლებას, არ მოიწვიოს პარლამენტი მანამ, სანამ გამოძიება და შეფასება არ დასრულდება.
- დეკლარირება მოახდინოს, რომ საქართველოს ევროკავშირში გაწევრიანების პროცესი შეჩერებულია საქართველოს ხელისუფლების მიერ ჩატარებული არჩევნების გამო.
- შეაჩეროს ნებისმიერი ტიპის კომუნიკაცია საქართველოს ხელისუფლებასთან.
- შეაჩეროს ხელისუფლების დაფინანსება (დაახლოებით 120 მილიონი ევრო), სანამ არჩევნების გამოძიების შედეგები ცნობილი არ იქნება და სანაცვლოდ ევროკავშირმა აღნიშნული დაფინანსება გამოუყოს არასამთავრობო სექტორსა და თავისუფალ მედიას.
წერილში ოპოზიციური პარტიები ხაზგასმით აღნიშნავენ, რომ მათი მოთხოვნა 2025 წელს ხელახალი არჩევნების ჩატარებაა გაუმჯობესებული საარჩევნო გარემოთი, პოლიტიკურად ბალანსირებული საარჩევნო ადმინისტრაციითა და პოლიტიკურად ნეიტრალური სახელმწიფო ინსტიტუტებით.
დღეს, ევროკავშირის საგარეო საქმეთა საბჭო საქართველოს საკითხზე იმსჯელებს
დღეს, ევროკავშირის საგარეო საქმეთა საბჭო 2024 წლის 26 ოქტომბერს გამართული საპარლამენტო არჩევნების ფონზე საქართველოში არსებულ ვითარებაზე იმსჯელებს. საქართველო უკრაინის შემდეგ დღის წესრიგში მეორე საკითხი იქნება.
როგორც ცნობილია, განიხილება დოკუმენტი, რომელიც საქართველოს მიმართ განსახორციელებელ ნაბიჯებს მოიცავს. მათ შორის, დაფინანსების შეწყვეტა და მაღალი დონის შეხვედრების შეჩერება. საბჭოს დღის წესრიგის თანახმად, ევროკავშირის საგარეო საქმეთა მინისტრები უკრაინის წინააღმდეგ რუსეთის აგრესიაზე იმსჯელებენ.
ამასთან, მინისტრები ევროკავშირისა და აშშ-ის ურთიერთობებს და ახლო აღმოსავლეთში არსებულ მდგომარეობასაც განიხილავენ.
შეხვედრის დაწყებამდე კომენტარი გააკეთა საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა ჯოსეფ ბორელმა. მისი თქმით, არ შეიძლება რომ თქვა, რომ არჩევნები არ იყო სამართლიანი და ის არ გამოიძიო.
“რა თქმა უნდა, [არჩევნები] უნდა იყოს გამოძიებული. რაც მოხდა, ის უნდა იქნას შეფასებული. არ შეიძლება რომ თქვა, რომ არჩევნები არ იყო სამართლიანი და ის არ გამოიძიო. ჩვენ მოვუწოდებთ [საქართველოს] მთავრობას, რომ ნათელი მოფინოს იმ ყველაფერს, რასაც ხალხი ითხოვს. [მთავრობა] უნდა იყოს ანგარიშვალდებული.” – თქვა ჯოზეფ ბორელმა.
კომენტარი
პრემიერმინისტრ ირაკლი კობახიძის თქმით, ოთხი ოპოზიციური პარტიის ევროკავშირში გაგზავნილი წერილი “საუკუნის თავზე” სერგო ორჯონიკიძის “ცნობილი გზავნილია”, რომელიც მან მოსკოვს გაუგზავნა.
“თქვენ გახსოვთ საუკუნის წინ ცნობილი გზავნილი, რომელიც სერგო ორჯონიკიძემ გაუგზავნა მოსკოვს, ეს არის სერგო ორჯონიკიძის გზავნილი საუკუნის თავზე, ოღონდ არა მოსკოვს, არამედ ამ შემთხვევაში ბრიუსელს” – თქვა კობახიძემ მთავრობის სხდომაზე.
ისინი ყოველდღიურად ავლენენ სახეს, რაც არის ძალიან კარგი, ამას ხედავს საზოგადოება. ვფიქრობ, რომ ის 785000 ადამიანიც, რომელმაც მხარი დაუჭირა ამ რადიკალურ ძალებს, თანდათანობით გადააფასებს საკუთარ არჩევანს და, საბოლოო ჯამში, ისინი დაუბრუნდებიან იმ პოზიციას, რომელიც დაკავშირებულია ქვეყნის სწორი მიმართულებით განვითარებასთან.
მინდა, განსაკუთრებული მადლობა გადავუხადო შინაგან საქმეთა სამინისტროს, სახელმწიფო უსაფრთხოების სამსახურს, სხვა სამართალდამცავ უწყებებს იმისათვის, რომ მათ სათანადოდ მართეს ეს პროცესები დღემდე და რა თქმა უნდა, ასე გაგრძელდება პროცესების მართვა მომდევნო დღეების განმავლობაშიც.
საზოგადოება შეწუხებულია იმ აქტივობების გამო, რომელსაც ახორციელებს რადიკალური ოპოზიცია, თუმცა, რა თქმა უნდა, მნიშვნელოვანია ყველაფრის ჯეროვნად მართვა და კიდევ ერთხელ მადლობა შსს-ს, რომელიც სათანადოდ წარმართავს ამ პროცესებს და, რა თქმა უნდა, მომავალშიც ყველაფერი გაკეთდება, რომ უზრუნველყოფილი იყოს ჩვენი მოქალაქეების უსაფრთხოება, სტაბილურობა ქვეყანაში და ჩვენი ქვეყნის მშვიდობიანი განვითარება.” – თქვა კობახიძემ.
