ოპოზიციური მედია აფხაზეთში ლგბტ პროპაგანდაში დაადანაშაულეს, რადგან ქალებს 8 მარტი არ მიულოცეს
ოპოზიციური მედია აფხაზეთში
აფხაზეთში პროსახელისუფლებო ტელეგრამ-არხებმა ოპოზიციური მედია და დამოუკიდებელი საინფორმაციო პლატფორმები ლგბტ-იდეოლოგიის გავრცელებაში დაადანაშაულეს. მიზეზად დასახელდა ის, რომ მათ 8 მარტს აფხაზი ქალებისთვის მილოცვა არ გაუვრცელებიათ.
“მათ დასავლურ დონორებთან მოქმედი კონტრაქტები აქვთ, სადაც მკაცრადაა გაწერილი ლგბტ-პოლიტიკის დაცვა, მათ შორის, გენდერულად ნეიტრალური დღის წესრიგის მიყოლა, რომლის მიხედვითაც კატეგორიულად იკრძალება ქალის ტრადიციული გაგებით აღნიშვნა“, – წერს არხი AMRA-life.
ამავე არხის ანონიმური ავტორების თქმით, ოპოზიცია “შეფარულად ავრცელებს ლგბტ-იდეოლოგიას და ეწევა დესტრუქციულ საქმიანობას“.
“თავისუფლების, არჩევანისა და ადამიანის უფლებების ლამაზი სიტყვების მიღმა ნათლად ჩანს ტრადიციული ღირებულებების, ბუნებრივი გენდერული ურთიერთობების წინააღმდეგ მიმართული ინფორმაციული შეტევა, რომელიც დიდ სოციალურ ჯგუფებს ერთმანეთთან აპირისპირებს და ახალგაზრდობის ცნობიერებასა და ფსიქიკას არღვევს“, – ამატებს AMRA-life.
აღსანიშნავია, რომ ერთმა ოპოზიციურმა არხმა – “რესპუბლიკამ“ – მაინც მიულოცა ქალებს 8 მარტი. პროსახელისუფლებო წყაროების მტკიცებით, ეს იმის გამო მოხდა, რომ არხს აფინანსებს ოპოზიციის ლიდერი ადგურ არძინბა და მის კონტრაქტში გენდერული ნეიტრალობის მოთხოვნა არ არსებობს.
“ლგბტ-აგიტატორების“ სიაში მოხვდა ჟურნალისტ ელეონორა გილოიანის პირადი ტელეგრამ-არხიც, რომელმაც, 8 მარტს მილოცვის პოსტი გამოაქვეყნა.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
