ყარაბაღი, ბრძოლა გრძელდება: 21 ოქტომბერი

აზერბაიჯანის პრეზიდენტმა ილჰამ ალიევმა ტვიტერის საკუთარ გვერდზე დაწერა, რომ აზერბაიჯანის არმიამ კონტროლი დაამყარა სამი რაიონის 22 დასახლებულ პუნქტზე.

ალიევის განცხადებით, ესენია:

ზანგილანის რაიონი: მინჯივანი, ხურამა, ხუმარლი, სარილი, ბაბაილი, უიუნჯიუ აღალი, ხაჯალი, გირახ მიუშლანი, უდგიუნი, ტურაბადი, იჩერი მიუშლანი, მელიქლი, ჯახანგირბეილი, ბახარლი.

ფუზულის რაიონი: გიოჯიგიოზლიო, აშაღი სეიდაჰმედლი, ზიარგიარი.

ჯებრაილის რაიონი: ბელენდი, პაპუ, ტულუსი, ჰაჯილი, ტინლი.

რუსეთის საგარეო საქმეთა სამინისტრომ განცხადება გაავრცელა რუსეთის ფედერაციის საგარეო საქმეთა მინისტრ სერგეი ლავროვის აზერბაიჯანისა და სომხეთის საგარეო საქმეთა მინისტრებთან, ჯეიჰუნ ბაირამოვსა და ზოგრაბ მნაცაკანიანთან მოლაპარაკებების შედეგებთან დაკავშირებით.

„რუსეთის ფედერაციის პრეზიდენტ ვლადიმირ პუტინის აზერბაიჯანის პრეზიდენტ ილჰამ ალიევსა და სომხეთის პრემიერ-მინისტრ ნიკოლ ფაშინიანთან ბოლო პერიოდში გამართული სატელეფონო საუბრების გასავითარებლად, 20 და 21 ოქტომბერს, მოსკოვში, რუსეთის საგარეო საქმეთა მინისტრი სერგეი ლავროვი აზერბაიჯანისა და სომხეთის საგარეო საქმეთა მინისტრებს, ჯეიჰუნ ბაირამოვსა და ზოგრაბ მნაცაკანიანს ცალ-ცალკე შეხვდა.

მოლაპარაკებების დროს განიხილეს გადაუდებელი საკითხები, რომელიც დაკავშირებულია მთიანი ყარაბაღის ზონაში ცეცხლის შეწყვეტის ადრე მიღწეული შეთანხმების რეალიზაციასა და მისი მდგრადი დარეგულირებისთვის პირობების შექმნასთან“, – ნათქვამია განცხადებაში.

აზერბაიჯანის საგარეო საქმეთა მინისტრი, ჯეიჰუნ ბაირამოვი სამუშაო ვიზიტით მოსკოვში გაემგზავრა, რუსულ მხარესთან შესახვედრად.

ამის შესახებ, აზერბაიჯანის საგარეო საქმეთა სამინისტრო ავრცელებს ინფორმაციას.

აზერბაიჯანის გენერალურმა პროკურატურამ მშვიდობიან მოსახლეობას შორის მსხვერპლისა და დაჭრილების შესახებ მონაცემები განაახლა.

„სომხეთის შეიარაღებული ძალების მხრიდან დაბომბვის შედეგად, დაიღუპა 63 მშვიდობიანი მოსახლე, 292 კი – დაიჭრა“, – ნათქვამია უწყების განცხადებაში.

„დილის საათებიდან მოყოლებული, სომხეთის შეიარაღებული ძალები არტილერიით ბომბავს ქალაქ ტერტერსა და მთლიანად რაიონის ტერიტორიას“, – ნათქვამია აზერბაიჯანის თავდაცვის სამინისტროს პრესსამსახურის სასწრაფო განცხადებაში.

ყარაბაღში, ბრძოლების დაწყებიდან 25-ე დღე

• სომხეთის თავდაცვის სამინისტრო სამხრეთ მიმართულებით, ირანის საზღვრის მახლობლად, ხუდაფერინის წყალსაცავის რაიონში, ინტენსიური ბრძოლების შესახებ იუწყება.

• აზერბაიჯანის თავდაცვის სამინისტროს ინფორმაციით, ბრძოლები მიმდინარეობდა აღდერე-აღდამის, ფუზული-ჰადრუთი-ჯებრაილისა და გუბადლი-ზანგილანის ფრონტის მიმართულებით, იბომბებოდა აზერბაიჯანში, ტერტერისა და აღდამის რაიონები.

• პრეზიდენტ ილჰამ ალიევისა ცნობით, აზერბაიჯანის არმიამ ყარაბაღის კონფლიქტის ზონაში, კონტროლი დაამყარა კიდევ 24 სოფელსა და ქალაქ ზანგილანზე.

• სომხეთის პრემიერ-მინისტრმა Facebook-ის საკუთარ გვერდზე დაწერა, რომ ყარაბაღის თავდაცვის არმიამ, დაახლოებით, ათი თურქული უპილოტო თვითმფრინავი, „ბაირაქტარი“ ჩამოაგდო და სხვა ქვეყნებს მოუწოდა, მიბაძონ კანადის მაგალითს და შეუჩერონ თურქეთს მისი წარმოებისთვის საჭირო ნაწილების მიწოდება.

• აზერბაიჯანმა მშვიდობიან მოსახლეობას შორის მსხვერპლის შესახებ განახლებული მონაცემები წარმოადგინა: დაიღუპა 61 ადამიანი, 291 – დაიჭრა.

• სომხეთის პრემიერ-მინისტრმა შეხვედრების სერია გამართა: მთიანი ყარაბაღის ყოფილ პრეზიდენტებთან, არკადი გუკასიანსა და ბაკო სააკიანთან, ასევე, იმ პარტიების წევრებთან, რომლებიც პარლამენტში არ არიან წარმოდგენილები და ხელისუფლების მკაცრ ოპოზიციას წარმოადგენენ. განიხილეს „აზერბაიჯან-თურქულ აგრესიასთან დაკავშირებული სამომავლო ნაბიჯები“.

• „სომეხ ხალხს უკან დახევის უფლება არ აქვს, ამ ომში, სახელმწიფოს არსებობის საკითხი წყდება. არცახის დამოუკიდებლობის აღიარების გარეშე, კონფლიქტის დარეგულირება მიუღებელია“, – განაცხადა შეხვედრის შემდეგ, პოლიტიკური პარტია „დაჩნაკცუტუნის“ წარმომადგენელმა, იშხან საგატელიანმა.

• აზერბაიჯანის რუსული მართლმადიდებელი ეკლესია საპროტესტო განცხადებით გამოვიდა „სომხეთის შეიარაღებული ძალების დანაშაულების“ წინააღმდეგ, მათ ქმედებებს „ტერორისტული თავდასხმები“ უწოდა და მსოფლიო თანამეგობრობას „დამნაშავეების დასჯისკენ“ მოუწოდა.

• სომხეთის საგარეო საქმეთა მინისტრის მოადგილემ, შარვაშ კოჩარიანმა პარლამენტში განაცხადა: „ყველაფერი ბრძოლის ველზე წყდება, ძალიან მტკივნეულია მსოფლიო თანამეგობრობის, გაეროს რეაქციის ყურება (…) სომხეთი საომარ მდგომარებაშია, რომელშიც ასევე ჩართულია თურქეთი, რაც გენოციდის საფრთხეს ნიშნავს“.

• სომხეთის სახალხო დამცველმა აზერბაიჯანის მიერ აკრძალული იარაღის გამოყენებასთან დაკავშირებით გამოძიება დაიწყო, კერძოდ, კასეტური ბომბების. გამოძიების კიდევ ერთი თემაა – აზერბაიჯანულ საზოგადოებაში ეთნიკური წმენდის პროპაგანდა და სომხეთისა და ყარაბაღის მოსახლეობის წინააღმდეგ ბრძოლის ტერორისტული მეთოდების პოპულარიზაცია.

• რუსეთისა და საფრანგეთის პრეზიდენტებმა სატელეფონო საუბრისას ყარაბაღის კონფლიქტის ზონაში არსებული ვითარება და ახალი მოლაპარაკებების აუცილებლობა განიხილეს. საუბრის სხვა დეტალების შესახებ ინფორმაცია არ ვრცელდება.

• ახალი ამბები, ფოტო/ვიდეო ყარაბაღში მიმდინარე საბრძოლო მოქმედებებთან დაკავშირებით – 17-20 ოქტომბერი, 2020