შვეიცარიის ფედერალურმა საბჭომ მიიღო ახალი კანონი და შეუერთდა ევროკავშირის გადაწყვეტილებას უკრაინისა და საქართველოს ოკუპირებულ ტერიტორიებზე რუსეთის მიერ გაცემული დოკუმენტების არაღიარების შესახებ.
ფედერალური საბჭოს განცხადების თანახმად, შვეიცარია არ გასცემს შენგენის ვიზას და არ დაუშვებს შენგენის ზონის საზღვრის გადაკვეთას რუსეთის მიერ გაცემული დოკუმენტით საქართველოსა და უკრაინის დროებით ოკუპირებულ ტერიტორიებზე.
უკრაინის ოკუპირებული ტერიტორიებისთვის არ იქნება აღიარებული საბუთები სხვადასხვა თარიღის მიხედვით. საქართველოს შემთხვევაში კი თარიღად 2008 წლის 26 აგვისტოა მითითებული – ამ თარიღის შემდეგ გაცემული რუსული სამგზავრო დოკუმენტებით შენგენის ვიზის აღება შესაძლებელი აღარ იქნება.
ასევე, განცხადების თანახმად, დიპლომატიური და ჩვეულებრივი პასპორტები, მოქალაქეობის არმქონე პირთა ბინადრობის ნებართვები და მეზღვაურის პირადობის მოწმობები არ იქნება აღიარებული.
2022 წლის 22 ოქტომბერს 540-მა ევროპარლამენტარმა მხარი დაუჭირა ევროპული საბჭოს ინიციატივას, რომლის მიხედვით ევროკავშირი არ აღიარებს რუსეთის მიერ უკრაინისა და საქართველოს ოკუპირებულ რეგიონებში გაცემულ სამოგზაურო დოკუმენტებს.
ევროპული საბჭო უკრაინისა და საქართველოს ოკუპირებულ ტერიტორიებზე რუსეთის მიერ გაცემული საერთაშორისო პასპორტებისა და სამგზავრო დოკუმენტებს არაღიარებაზე 2002 წსლის 12 ოქტომბერს შეთანხმდა. საბჭოს განმარტებით, ეს გადაწყვეტილება ევროკავშირის პასუხია უკრაინის წინააღმდეგ რუსეთის აგრესიულ ომზე და ასევე, 2008 წელს საქართველოს ოკუპირებული ტერიტორიების დამოუკიდებლობის ცნობაზე.
ამრიგად, რუსული პასპორტები აღარ მიიჩნევა ვალიდურ დოკუმენტებად, რითაც შენგენის ზონაში ვიზის ან საზღვრის კვეთის სხვა საჭირო დოკუმენტების მიღებაა შესაძლებელი.
როგორც ევროდეპუტატები განმარტავენ, რუსეთის მიერ უკრაინაში ყირიმის, სევასტოპოლის, დონეცკის, ლუჰანსკის, ხერსონისა და ზაპოროჟიეს ანექსია უკანონოა. ასევე, ევროკავშირი გმობს საქართველოში აფხაზეთისა და ე.წ. სამხრეთ ოსეთის დამოუკიდებლობის აღიარებას.
ევროპარლამენტარებმა აღნიშნეს, რომ ყველას აქვს უფლება გაექცეს უკრაინაში მიმდინარე კონფლიქტს და ევროკავშირში ჰუმანიტარული დახმარების მისაღებად შევიდეს. შესაბამისად, ევროკომისიას უფლება ექნება ოკუპირებული ტერიტორიების სიაში დაამატოს ახალი რეგიონები ან ამოიღოს ისინი შესაბამისი დელეგირებული აქტებით.
