მთავრობა რთველს დაასუბსიდირებს - რქაწითელის და კახური მწვანეს ფასი მინიმუმ 80 თეთრი იქნება
საქართველოს მთავრობა 2020 წლის რთვლის სუბსიდირებისთვის ბიუჯეტიდან 60 მლნ ლარს გამოყოფს. სუბსიდირება მხოლოდ ყურძნის 2 ჯიშზე – რქაწითელსა და კახურ მწვანეზე გავრცელდება. წლევანდელ რთველში სახელმწიფო სუბსიდიას ის კომპანიები მიიღებენ, რომლებიც 1000 ტონაზე მეტი ყურძნის გადამუშავებას შეძლებენ. 1 კგ შესყიდულ ყურძენზე ისინი სახელმწიფოსგან 30 თეთრს მიიღებენ – იმ პირობით, რომ ისინი გლეხებისგან 1 კგ რქაწითელს და კახურ მწვანეს მინიმუმ 80 თეთრად შეისყიდიან.
პრემიერ-მინისტრ გიორგი გახარიას განმარტებით, რთვლის სუბსიდირება მთავრობამ კორონავირუსის პანდემიით გამოწვეული კრიზისული მდგომარეობის გამო გადაწყვიტა. კორონავისრუსის პანდემიით გამოწვეული შეზღუდვების გამო შემცირდა არა მარტო ქართული ღვინის ექსპორტი, არმედ ღვინოზე ადგილობრივი მოთხოვნაც: უკვე 4 თვეა უცხოელი ტურისტებისთვის დაკეტილია საქართველოს საზღვრები, ამ ხნის განმავლობაში დაკეტილი იყო კაფე-ბარები და რესტორნებიც.
“მევენახეობის სექტორში დღეს ვაწყდებით ძალიან რთულ გამოწვევას. ეს არ ეხება მხოლოდ საქართველოს, ეს ეხება ევროპის წამყვან ღვინის მწარმოებელ ქვეყნებს, როგორიც არის საფრანგეთი, იტალია და ესპანეთი, რომლებიც მსოფლიო ღვინის 70%-ზე მეტს აწარმოებენ. ყველგან არის დაბინავების და ტევადობების პრობლემა, რომ ყურძენი ჩაიწუროს და იწარმოოს ღვინო. ასეთ რთულ ვითარებაში ის, რომ ჩვენ მინიმალური გარანტიები შევქმენით ქართველი მევენახეებისთვის, ვფიქრობ, რომ არის ძალიან დიდი მიღწევა და ძალიან მნიშვნელოვანი სოლიდარობა მევენახე ფერმერებისადმი, იმისთვის, რომ მათ ნაკლები პრობლემებით გაიარონ 2020 წლის სეზონი,” – ამბობს საქართველოს გარემოს დაცვისა და სოფლის მეურნეობის მინისტრი, ლევან დავითაშვილი.
- როგორ აპირებს საქართველოს ხელისუფლება სოფლის მეურნეობის გადარჩენას
- მთავრობის ანტიკრიზისული გეგმა – ვინ რა დახმარებას მიიღებს
- პანდემიის ეკონომიკა – სად არის გამოსავალი კრიზისიდან? საუბარი ბესო ნამჩავაძესთან და ანდრია გვიდიანთან
წელს საქართველოში 280-300 ათას ტონამდე ყურძნის მოსავალს ელოდებიან.
სახელმწიფო ყურძნის სუბსიდირებას 2008 წლიდან ახორციელებს. სუბსიდირების შესახებ გადაწყვეტილება მაშინდელმა მთავრობამ რუსეთის მიერ დაწესებული ემბარგოს ნეგატიური შედეგების გასანეიტრალებლად და მევენახეობა-მეღვინეობის დარგის წახალისების მიზნით მიიღო.
რთვლის სუბსიდირება არ მოხდა 2019 წელს – გასულ წელს მთავრობამ გადაწყვიტა, რომ დარგი უკვე საკმარისად იყო განვითარებული იმისთვის, რომ ყურძნის ფასი ბაზარს დაერეგულირებინა.
2008-2018 წლებში რთვლის სუბსიდირებისთვის სახელმწიფო ბიუჯეტიდან 175.8 მილიონი ლარი დაიხარჯა.
2008-2018 წლებში ყურძნის ცალკეული ჯიშების სუბსიდირებისთვის გამოყოფილი თანხა და ჯამური ხარჯი (ლარებში):
