ვარძია საფრთხეშია, ნინოწმინდაში სამშობიარო არ აქვთ, ქუთაისში კი ახალი წლისთვის ემზადებიან
რა ხდებოდა მიმდინარე კვირას საქართველოს რეგიონებში. რაზე წერდნენ ადგილობრივი მედიები – ათი მთავარი ამბავი საქართველოს რეგიონებიდან.
ასპინძაში მდებარე ვარძიის კომპლექსი საფრთხეშია. კომპლექსს აქვს ბზარები და არსებობს ლოდების დაგორების საშიშროება. რამდენიმე დღის წინ, 18 ოქტომბერს, კლდიდან ლოდები უკვე ჩამოცვივდა. ამ შემთხვევის შედეგად არავინ დაშავებულა, მაგრამ, დაზიანდა გზა, რომელზეც ვარძიისკენ მიმავალი მანქანები და ფეხით მოსიარულეები დადიან.
რატომ აღმოჩნდა ვარძია ასეთ მდგომარეობაში – ვრცლად ონლაინ გამოცემა Sk News-ის ამ მასალაში წაიკითხავთ:
ვარძია საფრთხეშია, ექსპერტები სამონასტრო კომპლექსის კრიტიკულ მდგომარეობაზე საუბრობენ
ნინოწმინდის მცხოვრებლები ითხოვენ, რომ ადგილობრივ საავადმყოფოში სამშობიარო განყოფილება გაიხსნას, რომელიც 2020 წლიდანაა გაუქმებული. ქალაქის საავადმყოფოს მენეჯერი ამბობს, რომ სამშობიაროს გასახსნელად თითქმის ყველაფერი მზადაა. დარჩა ანესთეზიოლოგის აყვანა და ნებართვის მიღება ჯანდაცვის სამინისტროდან.
რატომ დაიხურა ნინოწმინდის საავადმყოფოში სამშობიარო განყოფილება – წაიკითხეთ რადიო “ნორის” ამ მასალაში .
ქუთაისში უკვე დაიწყეს მზადება ახალი წლისთვის. ქუთაისის მერიამ უკვე ორი ტენდერი გამოაცხადა საახალწლო ნაძვის ხისა და სათამაშოების შესაძენად.
ქუთაისის ადგილობრივი გამოცემის “ქუთაისიპოსტის” ინფორმაციით, საშობაო ნაძვის ხე ბიუჯეტს 155 ათასი ლარი დაუჯდება. სათამაშოებში კი 70 ათასამდე ლარს გადაიხდიან.
უფრო მეტი დეტალი შეგიძლიათ ამ სტატიაში წაიკითხოთ:
ქუთაისის მერია საშობაო ნაძვის ხის სათამაშოებში 70 ათასამდე ლარს დახარჯავს
წალენჯიხაში “იუვენტუსის” ბავშვთა საფეხბურთო აკადემიის გახსნა იგეგმება. ამ ამბავს რადიო “ათინათი” წალენჯიხის ადგილობრივ მედიაზე დაყრდნობით ავრცელებს. როგორც გამოცემა წერს, ამ ინიციატივის განხორციელებაში წალენჯიხის მერს, რომელიც ერთადერთი ოპოზიციონერი მერია საქართველოში, “ლელოს” ერთ-ერთი ლიდერი მამუკა ხაზარაძე ეხმარება.
რამდენად რეალურია “იუვენტუსის” ბავშვთა საფეხბურთო აკადემიის გახსნა წალენჯიხაში – მეტ დეტალს წაიკითხავთ რადიო “ათინათის” ამ მასალაში.
ამავე გამოცემის ცნობით, მესტიაში უკვე მოვიდა პირველი თოვლი.
თელავის მუნიციპალიტეტის სოფელ ყარაჯალასთან მდებარე წისქვილში 40 წლამდე ასაკის კაცი დაიღუპა. ადგილობრივები ამბობენ, რომ ახალგაზრდა კაცი წისქვილის დანადგარმა ტანსაცმლით ჩაითრია. კაცი ადგილზე გარდაიცვალა.
ამ ამბავზე ადგილობრივი გამოცემა “სპექტრი” წერს. მეტ დეტალს წაიკითხავთ მასალაში:
სოფელ ყარაჯალაში მდებარე წისქვილში 40 წლამდე კაცი დაიღუპა.
საგარეჯოს მუნიციპალიტეტის სოფელ უდაბნოში იდეათეკა გაიხსნა. ამიერიდან უდაბნოს საჯარო სკოლის 125 მოსწავლეს ექნება შესაძლებლობა, ისარგებლოს მრავალფუნქციური და მრავალფეროვანი ბიბლიოთეკით, კომპიუტერებით, პროექტორებითა და სხვა საგანმანათლებლო და შემეცნებითი რესურსით.
ვისი ინიციატივაა სოფლებში იდეათეკის გახსნა, წაიკითხავთ “კახეთის ხმის” ამ მასალაში.
ამავე გამოცემის ინფორმაციით, ლაგოდეხში წელს პირველად ჩატარდა ფეინთბოლის ჩემპიონატი.
მეტი დეტალისთვის წაიკითხეთ:
ლაგოდეხში ფეინთბოლის ჩემპიონატი გაიმართა
მარნეულის მერიამ გადაწყვიტა სოფელ ახკერპის ამბულატორიაში ერთი ოთახი გაარემონტოს. ტენდერი დაახლოებით 9 ათას ლარზე გამოცხადდა.
რადიო “მარნეულის” ინფორმაციით, სექტემბრიდან ამბულატორიის შენობაში სოფლის სკოლა გადავიდა, რადგან სკოლა ავარიულია და იქ სწავლის გაგრძელება სახიფათო იყო. ამიტომ, ამბულატორიას მხოლოდ ერთი ოთახი დარჩა.
უფრო ვრცლად ინფორმაცია შეგიძლიათ წაიკითხოთ სტატიაში: ახკერპის ამბულატორიაში ერთ ოთახს გაარემონტებენ.
მარნეულის სოფლებში ხანჯიგაზლოში, ქვემო ყულარსა და ხუტორ-ლეჟბადინში კი სასაფლაობს შემოღობავენ. ამისთვის 37`525 ლარს დახარჯავენ.
უფრო ვრცლად ნახეთ რადიო “მარნეულის” ამ მასალაში.
ხელვაჩაურში 5 წლის ბავშვი ძაღლმა დაკბინა. მცირეწლოვანს დაზიანებები სახის არეში აქვს და შესაძლოა, ქირურგიული ჩარევა დასჭირდეს.
აჭარის ადგილობრივი ტელევიზისს TV 25-ის ინფორმაციით, მციეწლოვანი ბავშვი ამჟამად კლინიკაში მკურნალობს.
ვრცლად ნახეთ: ხელვაჩაურში, 5 წლის ბავშვი ძაღლმა დაკბინა – მოზარდი კლინიკაში მოათავსეს
