"უხეირო დიქტატორი და არა ახლო პარტნიორი" - აშშ-ის კონგრესში საქართველოსა და მოლდოვაზე მოსმენა გაიმართა
მოსმენა წარმომადგენელთა პალატაში
![](https://jam-news.net/app/uploads/2024/07/Screen-Shot-2024-07-23-at-23.33.15-1024x590.png)
აშშ-ის კონგრესის საგარეო ურთიერთობათა კომიტეტში საქართველოსა და მოლდოვაში 2024 წელს ჩანიშნული არჩევნების და აშშ-ს პოლიტიკის შესახებ მოსმენა გაიმართა.
მოსმენაზე სახელმწიფო მდივნის მოადგილემ ჯოშუა ჰაკმა საქართველოში მიღებულ რუსულ კანონზე ისაუბრა და უპასუხა დეზინფორმაციის კამპანიას იმის შესახებ, რომ უცხოეთის გავლენის შესახებ კანონი აშშ-ს უცხოეთის აგენტების რეგისტრაციის აქტის (FARA) მსგავსია.
მან სიტყვით გამოსვლა დაიწყო საქართველო-აშშ-ის ურთიერთობებზე საუბრით და ხაზი გაუსვა, რომ საქართველოსა და შეერთებული შტატების ურთიერთობის მხარდაჭერა არასდროს ყოფილა იმაზე მნიშვნელოვანი, ვიდრე ეს ახლაა. ჰაკმა იმედი გამოთქვა, რომ “ქართული ოცნება” გადახედავს საკუთარ ქმედებებს – დააბრუნებს ქვეყანას დემოკრატიულ ტრაექტორიაზე.
მოსმენაზე დამსწრეებს სიტყვით მიმართა კომიტეტის წევრმა, კონგრესმენმა ბილ კიტინგმა, რომლის თქმითაც, კონსტიტუციით შეზღუდვის მიუხედავად ქვეყნის ევრო-ატლანტიკური მიმართულებით სვლის შესახებ, საქართველოს მთავრობამ ამ გზიდან გადაუხვია. ბილ კიტინგი კონგრესში MEGOBARI აქტის ერთ-ერთი ავტორია.
რესპუბლიკელმა კონგრესმენმა ტომ კინმა განაცხადა, რომ “ქართული ოცნების” ლიდერის მუქარა კარგად შეესაბამებოდა “უხეირო დიქტატორს” და არა აშშ-ის ახლო პარტნიორს. მისივე თქმით, “მოუთმენლად ელის”, როგორ უპასუხებს ქართველი ხალხი მთავრობის ქმედებებს ოქტომბრის “კრიტიკულად მნიშვნელოვან” საპარლამენტო არჩევნებზე.
რა თქვეს კონგრესმენებმა და სახელმწიფო მდივნის თანაშემწემ
ჯოშუა ჰაკი, სახელმწიფო მდივნის მოადგილე: “საქართველოს მთავრობა მკვეთრად ცვლის ქვეყნის წარსულ დემოკრატიულ ტრაექტორიას“
პირველ რიგში, FARA ასხვავებს არამომგებიან და მომგებიან ორგანიზაციებს, ქართული კანონის სამიზნე კი მხოლოდ სამოქალაქო საზოგადოება და მედია ორგანიზაციებია. ეს პირველი პრობლემაა.
მეორე, ამერიკული კანონი გამორიცხავს მედია ორგანიზაციებს, თუ კომპანიის მმართველობა ამერიკულია. ქართული კანონი ამას არ ასხვავებს, პირიქით, მედია პირდაპირ სამიზნეა, რასაც იქ დამოუკიდებელ მედიაზე სერიოზული ეფექტი აქვს.
დამატებით, FARA-ს კანონი ეფუძნება ორგანიზაციის ქმედებებს, რამდენად არის ის პირდაპირ მართული უცხოეთიდან, ქართული კანონი არც ამას ასხვავებს, ის მხოლოდ აკვირდება, თუ საიდან მოდის უცხოური დაფინანსება.
საქართველოს მთავრობა მკვეთრად ცვლის ქვეყნის წარსულ დემოკრატიულ ტრაექტორიას და მის ევროატლანტიკურ მისწრაფებებსა და აშშ-სთან მის ურთიერთობებს რისკის ქვეშ აყენებს.
მან მიიღო არადემოკრატიული კანონმდებლობა, მოახდინა სამოქალაქო საზოგადოების დემონიზება და ეწევა დეზინფორმაციასა და რიტორიკულ თავდასხმას აშშ-სა და ევროპელი პარტნიორების წინააღმდეგ, რომლებიც საქართველოს ათწლეულების განმავლობაში უჭერდნენ მხარს.
უცხოური გავლენის შესახებ კანონი, რომელიც 28 მაისს საქართველოს მმართველმა პარტიამ მიიღო, ამ ანტიდემოკრატიული გადახრის სიმბოლოა. ეს კანონი, რომელიც რუსული კანონის ანარეკლია, შექმნილია იმისთვის, რომ ჩაახშონ კრიტიკული ხმები, ჩირქი მოსცხონ დამოუკიდებელ NGO აქტივისტებსა და ჟურნალისტებს და ჩაახშონ საქართველოს ძლიერი სამოქალაქო საზოგადოება.
მაისში თბილისში ვიზიტისას სახელმწიფო მდივნის მოადგილე ჯიმ ო’ბრაიანმა და მე ხაზი გავუსვით საქართველოს მთავრობის არადემოკრატიულ ქმედებებს და გავაფრთხილეთ შედეგებზე, თუ მმართველი პარტია არ შეცვლიდა კურსს.
მსგავსად, სახელმწიფო მდივნის მოადგილეებმა უზრა ზეიამ და ჯონ ბასმა კიდევ ერთხელ ხაზგასმით გაუმეორეს ქართველ ოფიციალურ პირებს, რომ მთავრობის ქმედებები შეუთავსებელია ევროკავშირსა და NATO-ში გაწევრიანების სურვილთან.
6 ივნისს სავიზო შეზღუდვების დაწესების ნაბიჯი გადავდგით საქართველოს მმართველი პარტიის ოფიციალური პირების, პარლამენტარებისა და სამართალდამცავი უწყებების თანამშრომლების წინააღმდეგ, რომლებიც პასუხისმგებელნი, ან თანამონაწილენი არიან ქართული დემოკრატიისთვის ძირის გამოთხრაში.
ეს ნაბიჯები დაფუძნებულია ჩვენს წინა ქმედებებზე, როგორიცაა სავიზო შეზღუდვები კორუმპირებული მოსამართლეების წინააღმდეგ და ფინანსური სანქციები ეფესბესთან დაკავშირებული ქართველ-რუს ოლიგარქის, ოთარ ფარცხალაძის წინააღმდეგ.
ჩვენ კოლეგებთან ერთად კვლავ ვმუშაობთ დამატებით ნაბიჯებზე, მათ შორის, დახმარების პროგრამების პოტენციურ გადამისამართებაზე ან შეჩერებაზე და პოლიტიკური ჩართულობის გაუქმებაზე. თავდაცვის დეპარტამენტმა უკანასკნელ პერიოდში გამოაცხადა საქართველოში სამხედრო წვრთნების გაურკვეველი დროით გადადების შესახებ.
ვიტოვებთ იმედს, რომ საქართველოს ლიდერები გადახედავენ საკუთარ ქმედებებს და დაუბრუნდებიან საქართველოს ხანგრძლივ ევროატლანტიკურ მისწრაფებებს.
ჩვენ ვრჩებით საქართველოს სამოქალაქო საზოგადოების მყარი მხარდამჭერები მთავრობიდან წამოსული წნეხის, მუქარებისა და ფიზიკური თავდასხმების პირისპირ. ჩვენ ჩართულები ვართ სამოქალაქო საზოგადოების წარმომადგენლებთან რეგულარულად და აქტიურად ვუჭერთ მხარს მათ მცდელობებს, რომ ოქტომბრის არჩევნები თავისუფალი და სამართლიანი იყოს.
ქართველმა ხალხმა უნდა გადაწყვიტოს საქართველოს მომავალი, ამიტომ, ყურადღებით უნდა ვიყოთ საქართველოს წინაშე რუსეთის მხრიდან არსებული საფრთხეების მიმართ, რომელიც განაგრძობს საქართველოს ტერიტორიების 20 პროცენტის ოკუპაციას.
ბოლოს, მინდა, კიდევ ერთხელ დავადასტურო, რომ რთული პერიოდის მიუხედავად, ქართველი ხალხის მიმართ აშშ-ს ერთგულება მყარი და უცვლელია. ამერიკელები და ქართველები იზიარებენ განსაკუთრებულ მეგობრობას, რომელიც დაფუძნებულია საერთო ღირებულებებზე: თავისუფლებისა და დამოუკიდებლობის სიყვარულზე. გავაგრძელებთ ძლიერი, დაცული და დემოკრატიული საქართველოს განვითარების მხარდაჭერას.”
![ჯოშუა ჰაკი](https://jam-news.net/app/uploads/2024/07/file.jpeg-1-1024x538.jpg)
ბილ კიტინგი, დემოკრატი კონგრესმენი: “თქვენი ქმედებები არ ჩაივლის უპასუხოდ!”
“წინა თვეებში “ქართულმა ოცნებამ” გაიტანა კრემლით ინსპირირებული კანონი “უცხოეთის აგენტების” შესახებ, რათა თავს დაესხას სამოქალაქო საზოგადოებას და გამოხატვის თავისუფლებას ქვეყანაში. მე ორი მესიჯი მაქვს ქართულ ოცნებასთან და ქართველ ხალხთან:
პირველი, საქართველოს მთავრობას, თქვენი ქმედებები არ ჩაივლის უპასუხოდ. მაისში სახელმწიფო დეპარტამენტმა მიიღო თანამდებობის პირების და მათი ოჯახის წევრების შეზღუდვების საწყისი ტრანში.
მეორე, ქართველ ხალხს, თქვენი ამბიცია ევროკავშირში და NATO-ში ყოფნის შესახებ კარგად ცნობილია ამ კონგრესში და ადმინისტრაციაში და ჩვენ გავაგრძელებთ თქვენს მხარდაჭერას ამ მიმართულებით.
ვვარაუდობ, რომ შემზღუდავი ზომები “ქართული ოცნების” წარმომადგენლების და მათი ოჯახის წევრების მიმართ თანდათან გაფართოვდება.
ქართველმა ხალხმა წლების განმავლობაში მკაფიოდ გამოხატა ერთგულება ქვეყნის ევრო-ატლანტიკური გზის მიმართ და იმედი გამოთქვა, რომ ამ არჩევანს ქართველი ხალხი საარჩევნო ყუთებთან კვლავ ცხადყოფს.”
ტომ კინი, რესპუბლიკელი კონგრესმენი: “ქართული ოცნების” ლიდერის მუქარა პოლიტიკური ოპონენტების წინააღმდეგ კარგად შეესაბამებოდა უხეირო დიქტატორს”
“საქართველოს ბევრი მოქალაქე მამაცად და მშვიდობიანად გამოვიდა ქუჩებში, რათა წინააღმდეგობა გამოეხატა მათი მთავრობის მავნე ქმედებისადმი. სამწუხაროდ, მათ ძალადობრივი დარბევებითა და დაკავებებით დახვდნენ.
“უცხოური აგენტები” კანონპროექტზე მიმდინარე საუბრების შუაგულში “ქართული ოცნების” ლიდერი გამოსვლაში დაიმუქრა “სასტიკი შურისძიებით” მისი პოლიტიკური ოპონენტების წინააღმდეგ, რომელიც კარგად შეესაბამებოდა უხეირო დიქტატორს და არა აშშ-ის ახლო პარტნიორს.
მოუთმენლად ველი, თუ როგორ უპასუხებს საქართველოს ხალხი თავისი მთავრობის ასეთ ქმედებებს ოქტომბერს კრიტიკულად მნიშვნელოვან საპარლამენტო არჩევნებზე.
ბოლოს აღვნიშნავ, რომ ამ ოქტომბერში იმედის ადგილი არის საქართველოშიც და მოლდოვაშიც. მჯერა, რომ ორივე ქვეყნის მოქალაქეების უდიდესი უმრავლესობა მოუთმენლად ელიან უფრო ახლო ურთიერთობებს შეერთებულ შტატებთან და არ სურთ საკუთარი ქვეყნების კრემლის სურვილებისთვის კიდევ ერთხელ დამორჩილება