"პრაქტიკულად, ციხეში განადგურება მომისაჯეს" - სააკაშვილის საქმეზე შეკრებითობის პრინციპი გამოიყენეს და 12 წელი მიუსაჯეს
მიხეილ სააკაშვილის საქმე
მიხეილ სააკაშვილს საზღვრის უკანონო კვეთის საქმეზე 4 წლისა და 6 თვის წელი მიესაჯა. გადაწყვეტილება მოსამართლე მიხეილ ჯინჯოლიამ გამოაცხადა, რომელმაც საქმეზე შეკრებითობის პრინციპი გამოიყენა.
ჯინჯოლიას განცხადებით, სასჯელი დაემატა სახელმწიფო ბიუჯეტიდან თანხის გაფლანგვის საქმეზე მიხეილ სააკაშვილისთვის 12 მარტს მისჯილ 9-წლიან პატიმრობას და სააკაშვილს ჯამში 12 წელითა და 6 თვით თავისუფლების აღკვეთა განესაზღვრა.
მიხეილ სააკაშვილს ასევე, სასჯელის მოხდის შემდეგ, 3 წლის ვადით ჩამორთმეული აქვს სახელმწიფო სამსახურში დანიშნული თანამდებობის დაკავების უფლება.
მიხეილ სააკაშვილის მიერ საზღვრის უკანონოდ კვეთის საქმეზე გამოძიება 2021 წლის პირველ ოქტომბერს დაიწყო. საქართველოს მე-3 პრეზიდენტს, ბრალდება სისხლის სამართლის კოდექსის 344-ე მუხლით წარუდგინეს.
ამავე საქმეზე ბრალდება კიდევ 4 პირს: ელგუჯა ცომაიას, ზურაბ და შალვა წოწორიებს და გიორგი ნარიმანიძეს აქვთ წარდგენილი. ისინი გირაოს სანაცვლოდ არიან გათავისუფლებულები და მათი საქმე ცალკე წარმოებად მიმდინარეობს.
12 მარტს, თბილისის საქალაქო სასამართლოს მოსამართლე ბადრი კოჭლამაზაშვილმა მიხეილ სააკაშვილს სახელმწიფო ბიუჯეტიდან თანხის გაფლანგვის საქმეზე 9-წლიანი პატიმრობა მიუსაჯა.
საქართველოს ექსპრეზიდენტი, მიხეილ სააკაშვილი სასამართლოს მიერ მის მიმართ გამოტანილ განაჩენს გამოეხმაურა. სააკაშვილის თქმით, ამ გადაწყვეტილებით, პრაქტიკულად, ციხეში ფიზიკური განადგურება მიუსაჯეს.
“მინდა, გამოვეხმაურო იმ ჯალათურ, უკანონო, სამარცხვინო გადაწყვეტილებების სერიას, რომელიც ივანიშვილის რუსულმა უსამართლობის კომბინატმა მიიღო – და პრაქტიკულად, ციხეში განადგურება, ფიზიკური მოსპობა მომისაჯა […] თქვენ თვალწინ ანადგურებენ და სპობენ ადამიანს, რომელსაც ყველაფერი საქართველოსთვის უნდოდა […]
რამდენიც გინდათ, გამანადგურეთ – საქართველოს თავისუფლების იდეას ვერ ჩაკლავთ. სააკაშვილის სულს თქვენ ვერ ჩაკლავთ”. – თქვა სააკაშვილმა.
მესამე პრეზიდენტი საქმეები
საქალაქო სასამართლოს მოსამართლე გიორგი არევაძემ 2018 წლის 5 იანვარს სანდრო გირგვლიანის მკვლელობაში მსჯავრდებულების შეწყალებისთვის, ყოფილი პრეზიდენტი მიხეილ სააკაშვილი დამნაშავედ ცნო. ექსპრეზიდენტს 3 წლით თავისუფლების აღკვეთა დაუსწრებლად მიესაჯა. ეს პირველი განაჩენი იყო, რომელიც ყოფილი პრეზიდენტის მიმართ საქართველოს სასამართლოებში გამოცხადდა.
სასამართლომ სააკაშვილი ასევე დამნაშავედ ცნო ვალერი გელაშვილზე თავდასხმის საქმეზე საქართველოს სისხლის სამართლის კოდექსის 333-ე მუხლის მე-3 ნაწილის “ბ” ქვეპუნქტით, რაც გულისხმობს სამსახურებრივი უფლებამოსილების გადამეტებას ძალადობით და იარაღის გამოყენებით და 117-ე მუხლის მეხუთე ნაწილის “ე” ქვეპუნქტით ჩადენილი დანაშაულისთვის, რაც ჯგუფურად ჯანმრთელობის განზრახ მძიმე დაზიანების ორგანიზებას მოიცავს. ყოფილ პრეზიდენტს ამ საქმეზე 6 წლიანი პატიმრობა მიუსაჯეს.
2021 წლის 1 ოქტომბერს საქართველოს მესამე პრეზიდენტი საქართველოში ჩამოვიდა. მალევე, შსს-მ გაავრცელა განცხადება, სადაც წერდა, რომ მიხეილ სააკაშვილს საქართველოს საზღვარი არ გადმოუკვეთავს. მმართველი გუნდის წევრებიც, მთელი დღის განმავლობაში აცხადებდნენ, რომ ექსპრეზიდენტს უკრაინაც კი არ დაუტოვებია. მიხეილ სააკაშვილი თბილისში იმავე დღეს დააკავეს.
