მიხეილ სააკაშვილი: ვიღვიძებ და ვიძინებ უკრაინასთან ერთად. მომწამლეს ციხის საავადმყოფოში გადაყვანისას

მიხეილ სააკაშვილი

უკრაინულ მედია “უკრაინსკაია პრავდასთან” ინტერვიუში, რომელიც წერილობით გამოქვეყნდა, საქართველოს მესამე პრეზიდენტი მიხეილ სააკაშვილი ამბობს, რომ ციხის საავადმყოფოში გადაყვანისას ის მოწამლეს, როცა მოულოდნელად გახდა ცუდად.

კითხვაზე, რას იზამდა ახლა რომ თავისუფალი და უკრაინაში იყოს, ექსპრეზიდენტი პასუხობს:

“პირველ რიგში, ვიქნებოდი პრეზიდენტ ზელენსკის გვერდით, რომელსაც მივიჩნევ ყველაზე გამოჩენილ სახელმწიფო მოღვაწედ ჩერჩილის პერიოდის შემდეგ. მასთან შედარებით, ტეტჩერი და რეიგანი გვერდით ნერვიულად ეწევიან. ამავდროულად, მთელ მსოფლიოს შემოვივლიდი, ჩემს მრავალრიცხოვან კავშირებს უკრაინისთვის დახმარების მობილიზებისთვის გამოვიყენებდი. 

ასევე, მე გამუდმებით ვივლიდი [ფრონტის] წინა ხაზზე, დავეხმარებოდი უკრაინელ და ქართველ მებრძოლებს. ცოტა ხნის წინ ქართველმა მებრძოლებმა ჩაწერეს ერთობლივი მიმართვა, მილოცავდნენ დაბადების დღეს, თუმცა, წამითაც არ მავიწყდება ფაქტი, რომ უკვე 35-მა მათგანმა თავი გასწირა ომში, მათ შორის, 7-მა ბახმუტის ფრონტზე. ბევრი ჩემი უკრაინელი მეგობარი დაიღუპა ან დაიჭრა. 

ერთ-ერთი ყველაზე პატიოსანი და წესიერი ხალხი, ვისაც ვიცნობ, ჩემი დამხმარე ვლადიმირ ჩავრიგი დაიღუპა ხერსონთან. ჩემი ერთადერთი პირადი მცველი და უბრალოდ მეგობარი, მიშა ბატურინმა მიიღო მძიმე დაზიანებები ბახმუტთან. ასეთ ფასს იხდის უკრაინა და მთელი მსოფლიო. 

მე თავს 100%-ით უკრაინელად ვგრძნობ და ამით ასე არასდროს მიამაყია. 

[…] ომი რუსეთის სრული მარცხითა და დაშლით დასრულდება. გამარჯვების კონკრეტული ფორმულა ვოლოდიმირ ზელენსკიმ ჩამოაყალიბა. თუ ვიცოცხლებ გამარჯვებამდე (მჯერა, ეს რამდენიმე თვეში იქნება) მინდა, ოდესაში დავბრუნდე – დავტკბე ზღვის ხედით და გავუმასპინძლდე მეგობრებს.” – განაცხადა სააკაშვილმა.

● სააკაშვილის საქმეები. რისთვის ზის ციხეში ყოფილი პრეზიდენტი
● “ქართულად საუბრობენ, თორემ სულისკვეთებით არის ФСБ-ს ტექსტები” – რა გამოხმაურება მოჰყვა ღარიბაშვილის განცხადებებს
● “საქართველოში დემოკრატიის უკუსვლა შემაშფოთებელია” – აშშ-ს სენატის საგარეო კომიტეტის სხდომა

29 დეკემბერს, სააკაშვილის სასამართლო პროცესზე მოწმის სახით ამერიკელი ტოქსიკოლოგი, დევიდ სმიტი დაკითხეს. მისი თქმით, საქართველოს ექსპრეზიდენტი მძიმე მეტალებით კლინიკა “ვივამედში” გადაყვანამდე, ციხეში მოწამლეს.

ამერიკელმა ტოქსიკოლოგმა თქვა, რომ მან განიხილა მიხეილ სააკაშვილის სამედიცინო ჩანაწერები და ლაბორატორიული ტესტების შედეგები. ასევე, თმის, ფრჩხილებისა და სისხლის ნიმუშები. გარდა ამისა, ექსპრეზიდენტის გაფართოებული სამედიცინო ჩანაწერები და აგრეთვე, 170-გვერდიანი დასკვნა.

“ეს მეტალები ჯანმრთელობის მდგომარეობას ამძიმებენ და მათ კავშირი აქვთ პაციენტის დაავადებასთან. ჩემი აზრით, სააკაშვილის პირველი ინტოქსიკაცია მარტში მოხდა, ვიდრე მას ვივამედში გადაიყვანდნენ და მოგვიანებით, ამ მძიმე მეტალებმა სხვადასხვა ორგანო დააზიანა. მას სიმპტომები მაშინ ჰქონდა, როდესაც სამედიცინო დაწესებულებაში გადაიყვანეს. ანუ, ვთვლი, რომ მძიმე მეტალებით დაზიანება მანამდე, ანუ ციხეში მიიღო. ვვარაუდობ, რომ ამ ტოქსიკური აგენტების დოზა იმდენად მაღალი იყო, რომ ამ 5 თვის გასვლის შემდეგაც კი კონცეტრაცია ნორმაზე მაღლა აღმოჩნდა. ანუ მას ტოქსიკური კონტრენტაცია ჰქონდა”. – ამბობს სმიტი.

მიხეილ სააკაშვილის პროცესზე მოწმის სახით კლინიკა “ვივამედის” ნევროლოგი, თამარ აბაშიძეც დაკითხეს. ექიმის თქმით, ბოლო თვეებში მიხეილ სააკაშვილის ნევროლოგიური მდგომარეობა საგრძნობლად გაუარესებულია. 

სააკაშვილის ადვოკატმა, შალვა ხაჭაპურიძემ მას ჰკითხა, იმ მკურნალობამ, რომელიც სააკაშვილს პენიტენციურ დაწესებულებსა და კლინიკა ვივამედში ჩაუტარდა, ნევროლოგიის კუთხით დადებითი შედეგი გამოიღო თუ არა. 

“დადებით შედეგს ვერც გამოიღებს, თუ ფსიქო-ნეირორეაბილიტაციას არ დავიწყებთ. ამ შემთხვევაში, მკურნალობა მხოლოდ მედიკამენტოზური არ არის. ის აუცილებლად მოიცავს როგორც მედიკამენტოზურ, ასევე რეაბილიტაციურ ნაწილს. ალბათ, თქვენც ნახეთ, რომ ყველა რეკომენდაცია, გასინჯვა და კონსულტაცია იმით მთავრდება ხოლმე, რომ დღის წესრიგში რჩება ნეირორეაბილიტაციის დაწყება. მას რამდენიმე მასაჟი უკეთდება, თუმცა, ის ძალიან მალე იღლება და სრულყოფილი არ არის. თანაც, რეაბილიტაცია მხოლოდ მასაჟი არ არის”. – ამბობს ექიმი.

● არესტოვიჩი და ფეიგინი ხალხს მოუწოდებენ, საქართველოს საელჩოებთან სააკაშვილის მხარდამჭერი აქცია გამართონ
● მაგნიტსკის აქტის ავტორი: სააკაშვილი ჩვენ თვალწინ კვდება – ეს ხელისუფლების პასუხისმგებლობაა 

#SaveMisha – ამ ლოზუნგით უკრაინის პრეზიდენტის მრჩეველი ოლექსი არესტოვიჩი და ყოფილი ადვოკატი და წამყვანი მარკ ფეიგინი საზოგადოებას მოუწოდებენ, 4 იანვარს, მსოფლიოს სხვადასხვა ქვეყანაში, საქართველოს საელჩოებთან, მიხეილ სააკაშვილის მხარდამჭერი აქციები გამართონ.

ამავე ეთერში ოლექსეი არესტოვიჩმა აღნიშნა, რომ “მიხეილ სააკაშვილს საჩვენებლად ანადგურებენ ციხეში” და მოუწოდა მაყურებლებს, გლობალურ აქციაში მიიღონ მონაწილეობა, რადგან “არ შეიძლება დავუშვათ, რომ თანამედროვე მსოფლიოში ადამიანს ასე ექცეოდნენ”. 

20 დეკემბერს, უკრაინის პრეზიდენტმა ვოლოდიმირ ზელენსკიმ საქართველოს მთავრობას მოუწოდა, მიხეილ სააკაშვილი სამკურნალოდ სამკურნალოდ საზღვარგარეთ გადაიყვანონ. მის ამ მოწოდებას მოლდოვის პრეზიდენტი, მაია სანდუც შეუერთდა. 

ამის საპასუხოდ, “ქართული ოცნების” თავმჯდომარემ, ირაკლი კობახიძემ აღნიშნა, რომ სააკაშვილზე ზელენსკის განცხადება მნიშვნელოვანი ვერ იქნება, ხოლო სანდუმ “თავის მე-6 პრეზიდენტს უნდა მიხედოს, რომელიც დღემდე პატიმრობაშია”.

რამდენიმე დღის წინ მიხეილ სააკაშვილმა უკრაინელ ჟურნალისტს, დმიტრი გორდონს წერილი გაუგზავნა, სადაც წერს, რომ ამერიკელი ტოქსიკოლოგების დასკვნის თანახმად, ის ციხეში მოწამლეს და მიზანი მისი სიკვდილი იყო, თუმცა გადარჩა, “ახლა კი სათანადო მკურნალობის გარეშე ლეტალური შედეგი გარდაუვალია.” სწორედ ამ წერილის საპასუხოდ გაავრცელა დმიტრი გორდონმა ვიდეომიმართვა.

24 დეკემბერს სააკაშვილმა რუს უფლებადამცველ მარკ ფეიგინსაც მისწერა წერილი, რომელშიც ის აღნიშნავს, რომ პუტინის ბრძანებით მოკლეს. წერილი, რომელიც სააკაშვილმა რუსულად დაწერა, ფეიგინმა ტვიტერზე გამოაქვეყნა.