პოლონეთის წინადადება იყო გაეგზავნა საბჭოთა დროიდან მის არსენალში შემორჩენილი ავიაგამანადგურებლები – მიგ-29 გერმანიაში, რამშტაინის სამხედრო ბაზაზე, ამერიკელების განკარგულებაში. გეგმის მიხედვით, შემდეგ, ამ მიგ-29-ებს აშშ-ი უკრაინას გაუგზავნიდა.
თუმცა, შეერთებულმა შტატებმა უარყო პოლონეთის ეს შეთავაზება. პენტაგონის წარმომადგენლის თქმით, ეს “ცუდი იდეაა” და ნატოს “სერიოზულ შეშფოთებას იწვევს”.
ომის დაწყებისთანავე, ვოლოდიმირ ზელენსკი ითხოვს უკრაინის თავზე ცის დახურვას, რასაც დასავლეთი უცვლელად პასუხობს: არა. უკრაინის ტერიტორიის ფრენისთვის აკრძალულ ზონად გამოცხადება, რეალურად ნიშნავს ნატოს მიერ რუსეთის წინააღმდეგ ომის გამოცხადებას. ეს კი არავის უნდა.
სავარაუდოდ, ეს კარგად ესმით კიევშიც, რადგან ზელენსკის განცხადებებს ცის დახურვის შესახებ მეორე ნაწილიც ჰქონდა: თუ ცას ვერ დახურავთ, მოგვეცით მისი დაცვის საშუალება.
საუბარი იყო სწორედ საბჭოთა წარმოების რეაქტიულ თვითმფრინავებზე – მიგ-29-ებზე. ეს თვითმფრინავები დღემდე არის პოლონეთის, სლოვაკეთის და ბულგარეთის საბრძოლო არსენალში.
ეს მანქანები საბჭოთა დროის შემდეგ მნიშვნელოვნად გააუმჯობესეს. უკრაინისთვის მათი უპირატესობა იმაშია, რომ უკრაინელმა მფრინავებმა მათი მართვა იციან და გადამზადება არ დასჭირდებათ. მაგალითად, ამერიკული ავიაგამანადგურებლების, F-16-ების უკრაინისთვის გადაცემის შემთხვევაში, უკრაინელ პილოტებს გადამზადება დასჭირდებათ.
მიგ-29-ები, რომლებზეც იყო საუბარი, უკრაინის ცას ბოლომდე ვერ დაიცავდა (ევროპის მასშტაბით, თანხმობის შემთხვევაში, 70 ცალის მოგროვება შეიძლებოდა), თუმცა დიდი შეღავათი იქნებოდა უკრაინისთვის რუსეთთან საჰაერო ბრძოლებში, ამბობენ სამხედრო ექსპერტები BBC-ისთან საუბარში.
