მარიუპოლის უკანასკნელი მცველები: "აზოვის" პოლკი არ ნებდება და დახმარების იმედი აქვს
ბრძოლა, რომელსაც რუსული ჯარებით გარშემორტყმული, უკრაინული “აზოვის” პოლკი, სრულად დაპყრობილ მარიუპოლში, ფოლადის ქარხანა “აზოვსტალში” აწარმოებს, კრიტიკულ ფაზაში გადავიდა.
ორი ათასამდე მშვიდობიანმა მოქალაქემ, რომლებიც ორი თვის განმავლობაში “აზოვსტალში” ბუნკერებში იმალებოდნენ, ქარხნიდან გამოსვლა მოახერხა. მაგრამ მეომრები მძევლად რჩებიან და ბოლო ბრძოლისთვის ემზადებიან. ისინი უარს აცხადებენ დანებებაზე და ჯერ კიდევ აქვთ იმედი, რომ მათ გადარჩენას შეძლებენ.
8 მაისს, მარიუპოლის უკანასკნელმა მცველებმა, Zoom-ის საშუალებით, უნიკალური, ორსაათიანი ბრიფინგი გამართეს. მათ შორის, მათ ხელისუფლებას მოუწოდეს მეტი გააკეთონ მათი გადასარჩენად.
ბრიფინგის საკვანძო საკითხები და უკრაინის პრეზიდენტის ვოლოდიმერ ზელენსკისა და მისი მრჩევლის ალექსი არესტოვიჩის შემდგომი განცხადებები.
რა თქვეს “აზოვის” მცველებმა?
ოფიცერი ილია სამოილენკო:
● “აზოვსტალი” უწყვეტად იბომბება რუსული ჯარის მხრიდან, რომელიც ცდილობს, დაიკავოს ბოლო დასაყრდენი ამ მნიშვნელოვან საპორტო ქალაქში, აზოვის ზღვაზე. რუსები თავს ესხმიან არტილერიით, ტანკებით, ნაღმმტყორცნებით, ქვეითებითა და სნაიპერებით.
● გასულ ღამეს მტრის 25-ზე მეტი საჰაერო გაფრენა განხორციელდა, მათ შორის, სამი სტრატეგიული ბომბდამშენით. რუსული ჯარები “აზოვის” პოლკის პოზიციების მახლობლად, გალავანთან მივიდნენ.
● მებრძოლებს მარაგები შეზღუდული აქვთ, მაგრამ ჯერ აქვთ საკმარისი წყალი და საბრძოლო მასალა იმისთვის, რომ თავდასხმას გაუძლონ.
● ბოლო სამი დღის განმავლობაში ქარხნიდან მშვიდობიანი მოსახლეობის ევაკუაცია მოხერხდა. თუმცა, ზოგი ადამიანი შესაძლოა კვლავ იყოს ჩარჩენილი [ნანგრევების ქვეშ].
● მარიუპოლში სულ მცირე 25 ათასი ადამიანი დაიღუპა, უმეტესობა მშვიდობიანი მოქალაქე იყო.
● უკრაინის მთავრობამ ვერ მოამზადა ქალაქის თავდაცვისთვის.
● “აზოვის” მებრძოლებმა 2500 რუსი მოკლეს და 5000 დაჭრეს.
● ასევე, განადგურდა მტრის 60-ზე მეტი ტანკი. ეს არის პოლკის გამოთვლები 24 თებერვლიდან 15 აპრილამდე პერიოდისთვის.
● “აზოვსტალის” მცველები ვერ დანებდებიან, რადგან ეს იქნება “საჩუქარი” რუსებისა და რუსული პროპაგანდისთვის. რუსი სამხედროები უბრალოდ დახოცავენ “აზოვის” პოლკის წევრებს.
● ქარხნის დატოვება შეუძლებელია. ილია სამოილენკო იტყობინება, რომ 36-ე საზღვაო ქვეითი ბრიგადის მეთაურმა ვლადიმერ ბარანიუკმა უარი თქვა ბრძანების შესრულებაზე და მცირე ჯგუფით ქალაქიდან გაქცევა სცადა, მაგრამ რუსებს ტყვედ ჩაუვარდა. მან ბარანიუკის გადაწყვეტილებას სიმხდალე უწოდა.
● “აზოვსტალის” მებრძოლებს თავდაცვის ბრძანება აქვთ. “მებრძოლები იდგებიან იმდენხანს, რამდენიც საჭირო იქნება”.
● დამცველთა უმეტესობას აქვს კავშირი ნათესავებთან. ეს მათ შთააგონებს.
● “აზოვის” პოლკი ითხოვს არამხოლოდ ჯარისკაცებისა [რომლებიც აგრძელებენ ქარხნის დაცვას] და დაჭრილების, არამედ, დაღუპული დამცველების ევაკუაციასაც.
● მებრძოლები [უკრაინის] ხელისუფლებისა და მსოფლიოსგან უფრო გადამწყვეტ მოქმედებას ელიან.
აზოვის პოლკის მეთაურის მოადგილე სვიატოსლავ პალამარი:
● „აზოვსტალში” მდგომარეობა კატასტროფულია. დაღუპულთა რაოდენობას არ ვაცხადებ. საუბარია ასობით უკრაინელ ჯარისკაცზე. დაჭრილია 600-მდე ადამიანი.
● მაგრამ ეს მაჩვენებლები ყოველდღიურად იზრდება, ისევე, როგორც დაღუპულთა რაოდენობა. ჩვენ ზუსტად არც კი ვიცით, რამდენი სამხედროს ცხედრის ამოღება ვერ მოვახერხეთ ნანგრევებიდან.
● მიმაჩნია, რომ რუსულ მხარესაც სჭირდება დაღუპული ჯარისკაცების ცხედრების შეგროვება.
● ამისათვის საჭიროა ცეცხლის შეწყვეტა და ორივე მხარის შეთანხმება დაღუპულთა ცხედრების შეგროვებაზე. გარეთ უკვე თბილია. სხეულები გახრწნას იწყებს და ყველაფერს წამლავს“.
მიმართვა მთავრობას:
„ჩვენ ვაჩვენეთ, რას ნიშნავს შეუძლებლის გაკეთება. ახლა თქვენ გააკეთეთ თქვენი საქმე და აჩვენეთ, რას ნიშნავს შეუძლებლის გაკეთება“.
“აზოვის” მეთაურის დენის პროკოპენკოს მეუღლემ მოუწოდა ყველა უკრაინელს შეუერთდნენ ყველა ინიციატივას, რომელმაც შესაძლოა დააჩქაროს ევაკუაცია ან ხელი შეუწყოს ინფორმაციის საჯაროობას მსოფლიოს მასშტაბით. მან თქვა, რომ მისი აზრით უკრაინის ხელისუფლება, არ აკეთებს საკმარისს [მარიუპოლის მცველების] ევაკუაციისთვის.
- “დიახ, რუსეთი დამარცხდება”. ოსი სამხედროების საუბარი ბიბილოვთან
- რიგი ცხედრების ამოსაცნობად. ქალაქი ბუჩა რუსეთის ჯარის გასვლიდან ერთი თვის შემდეგ
- მოსაზრება: ეროვნული სირცხვილის დღე
ზელენსკი: მოლაპარაკებებში ჩართული არიან თურქეთიდან, ისრაელიდან, შვეიცარიიდან, საფრანგეთიდან, გაეროდან, წითელი ჯვრიდან
„ქალაქ მარიუპოლის განბლოკვა სამხედრო გზით შეუძლებელია. დღეს ეს შეუძლებელია. და ჩვენ ამაზე ღიად ვსაუბრობთ. უკრაინას არ აქვს ისეთი მძიმე შეიარაღება, რომ მარიუპოლი სამხედრო გზით განბლოკოს“, – განაცხადა უკრაინის პრეზიდენტმა ვოლოდიმირ ზელენსკიმ 8 მაისს.
„დიპლომატიურმა გზამ მიგვიყვანა იქამდე, რომ ბლოკირებული “აზოვსტალის” ქარხნიდან დღეს ყველა მშვიდობიანი მოქალაქე გაყვანილია. მაგრამ რუს სამხედროებს და რუსეთის ფედერაციის პოლიტიკურ ხელმძღვანელობას არ სურთ ჩვენი სამხედროების გამოშვება.
ამ საკითხში დასახმარებლად მოლაპარაკებებისთვის მოწვეულნი არიან თურქეთიდან, ისრაელიდან და შვეიცარიიდან. გარდა ამისა, ამ საკითხის მოგვარებას ეცადნენ საფრანგეთი, გაერო და წითელი ჯვრის საერთაშორისო კომიტეტის ხელმძღვანელობა.
რუსეთი ცვლის სამხედროებს მხოლოდ მაშინ, თუ ისინი ტყვედ არიან, – ტყვეებში. ეს არის რუსეთის ფედერაციის პასუხი. სხვა პასუხები არ არსებობს“, – განაცხადა ზელენსკიმ.
არესტოვიჩი: “მე მყავს ნათლული მარიუპოლში და ჩემი საუკეთესო მებრძოლი მეგობარი “აზოვსტალში”
უკრაინის პრეზიდენტის მრჩეველმა ალექსეი არესტოვიჩმა, პრეზიდენტისა და უკრაინის შეიარაღებული ძალების სარდლობის კრიტიკოსებს, რომლებიც თვლიან, რომ ხელისუფლება საკმარისს არ აკეთებს “აზოვსტალის” მებრძოლების გადასარჩენად, მკაცრად უპასუხა.
„ყველანაირად გარყვნილები, უსირცხვილოები და არაკეთილსინდისიერები არიან, ვინც დღედაღამ სპეკულირებენ და ამბობენ, რომ არსებობს გამოსავალი,[გათავისუფლებისთვის], უბრალოდ, ხელისუფლებას არ სურს, ყველა ძალისხმევას არ იყენებს ამის გასაკეთებლად. ორი მთავარი სიტყვა, რომელიც მესმის პრეზიდენტის კაბინეტში, არის – “მარიუპოლი” და “აზოვსტალი”.
ვიღაცას ძალიან უნდა, რომ დამნაშავე პრეზიდენტის ოფისი იყოს. ამ ხალხს შევახსენებ, რომ ომი შორს არის დასრულებისგან. მარიუპოლში პატარა ნათლული მყავს, “აზოვსტალში” კი საუკეთესო მებრძოლი მეგობარი, მე მინდა მათი განადგურება?
“აზოვის” პოლკი, რომელიც “აზოვსტალთან” რუსული ჯარის ალყაშია , უკრაინის ხელისუფლებისა და დასავლეთისგან გადარჩენას ელოდება
