ომი უკრაინაში. ძირითადი მოვლენები. განახლებადი ინფორმაცია

გაერო: უკრაინაში დასტურებულად დაღუპულია 596 მშვიდობიანი მოქალაქე, მათ შორის 43 ბავშვი. თუმცა, დარწმუნებით შეიძლება ითქვას, რომ რეალურად მათი რიცხვი ბევრად მეტია.

გაერო ხაზგასმით აღნიშნავს, რომ ეს ის შემთხვევებია, რისი დადასტურებაც მათ მოახერხეს. ანუ, აქ არ არის ალყაშემორტყმულ მარიუპოლში მსხვერპლის რაოდენობა.

მარიუპოლის საკრებულომ კვირას გამოაცხადა 2187 მოქალაქის გარდაცვალების შესახებ და თანაც ხაზგასმით აღნიშნა, რომ მათთვის ყველა შემთხვევა არ არის ცნობილი.

ირპენის დაბომბვის დროს დაიღუპა ამერიკელი ჟურნალისტი და დოკუმენტური კინოს რეჟისორი ბრენტ რენო.  რენო წარსულში New York Times-ის კორესპონდენტი იყო.

პოლონეთის პრეზიდენტმა ანჯეი დუდამ განაცხადა, რომ ნატო გადახედავს თავის პოზიციას უკრაინის კონფლიქტში ჩაურევლობის შესახებ, თუკი რუსეთი ქიმიურ იარაღს გამოიყენებს.

“თუ მკითხავთ, შეუძლია თუ არა პუტინს ქიმიური იარაღის გამოყენება, გიპასუხებთ, რომ ჩემი აზრით, დღეს, როდესაც ის რთულ ვითარებაშია, პუტინს შეუძლია გამოიყენოს ყველაფერი. მან უკვე წააგო ეს ომი პოლიტიკურად და სამხედრო თვალსაზრისით,“- განაცხადა ანჯეი დუდამ BBC-სთან ინტერვიუში.

მასობრივი განადგურების იარაღის გამოყენება შეცვლის თამაშის ყველა წესს, თქვა დუდამ. საფრთხე შეექმნება არა მარტო ევროპას, არამედ მთელ მსოფლიოს და ნატოს მოუწევს პრობლემის გადაწყვეტა”, – ამბობს დუდა.

მანამდე ნატოს გენერალურმა მდივანმა იენს სტოლტენბერგმა განაცხადა, რომ არ გამორიცხავს რუსეთის მხრიდან ქიმიური თავდასხმის შესაძლებლობას.

ბოლო რამდენიმე დღეა მოსკოვი და მისი პროპაგანდისტული მედია ავრცელებს ინფორმაციას, რომ უკრაინაში ფუნქციონირებს აშშ-ის მიერ მართული ლაბორატორიები, სადაც ქიმიურ და ბიოლოგიურ იარაღს აწარმოებენ.
სტოლტენბერგი ამბობს, რომ ეს განცხადებები მიანიშნებს თავად რუსეთის გეგმებზე, გამოიყენოს ასეთი იარაღი.

13 მარტს საჰაერო დარტყმების შედეგად ნიკოლაევში ცხრა ადამიანი დაიღუპა. ამის შესახებ ნიკოლაევის სამხარეო ხელმძღვანელმა ვიტალი კიმმა განაცხადა.

აეროდრომი 25 კილომენტრშია პოლონეთის საზღვართან. მას დღეს 30 ფრთიანი რაკეტა მოხვდა.

უკრაინის თავდაცვის მინისტრმა, ალექსეი რეზნიკოვმა ამ დაბომბვას „ევროკავშირ-ნატოს საზღვართან მშვიდობასა და უსაფრთხოებაზე თავდასხმა” უწოდა.

დაახლოებით 1300 უკრაინელი ჯარისკაცი დაიღუპა უკრაინაში სრულმასშტაბიანი ომის დროს, განაცხადა ზელენსკიმ დღევანდელ ინტერვიუში.

უკრაინის გენერალური პროკურატურის ინფორმაციით კი, უკრაინის ომის 16 დღის განმავლობაში 79 ბავშვი დაიღუპა, ასამდე ბავშვი დაშავდა.

დაიბომბა 280-ზე მეტი სასწავლო დაწესებულება, მათგან 9 მთლიანად განადგურდა.

სააგენტოს ცნობით, უკრაინაში შვიდი მილიონი ბავშვი მოკლებულია სწავლის შესაძლებლობას აქტიური საომარი მოქმედებების გამო.

? უკრაინამ დღეს დაკარგა პატარა ქალაქი ვოლნოვახა, რომელიც დონეცკსა და მარიუპოლს შორის მდებარეობს. ეს კიდევ უფრო აუარესებს მარიუპოლის მდგომარეობას.

? პენტაგონის ცნობით, რუსული ჯარები კიევის ცენტრიდან 15 კილომეტრში არიან განლაგებული. ისინი უკრაინის დედაქალაქისკენ მიიწევენ ჩრდილო-დასავლეთიდან და აღმოსავლეთიდან.

? უკრაინიდან ლტოლვილთა რაოდენობამ 2,5 მილიონ ადამიანს გადააჭარბა.

? გაეროს მონაცემებით 549 მშვიდობიანი მოქალაქე დაიღუპა.

? ომის დაწყებიდან მე-17 დღეს იბომბება მარიუპოლი, ჩერნიგოვი, ნიკოლაევი. კიევის რეგიონში ბრძოლების დროს განადგურდა ვასილკოვის სამხედრო აეროდრომი.

? მარიუპოლში ჰუმანიტარული კატასტროფაა – ხალხი უძლებს ყინვებს ელექტროენერგიის გარეშე, საკვებისა და წყლის ნაკლებობაა.

? გარდა ამისა, სირენები ისმის მთელი ღამის განმავლობაში უკრაინის ბევრ სხვა ქალაქში – ლვოვიდან – დასავლეთით, სუმის ჩრდილო-აღმოსავლეთის რეგიონამდე.

? უკრაინული მხარე აცხადებს, რომ რუსებმა მარიუპოლში დაარტყეს მეჩეთს, სადაც 80 მშვიდობიანი მოქალაქე აფარებდა.

? აშშ-ის პრეზიდენტი ჯო ბაიდენი აცხადებს, რომ მისი ქვეყანა პირდაპირ არ ჩაერევა რუსეთის წინააღმდეგ ომში უკრაინაში, რადგან ეს მესამე მსოფლიო ომს ნიშნავს.

? რუსეთმა გაერო-ს უშიშროების საბჭოს სხდომაზე განაცხადა, რომ აშშ უკრაინაში ბიოლოგიური იარაღს ამზადებს. თუმცა, მტკიცებულებები არ წარმოუდგენია

ინსტაგრამი რუსეთში 14 მარტს 00.00 საათზე დაიბლოკება. ეს გადაწყვეტილება როსკომნადზორმა მიიღო. მანამდე ხალხს მისცეს უფლება ფოტოები ჩამოტვირთონ და შეინახონ.