ომი უკრაინაში. დღე მეცხრე . განახლებადი ინფორმაცია

რუსეთში Twitter-ის დაბლოკვას  როსკომნადზორი  ადასტურებს. ამასთანავე პუტინმა ხელი მოაწერა კანონს ” ფეიქებისთვის” სისხლის სამართლის პასუხისმგებლობის შესახებ, რომელიც დღეს დუმამ მიიღო.

პარლამენტთან შეკრებილებს მიმართა საქართველოს პრეზიდენტმაც.

“მე ვდგავარ იქ, სადაც საქართველო უნდა იდგეს! თქვენ ხართ ის ხალხი, რომელიც წარმოადგენთ დღეს საქართველოს ღირსებას და ამისთვის ძალინ დიდი მადლობა”-ამბობს ზურაბიშვილი

უკრაინის პრეზიდენტი ვოლოდიმირ ზელენსკი ევროპული ქვეყნების ქალაქებს მიმართავს, მათ შორის, თბილისს. ათასობით ადამიანი პარლამენტის შენობასთან უსმენს მის გამოსვლას.

რუსული ჯარები ხუთი დღეა უმოწყალოდ ბომბავდნენ მარიუპოლს, ანადგურებდნენ ინფრასტრუქტურას – ქალაქი სითბოს, წყლისა და ელექტროენერგიის გარეშე დარჩა, საავადმყოფოებში სამასი დაჭრილია, მაგრამ საავადმყოფოებიც იბომბება.

BBC-მ განაცხადა, რომ ის დროებით აჩერებს მუშაობას რუსეთში და იმუშავებს ქვეყნის გარედან.

გუშინ ამ მედიის საიტი როსკომნადზორმა დაბლოკა.

გაერო: უკრაინის 331 მშვიდობიანი მოქალაქე დაიღუპა “სამხედრო ოპერაციაში”.

დაღუპულთა შორის 19 ბავშვია.

დაშავდა 675 მშვიდობიანი ადამიანი

გამომძიებელ ჟურნალისტთა გაერთიანება “აი, ფაქტის” ინფორმაციით, რუსეთისთვის სანქციების დაწესების ფონზე საქართველოში რეგისტრირებული რუსული ბიზნესების რაოდენობა გაზრდილია.

ორგანიზაცია საჯარო რეესტრიდან გამოთხოვილ ინფორმაციაზე დაყრდნობით აცხადებს, რომ მხოლოდ ბოლო ოთხ დღეში საქართველოში ბიზნესსაქმიანობის დაწყება რუსეთის 201-მა მოქალქემ მოისურვა. 1 მარტს იუსტიციის სახლს რეგისტრაციისთვის 43-მა პირმა მიმართა, 2 მარტს 58-მა; 4 მარტს 17:30-მდე კი ბიზნესრეესტრში განაცხადი რუსეთის 100-მა მოქალაქემ შეიტანა.

ამის მიზეზი არის კანონი, რომელიც რუსეთის დუმამ დღეს მიიღო და რომელიც რუსეთის არმიაზე ყალბი ინფორმაციის გავრცელების გამო 15 წელს ითვალისწინებს.

ყალბ ინფორმაციათ კი შეიძლება ჩაითვალოს ნებისმიერი ინფორმაცია, რომელიც არ ემთხვევა კრემლის ოფიციალურ პოზიციას.

„სამხედრო ცენზურა რუსეთში სწრაფად გადავიდა ახალ ფაზაში: პუბლიკაციების დაბლოკვისა და დახურვის საფრთხიდან (თითქმის სრულად განხორციელებული) იგი გადავიდა სისხლისსამართლებრივი დევნის საფრთხეზე როგორც ჟურნალისტების, ისე მოქალაქეების მიმართ, რომლებიც ავრცელებენ რუსეთის თავდაცვის სამინისტროს პრეს-რელიზებისგან განსხვავებულ ინფორმაციას საომარ მოქმედებებზე. თეჭვგარეშეა, რომ ეს საფრთხე განხორციელდება“, – აღნიშნავს ნოვაია გაზეტა.

__

“ნოვაია გაზეტა” ერთ-ერთი ყველაზე კრიტიკული და უკომპრომისო ჟურნალისტებისგან შემდგარი გუნდია რუსულ მედიაში.

ეს გამოცემა აშუქებდა ჩეჩნეთის ომის, გლობალური და რუსული კორუფციის, ადამიანების დევნისა და უფლებების დარღვევის თემებს. გამოცემის ჟურნალისტები 60-ზე მეტი პროფესიული პრემიის ლაურიატები გახდნენ, პულიცერის პრემიის ჩათვლით.

გაზეთის ექვსი თანამშრომელი მოკლეს პროფესიული საქმიანობის გამო. ესენი არიან: იგორ დომნიკოვი (2000 წ.), იური შჩეკოჩიხინი (2003 წ.), ანა პოლიტკოვსკაია (2006 წ.), ანასტასია ბაბუროვა (2009 წ.), ასევე, რედაქციასთან ერთად მომუშავე ადვოკატი სტანისლავ მარკელოვი (2009 წ.) და უფლებადამცველი ნატალია ესტემიროვა (2009 წ.).

გაზეთის მთავარი რედაქტორი, დმიტრი მურატოვი კი, გასულ წელს ნობელის პრემიის ლაურეატი გახდა მსვიდობის დარგში.

Strana-ს მკითხველები, რომლებიც ახლა სადგურზე იმყოფებიან, აცხადებენ, რომ არავინ არეგულირებს, ვინ ჯდება მატარებელში. მამაკაცებს ვაგონში უშვებენ, ბევრი ქალი და ბავშვი კი, გარეთ რჩება.

მკითხველების მიერ Strana-სთვის გაგზავნილ ვიდეოში ჩანს, რომ მატარებელი გადაჭედილია, ისმის გინება და ყვირილი. ადგილები ყველასთვის საკმარისი არ არის.

როდის ჩამოვა შემდეგი საევაკუაციო მატარებელი და სად წავა, სადგურში ვერ ამბობენ.

საუბარია რუსული სამხედრო ავიაციისთვის უკრაინის თავზე ცის ჩაკეტვაზე (სამოქალაქო თვითმფრინავებისთვის უკრაინის ცა კაი ხანია ჩაიკეტა).

თავად უკრაინის საჰაერო ძალები ცდილობენ რუსული თვითმფრინავების ჩამოგდებას, თუმცა ეს არ არის საკმარისი – რუსეთი აგრძელებს უკრაინის ქალაქების დაბომბვას, რა დროსაც იღუპება მშვიდობიანი მოსახლეობა, ამიტომ უკრაინა ცის დაკეტვას ნატოს სთხოვს.

როდესაც ცა არასაფრენ ზონად გამოცხადდება, ის უნდა იყოს დაცული სამხედრო აქტივობებით – მაგალითად, პატრულირება სამხედრო თვითმფრინავით ან დაცვა საჰაერო თავდაცვის სისტემებით ან მიწა-ცა სარაკეტო სისტემებით.

სამხედრო თვითმფრინავებს, რომლებიც დაარღვევენ აკრძალულ ზონას – აგდებენ, თავად საჰაერო სივრცეს კი აქტიურად აკონტროლებენ რადარიდან და კოსმოსიდან.

ანუ თუკი ნატო უკრაინის თავზე არასაფრენ ზონას გამოაცხადებს, ეს ნიშნავს, რომ ნატოს სამხედრო ძალებს მოუწევთ პატრულირება უკრაინის თავზე საჰაერო სივრცეში და მოუწევთ ჩამოაგდონ რუსული თვითმფრინავები და ვერტმფრენები.

ეს კი ნიშნავს ნატოს და ნატოს ქვეყნების პირდაპირ ჩართვას კონფლიქტში და რუსეთთან პირდაპირ ომს, რაც არც ერთი ქვეყნის გეგმებში არ შედის

უკრაინა და რუსეთი შეთანხმდნენ დახურულ კარს მიღმა მოლაპარაკებებზე, რათა „რაღაც მაინც დაიძრას ადგილიდან“, თქვა უკრაინის დელეგაციის წევრმა, ზელენსკის ოფისის მრჩეველმა პოდოლიაკმა:

“რუსეთის პოზიცია მოლაპარაკებებში მკაცრია, ისევე როგორც უკრაინის პოზიცია, ამიტომ მოლაპარაკებები რთული იქნება, მაგრამ ისინი გაგრძელდება”.

ნატოს გენერალურმა მდივანმა სტოლტენბერგმა ნათლად მიანიშნა, რომ ნატო არ აპირებს შემოიღოს ფრენის აკრძალულ ზონა უკრაინის თავზე.

“ნატოს საგარეო საქმეთა სამინისტროს სხდომაზე საუბარი იყო ფრენის აკრძალული ზონის შესახებ, მაგრამ ალიანსს მიაჩნია, რომ ნატოს თვითმფრინავები და ჯარები არ უნდა იყვნენ უკრაინაში“, – განაცხადა ნატოს გენერალურმა მდივანმა.

მას შემდეგ, რაც გავრცელდა ინფორმაცია რუსების მიერ ზაპორიჟიას ატომური ელექტროსადგურის დაკავებაზე, ჩეხეთის, ბულგარეთისა და პოლონეთის მაცხოვრებლებმა აფთიაქებში დაიწყეს კალიუმის იოდიდისა და იოდის მაღალი შემცველობის სხვა პრეპარატების მასიურად შეძენა, იტყობინება Reuters.

ეს პრეპარატები გამოიყენება რადიაციული დაბინძურების შემთხვევაში, ორგანიზმის დასხივების თავიდან ასაცილებლად.

ჟურნალისტების თქმით, ბოლო კვირაში ბულგარეთში იმდენივე იოდის პრეპარატი გაიყიდა, რამდენიც ჩვეულებრივ მთელი წლის განმავლობაში იყიდება. იგივე ხდება პოლონეთსა და ჩეხეთში.

გაეროს ადამიანის უფლებათა საბჭომ ხმათა უმრავლესობით დაუჭირა მხარი რეზოლუციას, რომელიც ითვალისწინებს დამოუკიდებელი კომისიის შექმნას უკრაინაში ადამიანის უფლებების დარღვევის გამოსაძიებლად, იუწყება Reuters.

დღეს დილით რუსული ბაზრიდან გასვლის შესახებ განაცხადეს:

Porsche ავტომობილების მწარმოებელი

Michelin გასტრონომიული გზამკვლევი

Swarovski საიუველირო კომპანია

Hermes ლუქს პროდუქტების ბრენდი

Panasonic იაპონური კორპორაცია

პუტინმა ლუკაშენკოსთან საუბარში გაიმეორა, გუშინ მაკრონისთვის ნათქვამი განცხადება, რომ ყველაფერი გეგმის თანახმად ვითარდება და რომ “სამხედრო სპეცოპერაციის დასახული ამოცანები სრულად შესრულდება”.

ლუკაშენკომ, თავის მხრივ, “მხარდაჭერა გამოხატა რუსეთის ქმედებების მიმართ”.

„სიტუაცია კონტროლს ექვემდებარება. თუმცა, გუშინ მტერმა შეავსო რეზერვები და დაიწყო მოძრაობა გარკვეული მიმართულებებით”- განაცხადა შეიარაღებული ძალების მეთაურის მრჩევლმა არესტოვიჩმა ბრიფინგზე.

➖ ყველაზე დიდ წარმატებას რუსებმა ქალაქ ენერგოდარში მიაღწიეს. ნაწილობრივ დაამყარა კონტროლი ზაპოროჟიეს ატომურ ელექტროსადგურზე.

➖ მან ასევე მოახერხა ქალაქ ვოზნესენსკთან წინსვლა. ეს არის მიმართულება ნიკოლაევიდან კრივი როგამდე. ახლა აქ მიდის ბრძოლა. უშუალოდ ნიკოლაევში რუსული ჯარი არ შესულა.

➖ კიდევ ერთი ცხელი წერტილი – კიევის ჩრდილო-დასავლეთი. აქაც ახლა ბრძოლაა.

➖ქალაქ ხარკოვი, ქალაქი ოხტირკა რუსული დარტყმების ქვეშაა, მაგრამ თავდაცვა გრძელდება. არესტოვიჩი ამბობს რომ ხარკოვში რუსებს განსაკუთრებით გაუჭირდათ – დიდი ზარალი ნახეს, მარაგები ამოეწურათ და დამატებითი რეზერვები სასჭირდათ.

➖ჩერნიგოვმა გაუძლო ძლიერ საჰაერო დარტყმას, ქალაქი არ დაცემულა და რუსები ამ მიმართულებით არ მოძრაობენ.

➖ მარიუპოლში მძიმე ვითარებაა – ქალაქი ნაწილობრივ ალყაშია. ქალაქში საკვების, მედიკამენტების პრობლემაა, ჰუმანიტარული ვითარება დაძაბულია, თუმცა ხელისუფლება ცდილობს რუსებს ჰუმანიტარული დერეფნები გააკეთებინოს და ხალხი გაიყვანოს.

➖ ოდესაში ამ ეტაპზე უშუალო საფრთხე არ არსებობს.

ზაპოროჟიეს რეგიონული სამხედრო ადმინისტრაცია ოფიციალურად ადასტურებს, რომ რუსეთის არმიამ მელიტოპოლში სატელევიზიო ანძა დაიკავა, იქ თავისი აღჭურვილობა დაამონტაჟა და რუსული ტელეარხების მაუწყებლობა დაიწყო. (unian)

როსკომნადზორმა დაბლოკა ამერიკის ხმის, BBC, Deutsche Welle, Meduza, რადიო თავისუფლების ვებსაიტები “უკრაინაში ყალბების გავრცელების გამო”. (რია ნოვოსტი)

პრეზიდენტი სალომე ზურაბიშვილი ხვალ, 5 მარტს, პარლამენტში წლიური მოხსენებით უნდა გამოსულიყო, თუმცა “ქართულმა ოცნებამ” პრეზიდენტის მოსმენას მხარი არ დაუჭირა.

პარლამენტის ბიუროს სხდომაზე ფრაქცია ქართული ოცნების თავმჯდომარემ, მამუკა მდინარაძემ პრეზიდენტის მოსმენის გადადების ერთ-ერთ მიზეზად დეპუტატებისა და კომიტეტის თავმჯდომარეების მივლინებები დაასახელა. (ფორმულა)

ზელენსკის ახალი განცხადება:

“ჩვენ გადავიტანეთ ღამე, რომელსაც შეეძლო შეეჩერებინა უკრაინის და ევროპის ისტორია. რუსული ჯარები თავს დაესხნენ ზაპორიჟიას ატომურ სადგურს”

ბოლო წლებში (იმის გამოც რომ დამოუკიდებელი ტელევიზიები ქვეყანაში ფაქტობრივად არ არსებობდა) ბევრი რუსი ჟურნალისტი და ბლოგერი გადავიდა იუთუბზე. მათ იქ მრავალმილიონი აუდიტორია ჰყავდათ და შესაბამისად, რეკლამიდანაც მილიონობით რუბლი შემოსავალი ჰქონდათ.

,,ისე აღარ ჩანს, რომ ის მხოლოდ რამდენიმე რეგიონის ანექსიას ისახავს მიზნად. ახლა, როგორც ჩანს, ის მთელს ქვეყანას ანადგურებს. ეს რაღაცნაირად მასობრივი განადგურების ომია.

დღეს მოვისმინე განცხადებები, რომ ეს ყველაფერი გეგმის მიხედვით მიდის. დარწმუნებული არ ვარ, რომ ეს გეგმის მიხედვითაა. ის არ გეგმავდა უკრაინის მიერ გაწეულ წინააღმდეგობას. მას ჰქონდა მასობრივი თავდასხმა, რომელიც ძალიან ფსიქოლოგიური იყო მისი ძალებით, რომლებიც გამოიყენეს ყველა მხრიდან. და ეს არ მუშაობდა. რა თქმა უნდა, სამხედრო თვალსაზრისით მას აქვს უპირატესობა, რომელიც გამოვლინდება, მაგრამ უკრაინელი ხალხისა და ლიდერების წინააღმდეგობა მართლაც ძალიან აღმაფრთოვანებელია”, – განაცხადა ზურაბიშვილმა. (თარგმანი ipn)

ამჟამად ასეთი საფრხე არ არსებობს. რადიაციის დონე ნორმის ფარგლებშია.

უკრაინა იტყობინება, რომ რუსეთის ჯარებმა დაიკავეს ზაპოროჟიეს ატომური ელექტროსადგური, სადაც ღამით ხანძარი გაჩნდა. (reuters)

კანონი დუმამ ერთხმად მიიღო – წინააღმდეგი არავინ არ წასულა. ძალაში, შესაძლოა, შევიდეს ხვალიდან.

გარდა იმისა, რომ 15 წლამდე თავისუფლების აღკვეთაა რუსული არმიის შესახებ “ფეიკების” გავრცელებაზე, აღნიშნული კანონი ითვალისწინებს ასევე 5 წლამდე თავისუფლების აღკვეთას ისეთი მოწოდებებისთვის, “რომლებიც ეწინააღმდეგება რუსული ჯარების გამოყენებას რუსეთის ინტერესების დასაცავად“.

მარტივად რომ ვთქვათ, ყველა, ვინც ომის დასრულებას და ჯარების გაყვანას მოითხოვს, შეიძლება დააკავონ ამ კანონის თანახმად – სოციალურ ქსელში გაკეთებული წარწერა “არა ომს” რუსეთში დასჯადი ხდება.

The Times-ი იუწყება, რომ გასული კვირის განმავლობაში პრეზიდენტ ზელენსკზე ტავდასხმის და მისი მოკვლის სულ მცირე სამი მცდელობა ჩაიშალა.

უკრაინის პრეზიდენტის ლიკვიდაციისთვის გაგზავნეს ორი სხვადახვა ჯგუფი – დაქირავებულები მებრძოლების კრემლის მიერ მართული კერძო კომპანიიდაან – ვაგნერის ჯგუფიდან და ასევე ჩეჩნეთის სპეცრაზმიდან.

ყოველ ჯერზე მკვლელობის მცდელობები აღკვეთილი იყო რუსეთის ფედერალური უსაფრთხოების სამსახურის (ФСБ)
მიერ, რომლის შიგნითაც არიან ძალები, რომლებიც ეწინააღმდეგებიან უკრაინასთან ომს, წერს ბრიტანული გამოცემა საკუთარ წყაროზე დაყრდნობით.

წყარო უყვება თამისს, რომ “ვაგნერის” დაქირავებულმა რაზმმა კიევში დიდი მსხვერპლი განიცადა. ისინი შეშფოთებულნი იყვნენ, თუ რამდენად ზუსტად განჭვრიტეს უკრაინელებმა მათი ქმედებები.

ჯგუფთან დაახლოებული წყარო ამბობს, რომ ზელენსკის უსაფრთხოების სამსახურის ინფორმირებულობა მათთვის “მოულოდნელი” გამოდგა.

ასევე შაბათს, კიევში ლიკვიდირებულ იქნა ჩეჩენ დაქირავებულთა რაზმი, რომელიც ასევე ზელენსკის მკვლელობას გეგმავდა.

საგანგებო მდგომარეობა. 30 დღე გაგრძელდება, შემდგომი გახანგრძლივების შესაძლებლობით. ქვეყნის მთავრობამ ხაზგასმით აღნიშნა, რომ ეს “არანაირად არ იმოქმედებს ჩეხეთის მოქალაქეებზე”.

ატომური ელექტროსადგურის ძირითადი აღჭურვილობა და ელექტროსადგურები ხელუხლებელი რჩება, აცხადებს ატომური ენერგიის საერთაშორისო სააგენტო.

ხანძრის დროს #1 ენერგობლოკის შენობის დეტალები დაზიანდა, რაც მის მუშაობას საფრთხეს არ უქმნის.

მოკლედ გიყვებით ღამეზე, როდესაც არც ერთ ევროპელ ლიდერს არ ეძინა:

ქალაქ ენერგოდართან, სადაც ატომური სადგური მდებარეობს, მთელი დღე ბრძოლა იყო, თუმცა ღამე რუსმა სამხედროებმა შეძლეს ქალაქში შესვლა.

გვიან საღამოს ქალაქის მერი იტყობინებოდა, რომ ისინი ატომური ელექტროსადგურის შენობას უახლოვებოდნენ და მისი მიმართულებით ისროდნენ.

ღამე ზაპოროჟიეს აეს-ის თანამშრომელმა ვიდეო მიმართვა ჩაწერა, სადაც შველს ითხოვდა – ატომური სადგურის დაცვას.

ღამის 03:40- სთვის ენერგოდარის მერმა თქვა, რომ აეს-ის შენობას ხანძარი გაუჩნდა.

„თუ აფეთქდება, ჩერნობილზე ათჯერ დიდი კატასტროფა იქნება,” – საგანგენო განცხადება გააკეთა საგარეო უწყების ხელმძღვანელმა კულებამ და ხანძრის ჩასაქრობად მეხანძრეების აეს-ის შენობასთან მიშვება ითხოვა.

ზელენსკი ღამე ტელეფონით დაუკავშირდა მსოფლიო ლიდერებს .

ორი საათის განმავლობაში იგი ესაუბრა ბაიდენს, შოლცს, ევროპული საბჭოს პრეზიდენტს შარლ მიშელს, ბორის ჯონსონს, პოლონეთის პრეზიდენტს ანჯეი დუდას და ატომური ენერგიის საერთაშორისო სააგენტოს ხელმძღვანელს რაფაელ გროსს.

უკრაინელმა მეხანძრეებმა ჩააქრეს ცეცხლი, თუმცა ენერგოდარი კვლავ რჩება ყველაზე ცხელ წერტილად, საითკენაც მთელი მსოფლიოს ყურადღებაა მიმართული.

▪️უკრაინისა და საქართველოსთვის ნათქვამი უარი ნატოში გაწევრიანებაზე სწორი გადაწყვეტილება იყო. ეს საკითხი არ იყო და არც ახლა არის დღის წესრიგში. ასევე არ იყო დღის წესრიგში უკრაინაში რაკეტების განლაგების გეგმა.

▪️გერმანიის გადაწყვეტილება უკრაინაში იარაღის გაგზავნის თაობაზე სწორი იყო. კანცლერი არ მიიჩნევს, რომ გერმანელები უკრაინელებს დაგვიანებით ან არასაკმარისად დაეხმარნენ;

▪️გერმანიამ უკვე დაიწყო გაზის ყიდვა რუსეთის გვერდის ავლით. თუმცა, ამ დრომდე აგრძელებს რუსეთისგან გაზის, ქვანახშირისა და ნავთობის მიღებას;

▪️ევროკავშირში უკრაინის, საქართველოსა და მოლდოვას გაწევრიანების შესახებ: ეს არ არის ის საკითხი, რაზეც ახლა ვმსჯელობთ. ჯერ აუცილებელია კონფლიქტის შეჩერება;

▪️კანცლერის თქმით, იგი არ შეწყვეტს კონტაქტებს არც ზელენსკისთან და არც პუტინთან.

3 მარტის Live.ომი უკრაინაში. დღე მერვე.

2 მარტის Live.ომი უკრაინაში. დღე მეშვიდე.

1 მარტის Live. უკრაინაში რუსეთის წინააღმდეგ ბრძოლის მეექვსე დღე.

28 თებერვლის  Live .უკრაინაში რუსეთის წინააღმდეგ ბრძოლა გრძელდება. დღე მეხუთე.

27 თებერვლის  Live. რუსეთი უკრაინაში შეიჭრა.  ომის მეოთხე დღე 

26 თებერვლის  Live.რუსეთი უკრაინაში შეიჭრა.  ომის მესამე დღე 

25 თებერვლის  Live. რუსეთი უკრაინაში შეიჭრა ომის მეორე დღე

24 თებერვლის  Live. რუსეთი უკრაინაში შეიჭრა ომის პირველი დღე