"2025 უნდა იყოს ლიბერალური ფაშიზმისგან გათავისუფლების წელი" - კიდევ რა თქვა პრემიერმა მთავრობის სხდომაზე
ლიბერალური ფაშიზმი – ირაკლი კობახიძე
საქართველოს პრემიერმინისტრმა ირაკლი კობახიძემ მთავრობის სხდომაზე განაცხადა, რომ 2025 წელი უნდა იყოს “ლიბერალური ფაშიზმისგან გათავისუფლების წელი” და ხელისუფლება ამისთვის ყველაფერს გააკეთებს.
ასევე, ირაკლი კობახიძე აშშ-ისა და ევროკავშირის გადაწყვეტილებებს თავდაცვის სფეროში თანხების გამოყოფის შეჩერებასა და წვრთნების გადადებაზე “სამწუხაროს” უწოდებს და განმარტავს, რომ ასეთი გადაწყვეტილებები არის კონტრპროდუქტიული.
რა თქვა საქართველოს პრემიერმინისტრმა:
“ლიბერალური ფაშიზმის” შესახებ
2024 წელი იქნება ლიბერალური ფაშიზმის დამარცხების წელიწადი. 26 ოქტომბერს დამარცხდება ლიბერალური ფაშიზმი საქართველოში, ხოლო 2025 წელი უნდა იყოს ლიბერალური ფაშიზმისგან ქართული საზოგადოების, ქართული სახელმწიფოს, ქართული პოლიტიკის სრულად გათავისუფლების წელიწადი.
ამისათვის ყველანაირი რესურსი არსებობს და მე დარწმუნებული ვარ, რომ მომავალ წელს, ჩვენი პოლიტიკა, ჩვენი საზოგადოება იქნება სრულად თავისუფალი ლიბერალური ფაშიზმისგან, რისთვისაც ჩვენ გავაკეთებთ უკლებლივ ყველაფერს.”
აშშ-სა და EU-ის გადაწყვეტილების შესახებ
“მინდა გამოვეხმაურო ამერიკის შეერთებული შტატების და ევროკავშირის გადაწყვეტილებას თავდაცვის სფეროში თანხების გამოყოფის შეჩერების თაობაზე. ეს გადაწყვეტილება არის სამწუხარო, რაც უკვე აღვნიშნე. სამწუხაროა იმდენად, რამდენადაც ის არ პასუხობს ჩვენს მოლოდინს ურთიერთობების გადატვირთვასთან დაკავშირებით.
კიდევ მინდა აღვნიშნო, რომ გასული 4 წლის პოლიტიკური მოვლენების ფონზე ამ ურთიერთობებს ნამდვილად სჭირდება გადატვირთვა – ამისთვის ქართული მხარე, ჩვენი ხელისუფლება, ჩვენი სახელმწიფო არის თავიდან ბოლომდე მზად და ვართ შემხვედრი ნაბიჯების მოლოდინში.
რა თქმა უნდა, ასეთი გადაწყვეტილებები არის კონტრპროდუქტიული ამ თვალსაზრისით, თუმცა მე კვლავაც ვიტოვებ იმედს, რომ მომავალში გადაიდგმება პრაგმატული, რაციონალური, სწორი, სამართლიანი ნაბიჯები და სწორედ ასეთი ნაბიჯები შეუწყობს ხელს ურთიერთობების გადატვირთვას აშშ-სა და საქართველოს შორის. ჩვენ ვართ ამისათვის თავიდან ბოლომდე მზად.”
მიმდინარე წლის 7 ივლისს ცნობილი გახდა, რომ ამერიკის შეერთებულმა შტატებმა განუსაზღვრელი ვადით გადადო ამერიკა-საქართველოს ერთობლივი სამხედრო სწავლება “ღირსეული პარტნიორი”, რომელიც საქართველოში 2016 წლიდან ტარდებოდა. წელს სამხედრო წვრთნა 25 ივლისი-6 აგვისტოს პერიოდში იყო დაგეგმილი.
საქართველოს სამხედრო დახმარება გაუყინა ევროკავშირმაც.
საქართველოში ევროკავშირის ელჩის, პაველ ჰერჩინსკის განცხადებით, ევროკავშირმა გაყინა 30 მილიონი ევროს დახმარება, რომლის გადმორიცხვა ევროპული სამშვიდობო ფონდიდან (EPF) იგეგმებოდა საქართველოს თავდაცვის ძალებისთვის. პაველ ჰერჩინსკი ამბობს, რომ სიტუაციის შემდგომი გაუარესების შემთხვევაში განიხილება სხვა ზომების მიღებაც.
“მადლობა ნათია თურნავას, უზრუნველყო ლარის სტაბილურობა“
“როგორც მოგეხსენებათ, ჩვენ გვქონდა მოკლევადიანი რყევა გარკვეული პერიოდის განმავლობაში, რაზეც ჩვენი ოპოზიცია დიდ იმედებს ამყარებდა, თუმცა, სწრაფი ეკონომიკური ზრდის და ეფექტიანი მართვის წყალობით ლარის კურსი ძალიან მალე დაუბრუნდა პრაქტიკულად პირვანდელ ნიშნულს. ამისთვის მადლობა მინდა გადავუხადო განსაკუთრებით ეროვნულ ბანკს, პირადად ნათია თურნავას, რომელმაც ეფექტიანად მართა ეს პროცესი და საბოლოო ჯამში უზრუნველყო ეროვნული ვალუტის სტაბილურობა
ყველას გახსოვთ, როგორ ცდილობდნენ თავის დროზე ოპოზიცია და მათი მფარველები, მეგობრები საქართველოს ეროვნული ბანკის დაკომპლექტებას საკუთარი კადრებით, არც მინდა წარმოვიდგინო, რა მოხდებოდა იმ შემთხვევაში თუ დღეს ეროვნული ბანკი იქნებოდა დაკომპლექტებული სწორედ ოპოზიციის კადრებით, ჩვენ გვახსოვს ასეთი პროცესები წინა წლებიდან და, რა თქმა უნდა, ამის გამეორებას ვერ დავუშვებდით.
გვაქვს სწრაფი ეკონომიკური ზრდა, წინასწარი მონაცემებით ივნისში ასევე დაფიქსირდება ზრდის მაღალი მაჩვენებელი, გვაქვს ძალიან კარგი ტენდენციები, ველოდებით კარგ ტურისტულ სეზონს. არსებული მონაცემებიც, პირველი ორი კვარტლის მონაცემები არის ძალიან კარგი და დამაიმედებელი.
ასეთ პირობები გვაქვს ყველანაირი წინაპირობა იმისთვის, რომ წელს შარშანდელზე უკეთესი ეკონომიკური მაჩვენებლები დაფიქსირდეს.”
“ბიუჯეტი ₾519 მილიონით იზრდება”
“მთლიანობაში 519 მილიონი ლარით შეგვიძლია გავზარდოთ წლევანდელი ბიუჯეტი და უკვე გვქონდა მსჯელობა ამ თანხის სავარაუდო განაწილებასთან დაკავშირებით. ვფიქრობთ, ეს თანხები განაწილდება შემდეგი სახით:
- 115 მილიონი ლარით გაიზრდება ჯანდაცვის სამინისტროს ბიუჯეტი
- 100 მილიონი ლარით თავდაცვის ბიუჯეტი
- 80 მილიონი ლარით განათლების სამინისტროს ბიუჯეტი
- 33 მილიონი ლარით კულტურის და სპორტის სამინისტროს ბიუჯეტი
- 10-10 მილიონი ლარი გადაეცემა შსს-ს და რეგიონული განვითარების სამინისტროებს
- 6 მილიონი ლარით გაიზრდება საგარეო საქმეთა სამინისტროს ბიუჯეტი
- 3 მილიონი ლარი გადაეცემა ცესკოს
- 60 მილიონი დაემატება სტიქიის სალიკვიდაციო ღონისძიებების სამუშაოებს
- 102 მილიონი გადაეცემა მუნიციპალიტეტებს”
გვაქვს ძალიან კარგი ტენდენციები, ველოდებით კარგ ტურისტულ სეზონს. არსებული მონაცემებიც, პირველი ორი კვარტლის მონაცემები არის ძალიან კარგი და დამაიმედებელი. ასეთ პირობებში გვაქვს ყველანაირი წინაპირობა იმისთვის, რომ წელს შარშანდელზე უკეთესი ეკონომიკური მაჩვენებლები დაფიქსირდეს.”
