ლაგოდეხში, ექსკურსიის დროს გარდაცვლილი 16 წლის სოფიო ნიკოლეიშვილის მასწავლებლებს ბრალი წაუყენეს

საქართველოს პროკურატურამ კერძო სკოლა “ალბიონის” 2 მასწავლებელს ერთი წლის წინ, ლაგოდეხის ნაკრძალში მოწყობილი სასკოლო ექსკურსიის დროს გამოჩენილი გულგრილობისთვის, რის გამოც 16 წლის სოფიო ნიკოლეიშვილი დაიღუპა, ბრალი წაუყენა. 

2019 წლის 26 მაისს „ალბიონის“ მოსწავლეები ლაგოდეხის ნაკრძალში წაიყვანეს. ექსკურსიაზე მოსწავლეები აღმზრდელთან და პედაგოგებთან ერთად იმყოფებოდნენ.

როგორც პროკურატურაში აცხადებენ, ნაკრძალში ჩასვლისას პედაგოგებისთვის ცნობილი გახდა, რომ წვიმების გამო მდინარე ადიდებული იყო და  ჩანჩქერზე ასვლა სახიფათო იყო. 

პედაგოგებმა იცოდნენ, რომ სოფიო ნიკოლეიშვილი ჩანჩქერში საბანაოდ შესვლას აპირებდა.

მიუხედავად ამისა, აღმზრდელმა გულგრილობა გამოიჩინა და მოსწავლეებს ნება დართო, რომ ჩანჩქერისკენ წასულიყვნენ, თავად კი ჩანჩქერზე არ ავიდა. 

პედაგოგმა კი, ნაკრძალის რეინჯერის უშუალო გაფრთხილების მიუხედავად, რომ ჩანჩქერზე ასვლა და იქ ბანაობა უსაფრთხო არ იყო, საკუთარ თავზე აიღო პასუხისმგებლობა და მოსწავლეთა ჯგუფი ჩანჩქერზე აიყვანა. 

“ჩანჩქერზე ასვლის შემდეგ, პედაგოგების მიერ გამოჩენილი გულგრილობის და წინდახედულობის ნორმების უგულებელყოფის შედეგად, უმეთვალყურეოდ დარჩენილი სოფიო ნიკოლეიშვილი ჩანჩქერის სწრაფ დინებაში შევიდა და ვეღარ მოახერხა ნაპირზე დაბრუნება, რამაც მისი გარდაცვალება გამოიწვია,“  – აცხადებენ პროკურატურაში.

ორივე მასწავლებელს ბრალი საქართველოს სისხლის სამართლის კოდექსის 220-ე პრიმა მუხლის მე-2 ნაწილით წარუდგინეს, რაც გულგრილობის გამო ადამიანის სიცოცხლის მოსპობას გულისხმობს. 

დანაშაული 2-დან 5 წლამდე თავისუფლების აღკვეთით ისჯება.