კორუფციული სკანდალი ჩრდილოეთ ოსეთში: დაუსწრებლად დაკავებული თანამდებობის პირი, სავარაუდოდ, საქართველოში იმალება
კორუფციული სკანდალი ჩრდილოეთ ოსეთში
ჩრდილოეთ ოსეთში დიდი კორუფციული სკანდალი მწიფდება: ლარისა ტუგანოვა, რესპუბლიკის მეთაურის მრჩეველი სოციალურ საკითხებში, დაუსწრებლად დააკავეს 35 მილიონი რუბლის [დაახლოებით 357 ათასი აშშ დოლარი] მითვისებისთვის. ეჭვმიტანილი, სავარაუდოდ, საქართველოში იმალება.
შინაგან საქმეთა სამინისტროს ცნობით, ტუგანოვა არის თაღლითური სქემის ორგანიზატორი, რომელშიც მონაწილეობდნენ მისი ყოფილი ქვეშევრდომები – შრომისა და სოციალური განვითარების სამინისტროს ჩინოვნიკები.
- ცხინვალში, მკვლელობაში ბრალდებული ყოფილი პოლიციელი უკრაინაში საბრძოლველად გაიქცა
- ვლადიკავკაზში ქართულ-რუსული დახურული შეხვედრა გაიმართა. რას ამბობენ ამის შესახებ ცხინვალში
ლარისა ტუგანოვას სისხლისსამართლებრივი დევნა მას შემდეგ დაიწყო, რაც სექტემბერში სოციალური პოლიტიკის მინისტრი ალინა აიდაროვა და ამ სამინისტროს კიდევ ორი თანამშრომელი დააკავეს.
გამოძიების მტკიცებით, აიდაროვა ლობირებდა ერთი კომერციული კომპანიის ინტერესებს, რომელმაც “მოიგო” ყველა კონტრაქტი და სამთავრობო ტენდერი, საერთო თანხის ოდენობამ კი 35 მილიონი რუბლი შეადგინა. ამ კრიმინალურ სქემაში ლარისა ტუგანოვაც ჩნდება – აიდაროვას დაკავების შესახებ მან თურქეთში შვებულების დროს შეიტყო და გადაწყვიტა სამშობლოში არ დაბრუნებულიყო. ოსური მედიის ცნობით, ის ახლა საქართველოში იმალება.
“ტუგანოვამ აიდაროვას დაკავების შესახებ თურქეთში შვებულების დროს შეიტყო. ყველა შედეგის გაცნობიერებით, რუსეთში აღარ დაბრუნებულა და ამჟამად თბილისშია“.
ლარისა ტუგანოვა ჩრდილოეთ ოსეთის შრომისა და სოციალური პოლიტიკის სამინისტროს თერთმეტი წლის განმავლობაში ხელმძღვანელობდა, 2004 წლიდან 2015 წლამდე. ანუ ის იყო აიდაროვას წინამორბედი. 2015 წელს იგი თანამდებობიდან გაათავისუფლეს, მაგრამ 2021 წელს იგი კვლავ დაბრუნდა მთავრობაში, როგორც ვიცე-პრემიერი რესპუბლიკის ახალი ხელმძღვანელის, სერგეი მენიაილოს დროს. ახალ თანამდებობაზე ტუგანოვა კურირებდა სოციალურ პოლიტიკას. 2023 წელს ის ისევ მოხსნეს და სახელმწიფოს მეთაურის მრჩევლად გადაიყვანეს.
ხელისუფლებას არ განუმარტავს მისი გადადგომის ოფიციალური მიზეზები. ახლა კი ზოგი ამტკიცებს, რომ ეს იყო ტუგანოვას შვილის გამო:
„ტუგანოვა მოხსნეს ვიცე-პრემიერის თანამდებობიდან მისი შვილის გამო, რომელმაც რუსეთის “სპეციალური სამხედრო ოპერაციის” დაწყების შემდეგ დატოვა რუსეთის ტერიტორია და ითხოვა პოლიტიკური თავშესაფარი კანადაში“.
ერთ-ერთმა სამართალდამცავმა JAMnews-ს უთხრა, რომ ტუგანოვას მრჩევლად დანიშვნამ ბევრი გააკვირვა.
ამასთან, წყაროს თქმით, გასათვალისწინებელია ის ფაქტი, რომ პროკურატურამ, როგორც ჩანს, სერგეი მენიაილოს გარემოცვაზე “სერიოზული ნადირობა” დაიწყო, რადგან სახელმწიფო მრჩევლისა და მინისტრის დაკავებამ სერიოზული ზიანი მიაყენა მის რეპუტაციას.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
