როგორ გადაარჩინეს მოხალისეებმა ჩინეთში, ეპიდემიის ზონაში მიტოვებული ათასობით შინაური ცხოველი
კორონავირუსის ქრონიკა
ორშაბათის, 10 თებერვლის დილის მონაცემებით, მსოფლიოში კორონავირუსით დაავადების უკვე 40 536 შემთხვევა დაფიქსირდა. მათი აბსოლუტური უმრავლესობა – ჩინეთში, უბეის პროვინციაში.
დღეისათვის, ვირუსით 910 ადამიანი გარდაიცვალა, 3 378 – გამოჯანმრთელდა.
დაავადების გავრცელებას შეგიძლიათ თვალი ადევნოთ ამ ონლაინრუკაზე.
ასობით ადამიანის გარდაცვალება და ათასობით საფრთხის წინაშე მდგომი ადამიანის საკითხი საყოველთაო ყურადღების ცენტრშია. მაგრამ ბრიტანულმა გამოცემა Daily Mail -მა სრულიად სხვა ისტორია მოგვითხრო. კორონავირუსმა არა მხოლოდ ასობით ადამიანის გარდაცვალება გამოიწვია, არამედ შინაური ცხოველებისაც ჩინურ ქალაქ უჰანში, საიდანაც ეპიდემია დაიწყო
•კორონავირუსი: როგორ განვითარდა მოვლენები მსოფლიოში
როგორ დარჩნენ ძაღლები, კატები და ზაზუნები ბინებში მარტო, საჭმლისა და წყლის გარეშე
ქალაქ უჰანის მცხოვრებლების ნაწილი სულ რამდენიმე დღით გავიდა სახლიდან, რათა ახლობლებთან ერთად ახალი წელი აღენიშნათ, მაგრამ მათ შინ დაბრუნება ვეღარ მოახერხეს.
კორონავირუსის აფეთქების გამო, ქალაქში კარანტინი გამოცხადდა და დაიხურა. ამის გამო, პატრონის გარეშე დარჩა, დაახლოებით, 50 ათასი კატა, ძაღლი და სხვა შინაური ცხოველი.
მათ დასახმარებლად მოხალისეები გაემგზავრნენ. კეთილი ადამიანები ცდილობენ ცხოველები დაღუპვას გადაარჩინონ. ბევრი მეპატრონე მოხალისეებს ეძებს მათ შორის, ვინც ახლა დახურულ ქალაქშია და სთხოვენ მათ სახლებში მისვლას, რათა მშიერი ცხოველები დააპურონ.
„ჩვენი გუნდის მოხალისეებმა, ჩემი ჩათვლით, 25 იანვრიდან მოყოლებული ათასზე მეტი შინაური ცხოველი გადავარჩინეთ. მთელი ეს დღეები ჩემი ტელეფონი არ გაჩერებულა, მუდმივად მირეკავენ. ფაქტობრივად, არ მძინავს“, – მოჰყვა ერთ-ერთმა ასეთმა მოხალისემ, 43 წლის მაომ.
ჭორები და პანიკა
რაღაც მომენტში, ჩინურ სოციალურ ქსელებში წერა დაიწყეს იმის შესახებ, რომ შინაური ცხოველები, შესაძლოა, ინფექციის მატარებლები ყოფილიყვნენ. ამის შემდეგ, ცხოველთა დამცველებმა განაცხადეს, რომ სულ რაღაც ერთი კვირის განმავლობაში, ქუჩებში მიტოვებული კატებისა და ძაღლების რაოდენობა გაიზარდა.
უფრო მეტიც, სოციალურ ქსელებში ცხოველების დახოცვაზეც დაიწყეს წერა.
სიუჩანში, დაავადებულთა რაოდენობით მეორე ქალაქში, კიდევ უფრო შორს წავიდნენ. იქ ხელისუფლებამ ძაღლებს ქუჩაში გასვლა აუკრძალა. ყველას, ვინც აკრძალვას დაარღვევს, ცხოველების დახოცვით დაემუქრნენ.
ზოგიერთმა მფლობელმა ვერ მოახერხა ცხოველების ოთხ კედელში გამოკეტვა და მათთვის სპეციალური ნიღბების შეძენა დაიწყეს. ზოგიერთებმა კი საერთოდ თავად დაიწყეს ნიღბების დამზადება.
„იმაზე ვნერვიულობ, რომ ჩემი ძაღლის დანახვა არ ენდომებათ მეზობლებს. შინაური ცხოველისთვის ვერანაირი ნიღაბი ვერ ვიშოვე, ამიტომ თვითონ დავამზადე ქაღალდის ჭიქიდან“, – განაცხადა პუდელის მეპატრონე, პეკინელმა, ფან ფენიუნმა.
ჯანდაცვის მსოფლიო ორგანიზაციის განცხადება: შინაური ცხოველები სახიფათოები არ არიან
„ჯანდაცვის მსოფლიო ორგანიზაციის განცხადებით, არანაირი მტკიცებულება არ არსებობს იმის, რომ ძაღლები და კატები შეიძლება დაავადდნენ კორონავირუსით. ვირუსის წყარო სრულიად სხვა ადგილზეა – ბინძურ ინდუსტრიულ მეურნეობებში, სასაკლაოებსა და ხორცის ბაზრებზე“, – განაცხადა ცხოველთა უფლებების დამცველი ჩინური ორგანიზაციის, PETA Asia-ს პრესსპიკერმა, კიტ გომ.
