კორონავირუსი ციხეში. პატიმართა ნათესავები ამბობენ, რომ ვითარება მძიმეა

საქართველოში კორონავირუსით პირველი პატიმარი 4 იანვარს გარდაიცვალა. როგორც კლინიკა “ვივამედში” ამბობენ, ამ პატიმარს ტესტი მხოლოდ კლინიკაში ჩაუტარდა, როდესაც უკვე მძიმე მდგომარეობაში შეიყვანეს. ციხეში მას ტესტი არ ჩატარებია.

ბოლო დღეებში გახშირდა პატიმართა ოჯახის წევრების მიერ მედიასთან გაკეთებული განცხადებები ციხეებში არსებულ ეპიდსიტუაციასთან დაკავშირებით.

განსაკუთრებით მძიმე მდგომარეობა, გავრცელებული ინფორმაციით, ქსნის #5 პენიტენციურ დაწესებულებაშია. აქაური პატიმრების ოჯახის წევრები ამბობენ, რომ ციხეებში ეპიდაფეთქებაა და ვირუსი ციხის ადმინისტრაციასაც უდასტურდება.

პატიმრების ახლობლები მძიმე ისტორიებს ჰყვებიან – ამბობენ, რომ სიმპტომიან პატიმრებსაც კი, არ უტარდებათ ტესტი კორონავირუსსზე და ისინი არ იღებენ არავითარ მკურნალობას.

ამ ყველაფერს უარყოფს იუსტიციის სამინისტრო.

პენიტენციური სამსახური აცხადებს, რომ ყველა ინფიცირებული პატიმარი უზრუნველყოფილია მედპერსონალის 24-საათიანი მომსახურებით და ყველა საეჭვო შემთხვევა მოწმდება.

უწყების განცხადებით, ქსნის პენიტენციური დაწესებულებიდან ამ ეტაპზე სამი მსჯავრდებულია გადაყვანილი სხვადასხვა სამედიცინო სერვისის მისაღებად სამოქალაქო სექტორის კლინიკაში.

“პრევენციის მიზნით, დაწესებულებიდან გაყვანამდე მოხდა მათი სწრაფი ანტიგენის ტესტით შემოწმება კოვიდ-19-ზე და სამივე პასუხი იყო უარყოფითი”, – აცხადებენ სამსახურში.

რას ჰყვებიან პატიმრების ახლობლები

“ერთიც არ გატესტილა, დაგვცინით? ვიხოცებით, პატრონი არ გვყავს” – ამბობს ტელეკომპანია “მთავართან” ერთ-ერთი პატიმრის მეგობარი.

მისი თქმით, პატიმარი მასთან საუბარში ადასტურებს, რომ ციხეებში ურთულესი მდგომარეობაა:

“პატიმრები ლოგინიდანაც ვერ ვდგებით, პირადად მე ვიწექი 40 გრადუსი სიცხით, მერე მთელი კამერა, და ადამიანს კარები არ შემოუღია ჩვენთვის, წამალიც კი არ მოუტანიათ და არ მოვუკითხივართ, როგორ ვიყავით, ისე იხოცებიან ბიჭები, პატრონი არ გვყავს მომკითხავი, მთელი ციხე გადასაყვანი იქნება.”

რთული მდგომარეობის შესახებ ჰყვებიან ახლობლებთან და ოჯახის წევრებთან გლდანის ციხის პატიმრებიც.

ერთ-ერთი პატიმრის უფლებადამცველი, ადვოკატი ალექსანდრე კობაიძე, ტელეკომპანია “პირველთან” საუბარში ამბობს, რომ მისი დაცვის ქვეშ მყოფს ვირუსი ციხეში გადაედო და ახლა მძიმედაა.

“დაგვიანებით მიაქციეს ყურადღება და ახლა ეს ადამიანი კლინიკა ვივამედშია, ფაქტობრივად გადადებული”.

“ძალიან ცუდი მდგომარეობაა გლდანში, ძალიან არის მოდებული კორონავირუსი. 2-3 პატიმარი ძალიან მძიმე მდგომარეობაშია. არც სინჯავენ, არც ტესტს უკეთებენ. ჩემს მეუღლესაც 3-4 დღეა, სიცხეები აქვს. ტელეფონში ვერ გვეუბნებიან ყველაფერს,” – თქვა ერთ-ერთი პატიმრის ოჯახის წევრმა.

მისივე თქმით, პატიმრებს არც ახლობლებთან თავისუფლად ლაპარაკის საშუალებას აძლევენ. 

ეპიდემიოლოგიური სიტუაციის გამწვავებაზე საუბრობენ ქალთა დაწესებულებებშიც.

ოჯახის წევრების ინფორმაციით, ქალთა N5 დაწესებულებაში 5 პატიმრის ჯანმრთელობის მდგომარეობა დამძიმებულია, ისინი სასწრაფო დახმარების ბრიგადამ უკვე გადაანაწილა კლინიკებში.

“2 დღის წინ 55 ქალი იყო ინფიცირებული, გუშინ საღამოს მათგან 5 დამძიმდა და სხვადასხვა კლინიკაში გადაიყვანეს. უკიდურესად მძიმე მდგომარეობაა, დაავადებულები არიან არა მხოლოდ პატიმრები, იქ მომუშავე პერსონალიც. მათ სიცოცხლეს საფრთხე ემუქრება”, – ამბობს ერთ-ერთი პატიმრის ახლობელი ტელეკომპანია “მთავართან”.

ურთიერთგამომრიცხავ განცხადებებს ავრცელებს კლინიკა “ვივამედმაც”.

ოფიციალური წერილით ისინი უარყოფენ, რომ კლინიკაში კორონავირუსის სიმპტომების მქონე პატიმრები შეიყვანეს. თუმცა, კოვიდპაციენტების შეყვანის შესახებ ინფორმაცია “ვივამედის” კლინიკურმა დირექტორმა ტელეკომპანია “ფორმულას” დაუდასტურა.

ზურაბ ჩხაიძემ თქვა, რომ კლინიკაში ორი პატიმარია გადაყვანილი, რომელთა მდგომარეობაც სტაბილურია.

პატიმრების ოჯახის წევრებმა და ახლობლებმა 9 იანვარს ქუთაისში აქცია გამართეს, შემდეგ კი გეგუთის ციხესთან გადაინაცვლეს. აქციები იყო სხვა ციხეებთანაც.

რას ამბობს სახალხო დამცველის აპარატი

სახალხო დამცველის მოადგილის, გიორგი ბურჯანაძის თქმით, ომბუდსმენის აპარატმა წერილობით მიმართა პენიტენციურ სამსახურს და კორონავირუსის გავრცელების პრევენციულ და სპეციალურ ღონისძიებებთან დაკავშირებით ინფორმაცია გამოითხოვა, თუმცა, უწყებისგან პასუხი არ მიუღია. 

______________________________________________________________________________

● საქართველოში Pfizer-ის და Moderna-ს ვაქცინებს სავარაუდოდ არ შემოიტანენ

● კლინიკების ასოციაცია: საქართველო პანდემიის მესამე ტალღას ვეღარ გაუძლებს

● ამირან გამყრელიძე: ქვეყანაში ეპიდსიტუაცია ოდნავ მშვიდდება