კობახიძე: "იმისთვის, რომ გრძელვადიან პერსპექტივაში ეს ქვეყანა დავამშვიდოთ, აუცილებელია ამ კანონის მიღება"
კობახიძის კომენტარი 30 აპრილის მიტინგის დარბევაზე
საქართველოს პრემიერ-მინისტრმა ირაკლი კობახიძემ გააკეთა პირველი კომენტარი მას შემდეგ, რაც 30 აპრილს პოლიციამ და სპეცრაზმმა ძალადობრივად დაშალეს ხალხმრავალი საპროტესტო აქცია, რომელის საქართველოს პარლამენტთან “აგენტების კანონის” მეორე მოსმენის პარალელურად მიმდინარეობდა.
მომხდარზე პასუხისმგებლობა კობახიძემ ოპოზიციას, არასამთავრობო სექტორს დააკისრა და თქვა, რომ ხელისუფლება არ აპირებს უკან დახევას და აუცილებლად მიიღებს „უცხოური გავლენის გამჭვირვალობის შესახებ“ კანონპროეტს, რადგან მისი თქმით, მხოლოდ ეს დაამშვიდებს ქვეყანას. პრემიერის თქმით, კანონის მესამე და საბოლოო მოსმენით განხილვა ორ კვირაში გაიმართება.
მოკლედ, რა თქვა კობახიძემ:
30 აპრილის აქციაზე და პოლიციელების მხრიდან ძალადობაზე
● კომახიძე აცხადებს, რომ “გუშინდელი ძალადობრივი აქცია აკერმანის სახელმძღვანელოს მიხედვით დაიგეგმა” და მასში მონაწილეობდა კოლექტიური ნაციონალური მოძრაობა:
„რაც შეეხება გუშინდელ ძალადობრივ აქციას, რომელიც სრულად აკერმანის სახელმძღვანელოს მიხედვით დაიგეგმა და წარიმართა. მიტინგის ძალადობრივი და კანონსაწინააღმდეგო ხასიათი გამოიხატა როგორც საქართველოს პარლამენტის შენობის პიკეტირებით, ისე სამართალდამცავების მიმართ ფიზიკური ძალადობითა და შეურაცხყოფით, პოლიციელებისთვის სხვადასხვა საგნის – მათ შორის შუშის ბოთლებისა და ქვების სროლით”
● პრემიერ-მინისტრის თქმით, სპეცრაზმელებისთვის თმენის ვალდებულების დაცვა რთულია, როდესაც მათ უპირისპირდებიან, ამიტომ აქციაზე რამდენიმე მძიმე შემთხვევა იყო, რომელთაგანაც ყველაზე სამწუხარო „ერთიანი ნაციონალური მოძრაობის“ ლიდერის, ლევან ხაბეიშვილის ცემის ფაქტია.
„შუშის ბოთლებს და ქვებს როცა ესვრიან პოლიციელებს მასობრივად, მაშინ რა უნდა გააკეთოს სპეცრაზმმა? იყო რამდენიმე ძალიან რთული ინციდენტი, როდესაც სპეცრაზმელები მომიტინგეებს ფიზიკურად გაუსწორდნენ, მაგრამ მათთვის ძალიან რთულია მოთმენა, როდესაც სახეში აფურთხებენ. ძალიან ბევრმა გაუძლო, ასიდან ერთმა ვერ გაუძლო”
● კობახიძის განცხადებით, გუშინდელი ამბებიდან ყველაზე სამწუხარო ინციდენტი ხაბეიშვილის ამბავია”, რომელსაც “შესწავლა სჭირდება”.
“დაფიქსირდა რამდენიმე სამწუხარო ინციდენტი, სამწუხაროა, რომ ძალადობა შობს ძალადობას”
● მისი თქმით, “მომიტინგეები აუცილებლად გადავლენ ძალადობაზე, ამისთვის 300-კაციანი საგანგებო ძალადობრივი ჯგუფი ჰყავთ.
“აგენტების კანონპროექტზე” და ხელისუფლების გეგმებზე
● კობახიძის განცხადებით, „უცხოური გავლენის გამჭვირვალობის შესახებ“ კანონპროექტის მესამე მოსმენა ორ კვირაში გაიმართება.
„პროცედურა შემდეგია: ჩვენ ორ კვირაში გვექნება მესამე მოსმენა, აქედან დაახლოებით ერთ თვეში, ოთხ კვირაში იქნება ვეტოს დაძლევა. ჩვენ მიგვითითებენ ხოლმე, ვენეციის კომისიაზე იქნებ დაიცადოთ და ასე შემდეგ. ვენეციის კომისიის დასკვნა ჩამოდის იქამდე, ვიდრე მოხდება ვეტოს დაძლევა“,-აღნიშნა პრემიერმა.
● კობახიძის თქმით, უმჯობესია, რადიკალური ოპოზიციის რამდენიმე ძალადობრივი აქცია ვიხილოთ ახლა, ვიდრე საქართველო რადიკალიზმისა და ე.წ. პოლარიზაციის ჩაკეტილ წრეში დავტოვოთ. მისი თქმით, ქვეყანას მხოლოდ „უცხოური გავლენის გამჭვირვალობის შესახებ“ კანონის მიღება დაამშვიდებს.
კობახიძის თქმით, 3 წელი ქვეყანა მუდმივი რევოლუციური სცენარების განხორციელების მცდელობის პირობებშია.
“იმისთვის, რომ გრძელვადიან პერსპექტივაში ეს ქვეყანა დავამშვიდოთ აუცილებელია ამ კანონის მიღება. აქციები იქნება დღეს, მესამე მოსმენის დროს, ვეტოს გადალახვის დროს, თუმცა ჩვენ თუ გავიტანთ ყველაფერს და რა თქმა უნდა გავიტანთ ამ კანონს, ამ შემთხვევაში იქნება რამდენიმედღიანი დისკომფორტი თუმცა, გრძელვადიან პერსპექტივაში წლობით დავაზღვევთ ქვეყანას პოლარიზაციისგან და რადიკალიზმისგან. თუ პოლარიზაციის და რადიკალიზმის ჩაკეტილ წრეს არ გავარღვევთ ძალიან გაგვიჭირდება ევროკავშირის წევრი გავხდეთ“, – აღნიშნა პრემიერმა.
