"ვისაც ხვალ და ზეგ დაგეგმილი აქვს ძალადობა, მათი დანაშაული არ დარჩება დაუსჯელი" - კობახიძის ბრიფინგი. რა თქვა პრემიერმა
კობახიძის ბრიფინგი
საქართველოს პრემიერმინისტრმა, ირაკლი კობახიძემ სპეციალურ ბრიფინგზე განაცხადა, რომ აშშ-ს და ევროპის “მუქარა” სანქციებზე მათზე ვერ იმოქმედებს და რუსულ კანონს მაინც მიიღებენ.
პრემიერმა 12-13 მაისს დაგეგმილ აქციებზე მომხდარი ყველა შესაძლო ინციდენტი წინასწარ დააბრალა ე.წ. რადიკალურ ოპოზიციას და მონაწილეებს უმკაცრესი პასუხისგებით დაემუქრა. კობახიძის თქმით, “დანაშაული არ დარჩება დაუსჯელი და დიდი ალბათობით, ვერც სალომე ზურაბიშვილის მხრიდან შეწყალებას ვეღარ დაექვემდებარება”.
კობახიძის თქმით, კვლევების თანახმად, საქართველოს მოსახლეობის 80%-ზე მეტი მხარს უჭერს არასამთავრობო ორგანიზაციების გამჭვირვალობას, ხოლო 60%-ზე მეტი უშუალოდ კანონს „უცხოური გავლენის გამჭვირვალობის” შესახებ.
“ქართული სახელმწიფო დღეს არის სუვერენული როგორც არასდროს და ეს სუვერენიტეტი კიდე უფრო გამტკიცდება. სუვერენიტეტთან ერთად განმტკიცდება სამართლისა და კანონის უზენაესობაც საქართველოში, შესაბამისად, კიდევ ერთხელ ვპირდებით ყველას, სახელმწიფოზე, სახელმწიფო ინსტიტუტზე და პოლიციელზე ხელის აღმართვისთვის, კანონის წინაშე, ყველა კანონის მთელი სიმკაცრით აგებს პასუხს.
რაც შეეხება აქციებს, მე მინდა შეგახსენოთ, რომ ჩვენს აქციაზე, იგივე გუშინდელთან შედარებით, რამდენჯერმე მეტი ადამიანი იყო გამოსული. რაც ასევე აჩვენებს ბუნებრივია თანაფარდობას”, – თქვა პრემიერმა.
კობახიძემ სამართალდაცმავებს მოუწოდა, გამოიჩინონ მაქსიმალური მოთმინება და ძალადობასა და შეურაცხყოფაზე რეაგირებისას იმოქმედონ ევროპულზე მაღალი სტანდარტით.
“გვაქვს უტყუარი ინფორმაცია, რომ რადიკალური ოპოზიციის მიერ ორგანიზებულ და უცხოეთიდან დაფინანსებულ ძალადობრივ ახალგაზრდულ დაჯგუფებებს ხვალ და ზეგ დაგეგმილი აქვთ ძალადობრივი მოქმედებები საქართველოს პარლამენტისა და პოლიციის წინააღმდეგ.
მინდა გავაფრთხილო რადიკალური ოპოზიციის ძალადობრივი დაჯგუფებების თითოეული წევრი, რომ ძალადობრივი ქმედებებისთვის ყველა უმკაცრესად აგებს პასუხს. ამასტანავე, მინდა ვთხოვო სამართალდამცავებს, გაოიჩინონ მაქსიმალური მოთმინება და ძალადობასა და შეურაცხყოფაზე რეაგირებისას იმოქმედონ ევროპულზე მაღალი სტანდარტით.
სამართალდამცავებს მინდა კიდევ ერთხელ გადავუხადო მადლობა იმისთვის, რომ ძალადობის მასშტაბის და სრულიად მიუღებელი ხარისხის მიუხედავად, გასული რამდენიმე კვირის განმავლობაში ისინი სწორედ ამერიკულზე და ევროპულზე მაღალი სტანდარტით მოქმედებდნენ.
საქართველო არის პატარა ქვეყანა, სადაც ადამიანები ერთმანეთს განსაკუთრებულად უნდა მოვუფრთხილდეთ. შესაბამისად, მოძალადეების მიმართ რეაგირების ის უხეში ფორმები, რომელიც ჩვეულებრივი მოვლენაა ამერიკული ან ფრანგული პოლიციისთვის, არ უნდა იყოს მისაღები ქართველი სამართალდამცველებისთვის.” – განაცხადა კობახიძემ.
