კლინიკა “ვივამედში” ექსპრეზიდენტ მიხეილ სააკაშვილის ჯანმრთელობის მდგომარეობის შესახებ ბრიფინგი გაიმართა, სადაც “ვივამედის” კლინიკურმა დირექტორმა ზურაბ ჩხაიძემ განაცხადა, რომ ექიმები სააკაშვილის მდგომარეობის გასაუმჯობესებლად მაქსიმუმს აკეთებენ, თუმცა ექსპრეზიდენტი “ძალიანაა დასუსტებული, სულ საწოლშია, აქვს კიდურების ტკივილი და ამას ძალიან განიცდი.” მისივე თქმით, სააკაშვილს გადაადგილება უჭირს, თუმცა ივანე ჩხაიძე სააკაშვილის მდგომარეობის გაუარესებას ნაწილობრივ პაციენტს აკისრებს.
“ჩვენი მიზანი ნამდვილად არის მისი ჯანმრთელობის მდგომარეობის გაუმჯობესება, რომ გაუმჯობესდეს სასიცოცხლო ფუნქციები, ფიზიოლოგიური პარამეტრები, სხვა ეს მაჩვენებლები და ეს რა თქმა უნდა გარკვეულწილად დამოკიდებული არის, რამდენად მიღწევადია ეს, თუ რას ვაღწევთ ჩვენ, პაციენტზეც. მე ამას ვამბობ იმიტომ, რომ ძალიან ბევრი კითხვა ჩნდება.”– ამბობს ჩხაიძე.
სააკაშვილის მკურნალი ექიმის, თამარ დავარაშვილის თქმით, ტენდენცია დამძიმებისკენ არის და ექსპრეზიდენტი დასუსტებულია. მისივე განმარტებით, სხეულის წონა და მასა რჩება დაქვეითებული. 20 რიცხვისთვის წონა იყო 67. 2 კილოგრამი და მასის ინდექსი იყო 18.2. როგორც დავარაშვილი აღნიშნავს, ექიმები სააკაშვილს ყველანაირად ეხმარებიან, მაგრამ ეს ტკივილი მაინც რჩება:
“ყველაზე სავალალო არის, რომ კვება რჩება არაბალანსირებული. არაბალანსირებულ საკვებს იღებს და ირგებს. პირღებინება, გულისრევა ძალიან იშვიათად რომ დაფიქსირებულიყო ჩვენთან.”
ენდოკრინოლოგი სოფო მებუკე კი ამბობს, რომ სააკაშვილს ფსიქოემოციურ ფონზე დაუქვეითდა მადა, “რომელიც განპირობებულია, როგორც თავადაც აღნიშნავს, თავისუფლების იძულებითი აღკვეთის მომენტით”. მისი თქმით, პაციენტი ღებულობს მესამედ, ან მეოთხედ კალორაჟს, ვიდრე მას ეს ესაჭიროება ნორმალური ფუნქციონირებისთვის.
“შესაბამისად, ლოგიკურია, გვაქვს წონის კლების ასეთი დინამიკა, რომელიც დღემდე გრძელდება. ბოლო დღეების დაანგარიშებით, სადღაც 300-400 კალორიაა დღეში, რაც გამოდის მის მიერ მიღებული ათვისებული საკვებისა. მისთვის აუცილებელია მინიმუმ 1 700 მაინც, მინიმუმ 1 700 მზარდი ტენდენციით. შეთავაზებულ იქნა,თუმცა ის დღემდე აგრძელებს თავისი სურვილისამებრ შერჩეული საკვები პროდუქტებით კვებას”. – ამბობს ექიმი.
მესამე პრეზიდენტის ოჯახის წევრები და ადვოკატები ჯანმრთელობის მდგომარეობის გამო, სააკაშვილისთვის სასჯელის გადავადებას ან სასჯელისგან გათავისუფლებას ითხოვდნენ და ამ შუამდგომლობით სასამართლოს მიმართეს. თუმცა მიხეილ სააკაშვილს სასამართლომ სასჯელი არ გადაუვადა. გადაწყვეტილება დასკვნით სხდომაზე მოსამართლე გიორგი არევაძემ გამოაცხადა.
მას შემდეგ, რაც საქართველოს მესამე პრეზიდენტს, მიხეილ სააკაშვილს სასამართლომ სასჯელი არ გადაუვადა, “ერთიანი ნაციონალური მოძრაობა” საგანგებო რეჟიმზე გადავიდა.
ენმ-ს თავმჯდომარის ლევან ხაბეიშვილის თქმით “ქართულ ოცნების თანამდებობის პირებს არ ექნებათ არანაირი მოსვენება”. პარტიის ლიდერებთან შეხვედრის შემდეგ მან სამომავლო გეგმებზე ისაუბრა და თქვა, რომ “ნაციონალური მოძრაობა” საპარლამენტო ცხოვრებაში მონაწილეობას აღარ მიიღებს. ასევე, პარტია იწყებს ქუჩის აქციებს და აქციებს მმართველი პარტიის წევრების სახლებთან.
საქართველოს პრეზიდენტი სალომე ზურაბიშვილი სააკაშვილთან დაკავშირებით საქალაქო სასამართლოს განაჩენზე განცხადებას ავრცელებს და ამბობს, რომ მისი შეწყალებით მიხეილ სააკაშვილი ვერ გათავისუფლდება, რადგან იგი კიდევ სამ საქმეზეა ბრალდებული. მისივე განმარტებით, სასამართლოს ამ გადაწყვეტილებით ქართველ “ხალხს მიესაჯა ჩაკეტილ წრეზე ტრიალი.”
