სტუმარმა თბილისში სასტუმროს ცეცხლი წაუკიდა, შემდეგ კი შიშველი აივანზე დადგა

ხანძარი ამბასადორში

ძლიერი ხანძარი, რომლის შედეგადაც გუშინ თბილისის ცენტრში სასტუმრო “ამბასადორის” მესამე და მეოთხე სართულები სრულად დაიწვა, სასტუმროს ერთ-ერთმა სტუმარმა გააჩინა.

სამართალდამცავებმა ცხელ კვალზე დააკავეს 1995 წელს დაბადებული ა.ლ., რომელსაც ბრალად ედება “ცეცხლის წაკიდება ნივთის დაზიანება ან განადგურება”. დანაშაული 3-დან 5 წლამდე ვადით თავისუფლების აღკვეთას ითვალისწინებს. 

იმ დროს, როდესაც შენობას ხანძარი მოედო და მის ჩასაქრობად მეხანძრეები მივიდნენ, აღნიშნული პირი სასტუმროს ერთ-ერთ აივანზე იდგა. სოციალურ ქსელებში გავრცელდა ვიდეო, სადაც ჩანს თუ როგორ დგას აივანზე შიშველი მამაკაცი, რომელსაც აბაზანის თეთრი ხალათი აქვს მოხურული.

სოციალურ ქსელებში ასევე გავრცელდა ამავე მამაკაცის ვიდეო, რომელიც ხანძრამდე ცოტა ხნით ადრე, ამავე სასტუმროშია გადაღებული. ვიდეოზე მამაკაცს კვლავ აბაზანის თეთრი ხალათი აცვია, იგი სავარაუდოდ არაფხიზელ მდგომარეობაშია და ამბობს, რომ “არსებობას არანაირი აზრი არ გააჩნია”.

“მთავარი არხის” ვერსიით, აღნიშნულმა პირმა კაზინო “ამბასადორში” დიდი ოდენობით თანხა წააგო, შემდეგ ავიდა რესტორანში, შეუკვეთა სუში, სასმელი და ცეცხლი გააჩინა.

ძლიერი ხანძარი პარასკევს საღამოს თბილისის ერთ-ერთი ყველაზე ფეშენებელური სასტუმროს – “ამბასადორის” ზედა სართულებს გაუჩნდა. სასტუმრო თბილისის ისტორიულ ნაწილში მდებარეობს, გაბრიაძის თოჯინების თეატრის და ანჩისხატის ტაძრის სიახლოვეს. ხანძარს მსხვერპლი არ მოჰყოლია.