კარვები თბილისში, პარლამენტთან – მრავალთვიანი პოლიტიკური კრიზისის შედეგი, რომელიც 2020 წლის ოქტომბერში გამართული საპარლამენტო არჩევნების შემდეგ დაიწყო. ოპოზიციამ არჩევნების შედეგები არ აღიარა, უარი თქვა საკანონმდებლო ორგანოში საკუთარ ადგილებზე და მას შემდეგ, ქვეყანაში, მთელი ალტერნატიული პოლიტიკა, ფაქტობრივად, ქუჩაში გადავიდა.
საქართველოში, ისტორიაში პირველად, ფაქტობრივად ერთპარტიული პარლამენტი ფუნქციონირებს, სადაც წარმოდგენილია მხოლოდ მმართველი პარტია, „ქართული ოცნება“.
სიტუაცია 2021 წლის თებერვალში გამწვავდა, როდესაც სპეცოპერაციის შედეგად, ყველაზე რეიტინგული ოპოზიციური პარტიის, „ერთიანი ნაციონალური მოძრაობის“ ლიდერი, ნიკა მელია დააპატიმრეს.
24 მარტს, ოპოზიციამ განაცხადა, რომ საგანგებო მდგომარეობაზე გადადის და რეგიონებში იწყებს აქციებს, 15 მაისს კი თბილისში დაბრუნდება და მასობრივ საპროტესტო აქციას ცენტრალურ, შოთა რუსთაველის გამზირზე გამართავს. მათ ორი ძირითადი მოთხოვნა აქვთ: პოლიტიკური პატიმრების გათავისუფლება და ვადამდელი საპარლამენტო არჩევნების დანიშვნა.
