ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, ჯოზეფ ბორელი საქართველოში ვიზიტის შემდეგ ევროკავშირის ოფიციალურ ვებგვერდზე გამოქვეყნებულ ბლოგპოსტში წერს, რომ ევროკავშირის კარი ღიაა და “იმედია” ქართველი ლიდერები ამ “ისტორიულ შანსს” ხელიდან არ გაუშვებენ. მისივე თქმით, ევროკავშირი წუხს, რომ თბილისი რუსების ევროპაში გაყვანის ჰაბად იქცა.
რას წერს ბორელი – ძირითადი აქცენტები:
● ერთ-რთი მთავარი გამოწვევა საქართველოსთვის ევროპულ გზაზე ძლიერი პოლიტიკური პოლარიზაციაა.
● ქვეყანა რომ ევროკავშირის კანდიდატი გახდეს, ყველა პოლიტიკურმა ძალამ ერთად, კონსტრუქციულად უნდა იმუშაოს. ამაზე ვისაუბრე ქართველ პარლამენტარებთან – უმრავლესობა უნდა იყოს ინკლუზიური, უმცირესობა კი კოოპერატიული.
● ევროკავშირში გაწევრიანება – ეს ეროვნული მიზანია, რომელიც პარტიულ პოლიტიკაზე მაღლა უნდა იდგეს. ხელისუფლებამ და მმართველმა პარტიამ უნდა იმუშაონ იმ პირობების შექმნაზე, რომლებიც ამ თანამშრომლობას შესაძლებელს გახდიან.
● პრეზიდენტი ზურაბიშვილის იმპიჩმენტის პროცედურის დაწყებამ კიდევ უფრო გააძლიერა ეს კონტრპროდუქტიული პოლარიზაცია.
● იმისთვის, რომ საქართველომ ევროპულ გზაზე სწრაფად სვლა შეძლოს, ქვეყნის ყველა ინსტიტუტმა ერთად უნდა იმუშაოს, ანუ ითანამშრომლოს. ქართველმა ლიდერებმა ეს ისტორიული შანსი ხელიდან არ უნდა გაუშვან.
● ჩემი მთავარი გზავნილი საქართველოს ლიდერებისა და მოქალაქეებისთვის იყო ნათელი: საქართველოს შეუძლია, ევროკავშირის იმედი ჰქონდეს და ევროკავშირის კარი საქართველოსთვის ღიაა.
● ჩვენ გვსურს, რომ საქართველომ მიაღწიოს წარმატებას ევროპულ გზაზე და იმედი გვაქვს, რომ ქართველი ლიდერები ყველაფერს გააკეთებენ იმისთვის, რომ ეს დიდი შესაძლებლობა ხელიდან არ გაუშვან.
● ვწუხვართ, რომ საქართველოსა და რუსეთს შორის პირდაპირი ფრენები აღდგა, რის შედეგადაც თბილისი რუსების ევროპაში გაყვანის ჰაბად იქცა.
● აუცილებელია უფრო აქტიური ჩართულობა რუსეთის ჰიბრიდული ქმედებების წინააღმდეგ – რუსული პროპაგანდისა და დეზინფორმაციის წინააღმდეგ.
● ევროკავშირი გააგრძელებს დამოუკიდებელი მედიისა და საქართველოს სამოქალაქო საზოგადოების მხარდაჭერას, რათა ხელი შევუწყოთ საინფორმაციო მანიპულაციებისადმი [საზოგადოების] მდგრადობას. დამოუკიდებელ მედიასა და მიუკერძოებელ ინფორმაციაზე წვდომა დემოკრატიის საფუძველია.
საქართველოში ევროკავშირის უმაღლესი წარმომადგენელი, ჯოზეფ ბორელი ოფიციალური ვიზიტით 7 სექტემბერს ჩამოვიდა.
საქართველოში ვიზიტის წინ, ევროკავშირის უმაღლესმა წარმომადგენელმა Civil.ge-სთან მიცემულ ინტერვიუში საქართველო-ევროკავშირის ურთიერთობებზე ისაუბრა.
ბორელი შეეხო ისეთ საკითხებს, როგორებიცაა მიმდინარე წლის ბოლოს საქართველოსთვის ევროკავშირის წევრობის კანდიდატის სტატუსის მინიჭების პერსპექტივა, საქართველოს პრეზიდენტის იმპიჩმენტის პროცესი და საქართველოსა და ევროკავშირის საგარეო პოლიტიკის შესაბამისობა.
საქართველოს პრემიერმინისტრთან, ირაკლი ღარიბაშვილთან ერთად გამართულ პრესკონფერენციაზე ჯოზეფ ბორელმა განაცხადა, რომ ე.წ. მეორე ფრონტზე დეზინფორმაციის მიზანი საზოგადოების მოწამვლა და უნდობლობის გაზრდაა. მისივე თქმით, საქართველომ შეასრულა 12-დან 3 რეკომენდაცია და დანარჩენი 9 პროცესშია.
“საქმეა გასაკეთებელი, გააკეთეთ და ნუ იფიქრებთ მის მიტოვებაზე” – აღნიშნა ბორელმა.
აღსანიშნავია, რომ ირაკლი ღარიბაშვილმა ჯოზეფ ბორელთან ერთად გამართული პრესკონფერენციაზე ევროკავშირის უმაღლესი წარმომადგენლის თანდასწრებით საქართველოსთვის აქამდე ევროკავშირის სტატუსის არმიცემას უსამართლო უწოდა.
ღარიბაშვილის თქმით, 1-2 კვირაში საქართველო მიიღებს დეოლიგარქიზაციის სამოქმედო გეგმას. მან ასევე იმედი გამოთქვა, რომ ევროკომისია საქართველოს მთავრობას დაუფასებს ერთგულებას.
რაც შეეხება პრეზიდენტის იმპიჩმენტს, ღარიბაშვილმა ხაზი გაუსვა, რომ ეს სამართლებრივი საკითხია და არა პოლიტიკური.
