ივანიშვილის ოჯახის ქონება საქართველოში, რუსეთსა და საფრანგეთში - რა წერია მილიარდერის 2024 წლის დეკლარაციაში
“რადიო თავისუფლების” მასალის მიხედვით
ჟურნალისტებმა გამოითხოვეს და შეისწავლეს 2024 წლის 4 ოქტომბრის დეკლარაცია, რომელიც ივანშვილმა, როგორც პარლამენტის წევრობის კანდიდატმა, “ქართული ოცნების” სიის პირველმა ნომერმა, შეავსო. დეკლარაციის მიხედვით პარტია „ქართული ოცნების“ საპატიო თავმჯდომარის, ბიძინა ივანიშვილის ოჯახს მრავალმილიონიანი ქონება ეკუთვნის საქართველოში, რუსეთსა და საფრანგეთში. უშუალოდ ივანიშვილის სახელზე კი მხოლოდ სოფელ ჭორვილაში არსებული სახლებისა და მიწების ნაწილია.
ივანიშვილის ქონება საქართველოში
საქართველოში ბიძინა ივანიშვილის და მისი ცოლის, ეკატერინა ხვედელიძის სახელზეა რეგისტრირებული 20-მდე მიწის ნაკვეთი საჩხერის მუნიციპალიტეტის სოფელ ჭორვილაში და ამავე სოფელში ოთხი საცხოვრებელი სახლი. ჯამში მათ საკუთრებაში არსებული მიწის ნაკვეთები 180 ათას კვადრატულ მეტრს აღემატება. ხვედელიძის სახელზეა გაფორმებული ამავე მუნიციპალიტეტში, სოფელ საირხეში 5,6 ათასი კვადრატული მეტრი მიწა.
ბიძინა ივანიშვილის ცოლს ეკუთვნის 5,5 ათასი კვადრატული მეტრი მიწა საგურამოში, თბილისში, კრილოვის ქუჩაზე მდებარე 116 კვადრატული მეტრის ზომის ბინისა და სარდაფის ნაწილი.
რაც შეეხება თბილისში, სოლოლაკში 14 ათას კვ.მ-ზე მეტ ფართობზე აშენებულ საცხოვრებელ კომპლექსს, რომელიც მოიცავს საცხოვრებელ, სპორტულ და დამხმარე ფართებს, ის არც უშუალოდ ივანიშვილისა და არც მისი ცოლის – ხვედელიძის სახელზეა. საჯარო რეესტრის მიხედვით, მიწა შენობა-ნაგებობიანად ეკუთვნის შპს „ფინსერვისი- XXI“-ს, ივანიშვილს კი მისგან აქვს ფართი დაქირავებული. ამ კომპანიის მფლობელი კომპანია საქართველოში არ არის რეგისტრირებული.
ივანიშვილის ქონება რუსეთში
„ქართული ოცნების“ დამფუძნებლის ცოლს ეკუთვნის მოსკოვში, ოდენცოვის რაიონში ჯამში 12 ათას კვადრატულ მეტრზე მეტი სამი მიწის ნაკვეთი. მის სახელზეა რეგისტრირებული სავრასოვის ქუჩაზე 614 კვადრატული მეტრი ფართის მქონე საცხოვრებელი სახლის 50 პროცენტი .
ივანიშვილის ქონება საფრანგეთში
ეკატერინა ხვედელიძე საფრანგეთში, ლა-სელ-სენ-კლუში 1935 კვადრატული მეტრის ზომის მიწის ნაკვეთსა და 300 კვადრატული მეტრის ზომის სახლს ფლობს.
რა რაოდენობის თანხებზეა საუბარი ივანიშვილის დეკლარაციაში
ბიძინა ივანიშვილი და მისი ცოლი ფულის შენახვას უცხოურ ვალუტაში, უფრო ზუსტად კი ამერიკულ დოლარში არჩევს. მათ საბანკო ანგარიშებზე ჰქონდათ:
- 159,3 მილიონ ამერიკულ დოლარზე მეტი;
- 17 ათას ევრომდე;
- 110 ათას ლარზე მეტი.
რომელ ბანკებში აქვთ მათ ანგარიშებზე თანხა, ამის დადგენა შეუძლებელია, რადგან წინასაარჩევნოდ შევსებული დეკლარაცია პოლიტიკოსისგან ავალდებულებს ამ ინფორმაციის მითითებას.
„ბლუმბერგის“ მიხედვით კი, 31 ოქტომბრის მონაცემების მიხედვით, ბიძინა ივანიშვილის ქონება 7,55 მილიარდ დოლარად არის შეფასებული.
კომპანიები ივანიშვილების მფლობელობაში
უშუალოდ ცოლ-ქმრის სახელზეა რეგისტრირებული რამდენიმე კომპანია საქართველოში, საფრანგეთში, პანამაში, ბრიტანეთის ვირჯინიის კუნძულებზე და ბაჰამის კუნძულებზე.
ამ ჩამონათვალში არ არის „ბანკი ქართუ“. ამ ბანკის ანგარიშის მიხედვით, მფლობელი უტა ივანიშვილია, ბიძინა ივანიშვილის ვაჟი.
