სამხრეთ ოსეთი: მოკლული ინალ ჯაბიევის ქვრივი პრეზიდენტს ადანაშაულებს
28 წლის ინალ ჯაბიევის ქვრივი, რომელიც, სავარაუდოდ, შსს-ს იზოლატორში, წამების დროს გარდაიცვალა, მის სიკვდილზე პასუხისმგებლობას პრეზიდენტს აკისრებს. ანატოლი ბიბილოვი დაღუპულის ნათესავებს შეხვდა, მაგრამ ოპოზიციისა და საზოგადოების მოთხოვნის მიუხედავად, ხმაურიანი საქმის გამო გენერალური პროკურორის თანამდებობიდან გათავისუფლებაზე კვლავინდებურად უარს აცხადებს.
„ე.ი. თქვენი პირადი კონტროლის ქვეშ მოკლეს ინალი“, – დაწერა ინალ ჯაბიევის ქვრივმა Telegram-ის საკუთარ გვერდზე. მისი ეს სიტყვები მიმართული იყო სამხრეთ ოსეთის პრეზიდენტის, ანატოლი ბიბილოვისკენ.
ეს ჩანაწერი მას შემდეგ გამოჩნდა, რაც 5 ოქტომბერს, ინალ ჯაბიევის ნათესავებთან შეხვედრისას, ანატოლი ბიბილოვმა განაცხადა, რომ არ ესმის, რის საფუძველზე უნდა გაათავისუფლოს ამ საქმის გამო გენერალური პროკურორი. ბიბილოვის თქმით, ყველა დამნაშავე სასტიკად დაისჯება.
იგივე სიტყვები თქვა ანატოლი ბიბილოვმა ჯაბიევის მკვლელობაში ეჭვმიტანილების ნათესავებთან შეხვედრისას, რომელიც ერთი დღით ადრე გაიმართა.
•ცხინვალი: საბაჟოს გამო გამოწვეული სურსათის კრიზისი
•აფხაზეთს, ცხინვალს, დნესტრისპირეთს და დონბასს რუსეთის მიერ ანექსიისთვის ამზადებენ?
•სტალინი კვლავ ცოცხალია სამხრეთ ოსეთსა და აღმოსავლეთ უკრაინაში
ჯაბიევის საქმე
28 წლის ინალ ჯაბიევი 28 აგვისტოს, სავარაუდოდ, დაკავების შემდეგ, იზოლატორში წამების შედეგად გარდაიცვალა. ის შს მინისტრზე, იგორ ნანიევზე თავდასხმის ბრალდებით დააპატიმრეს.
ამ საქმეზე დაკავებულ მეორე ბრალდებულს, ნიკოლაი ცხოვრებოვს ციხეში სასტიკად სცემეს და ახლა სიარული არ შეუძლია – სავარაუდოდ, მას ხერხემალი დაუზიანდა. თავდაპირველად ის ციხეში, დაცვის ქვეშ იმყოფებოდა, მასთან არც ნათესავებს და არც მნახველებს უშვებდნენ. შემდეგ, ის სახლში გაუშვეს, მაგრამ მინისტრზე თავდასხმისთვის ბრალი წარუდგინეს.
საქმის მესამე ფიგურანტი, გარსენ კულუმბეგოვიც ასევე აწამეს და სცემეს.
მას შემდეგ, რაც საზოგადოებაში საპროტესტო ტალღამ იფეთქა და რამდენიმე მიტინგი გაიმართა, პრეზიდენტმა ბიბილოვმა თანამდებობას ჩამოაშორა შს მინისტრი, შემდეგ კი, პარლამენტის მიმართვის საპასუხოდ, დაითხოვა მთელი მთავრობა, ამ საქმეზე დააკავეს ხუთი პიროვნება – პოლიციის თანამშრომლები.
თუმცა, პროტესტის მონაწილეები და ოპოზიცია პრეზიდენტისა და გენერალური პროკურორის გადადგომასაც ითხოვს. ისინი მათ დაკავებულთა წინააღმდეგ ძალადობის ფაქტების დაფარვაში ადანაშაულებენ.
ჯაბიევის ქვრივის მიმართვა
„პრეზიდენტი სვამს კითხვას, რის საფუძველზე უნდა გადააყენოს პროკურორი. მე კი სხვა კითხვა მაქვს, რის საფუძველზე მოკლეს ინალი?
თქვენ განაცხადეთ, რომ პირად კონტროლზე აიყვანეთ ნანიევზე თავდასხმის ფაქტის გამოძიება, თავდასხმის, რომლის 30 პროცენტიც კი არავის სჯერა. ე.ი. თქვენი პირადი კონტროლის ქვეშ მოკლეს ინალი.
ახლა, თქვენ კონტროლქვეშ აიყვანეთ ამ მკვლელობის გამოძიება. აქედან რა უნდა გამოვიდეს? არაფერი“, – წერს ოქსანა სოტიევა.
რუსეთი – ბიბილოვის ხელისუფლების გარანტი?
სამხრეთ ოსეთის პრეზიდენტი ანატოლი ბიბილოვი მოსკოვის მხარდაჭერით სარგებლობს. ერთი თვის წინ, რუსეთის უშიშროების საბჭოს მდივნის ერთ-ერთმა მოადგილემ, რაშიდ ნურგალიევმა ჟურნალისტებს განუცხადა, რომ აკვირდება რესპუბლიკაში მიმდინარე მოვლენებს და კონტაქტი აქვს ბიბილოვთან. მას შემდეგ, მას სხვა კომენტარი არ გაუკეთებია.
ინალ ჯაბიევის დაღუპვამ მწვავე რეაქცია გამოიწვია არა მხოლოდ სამხრეთ, არამედ ჩრდილოეთ ოსეთში. ცნობილმა ჩრდილოეთოსეთელმა ჟურნალისტმა და ბლოგერმა, რუსლან ტოტროვმა მისი საქმე ვლადიმირ ცკაევის საქმეს შეადარა, რომელიც 2015 წელს, ვლადიკავკაზის ციხეში აწამეს და სცემეს.
ტოტროვის თქმით, ისეთი შთაბეჭდილება რჩება, რომ „სადისტი ყასბები“ ცხინვალსა და ვლადიკავკაზში ერთი ინსტრუქციით მოქმედებდნენ. ამასთან, მან აღნიშნა, რომ სამხრეთ ოსეთის მოსახლეობამ გაბედა და დიდი ზეწოლა მოახდინა თავის ხელისუფლებაზე.
ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
