იაგო კაჭკაჭიშვილის კომენტარი: ღარიბაშვილმა პირდაპირ თქვა, ევროკავშირის წევრობისთვის მზად არ ვართ, შევეშვათო
იაგო კაჭკაჭიშვილის კომენტარი
როგორც იტყვიან, „შუბი ხალთაში არ დაიმალება“ – ირაკლი ღარიბაშვილმა პირდაპირ თქვა: ევროკავშირის წევრობისთვის მზად არ ვართ, შევეშვათო – ასე ეხმაურება სოციოლოგი იაგო კაჭკაჭიშვილი “ქართული ოცნების” თავმჯდომარის, ირაკლი ღარიბაშვილი განცხადებას, რომლის თანახმად, საქართველო მზად არ არის, გახდეს ევროკავშირის წევრი ქვეყანა.
შაბათს „ქართული ოცნების“ თავმჯდომარემ, ირაკლი ღარიბაშვილმა განაცხადა, რომ საქართველო ევროკავშირში გაწევრიანებისთვის მზად არაა.
“ჯერ საერთოდ ვთქვათ ის, რომ ქვეყანამ მიაღწია მაქსიმუმს, პიკი იყო შარშანდელი დეკემბერი, ჩვენ გავხდით კანდიდატი ქვეყანა. შემდეგი ეტაპი უკვე არის გაწევრიანება. დღეს ქვეყანა ვერ გახდება, დღეს არ ვართ მზად, რომ წევრი ქვეყანა, ხომ ასეა, ხომ მეთანხმებით?
არ არის კონსენსუსი იმაზე, რომ დღესვე შეიძლება გახდეს ქვეყანა ევროკავშირის წევრი, მითუმეტეს ახლა, ამდენი პრობლემებია და იცით, რომ მთელი დრო დასჭირდება ამას. დღეს არ არის ევროკავშირი მზად გაფართოებისთვის და ამას დრო დასჭირდება და ბევრ რამეზე, ბევრ ფაქტორზეა დამოკიდებული ეს შემდეგი ნაბიჯები.
ძალიან მარტივად მინდა გითხრათ, თუ იმ დროისთვის, როდესაც ქვეყანა იქნება მზად და გვეტყვიან, რომ აი, ხვალვე გახდებით ევროკავშირის წევრი ქვეყანა ძალიან მარტივად შეიძლება ამ კანონის გაუქმებაც, გადახედვა, შეცვლა, ახლის მიღება, ასე რომ ნუ ნერვიულობთ, ყველაფერი არის ძალიან კარგად.“ – აცხადებს ღარიბაშვილი.
იაგო კაჭკაჭიშვილი: “როგორც იტყვიან, „შუბი ხალთაში არ დაიმალება“. ირაკლი ღარიბაშვილმა პირდაპირ თქვა: ევროკავშირის წევრობისთვის მზად არ ვართ, შევეშვათო.
არ უნდათ ევროკავშირში ქვეყნის გაწევრიანება. კანდიდატის სტატუსს კი ასე უყურებს ეს ხელისუფლება: „ეგდოს“, არაფერს აფუჭებს, ჩვენი პროევროპელი (და შეცდენილი) ამომრჩევლებისთვის გადაგდებული ძვალია, რათა არც ერთი ხმა არ დავკარგოთ არჩევნებში.
უკვე წლებია, ხელისუფლების მხრიდან მიდის ევროკავშირის „გაშავება“, ამ ფერხულში ჩართულია სახელისუფლო მედია, მოსყიდული „ექსპერტები“, სასამართლო, ბობოლა სასულიერო პირები, ტროლ-ბოტები…
თუმცა, ფაქტია: ხელისუფლების ანტიევროპულმა ისტერიამ ვერ შექმნა დომინანტური საზოგადოებრივი აზრი, ვერ ჩამოაყალიბა პარადიგმა, ვერ წარმოშვა ბუნებრივი აქტივიზმი… რაც მთავარია, ანტიევროპული ისტერიის გავლენიდან არსებითად ამოვარდნილი აღმოჩნდა ახალგაზრდა თაობა. სწორედ ამას ვუყურებთ ახლა ჩვენ.”
