პაპუაშვილმა ჰომოფობიურ კანონს ხელი მოაწერა. UNAIDS-ი ოცნებას კანონის გაუქმებისკენ მოუწოდებს
ჰომოფობიური კანონი
საქართველოს პარლამენტის თავმჯდომარემ, შალვა პაპუაშვილმა პროპაგანდისტულ და ჰომოფობიურ კანონს ხელი მოაწერა. ამ კანონს გუშინ, 2 ოქტომბერს ხელი არ მოაწერა პრეზიდენტმა სალომე ზურაბიშვილმა.
გაეროს აივ/შიდსის გაერთიანებული პროგრამა (UNAIDS) საქართველოში პროპაგანდისტული და ჰომოფობიური კანონის გამო შეშფოთებულია და ხელისუფლებას მისი გაუქმებისკენ მოუწოდებს.
პაპუაშვილი კანონზე, რომელიც ადამიანების უფლებებს ზღუდავს, ამბობს, რომ “ეს იცავს ყველა მოქალაქის უფლებას, მათ შორის გამოხატვის თავისუფლებას, ისე, რომ სხვა ადამიანების უფლებები არ შეილახოს, რაც არის კიდეც ნამდვილი დემოკრატიის არსი და იდეა”. მისივე თქმით, “ამ კანონზე ხელმოწერის უკან დგას ერიც და ბერიც.”
რას ამბობს UNAIDS
როგორც პროგრამის განცხადებაშია აღნიშნული, კანონი საქართველოს მოსახლეობის ჯანმრთელობას და ადამიანის უფლებებს სერიოზულ საფრთხეს უქმნის.
ამასთან, UNAIDS-მა მხარი დაუჭირა გაეროს ადამიანის უფლებათა უმაღლესი კომისრის ოფისის განცხადებას, რომ ახალი კანონმდებლობა “აწესებს დისკრიმინაციულ შეზღუდვებს განათლებაზე, საჯარო დებატებსა და შეკრებებზე, რომლებიც დაკავშირებულია სექსუალურ ორიენტაციასთან და გენდერულ იდენტობასთან”.
“ეს კანონები არღვევს ღირსებისა და თანასწორობის ფუნდამენტურ უფლებებს, ზრდის სტიგმას და ხელს უშლის ლგბტქ+ თემის წვდომას აუცილებელ ჯანდაცვის სერვისებზე. ეს, თავის მხრივ, ძირს უთხრის საქართველოს ძალისხმევას შიდსის აღმოსაფხვრელად და სხვა ინფექციურ დაავადებებთან საბრძოლველად.
კანონების, რომლებიც ლგბტქ+ ადამიანების დისკრიმინაციას ახდენენ, ადგილი თანამედროვე საზოგადოებაში არაა, რადგან ისინი იწვევენ შევიწროებას, დისკრიმინაციას, ძალადობასა და სოციალურ გარიყულობას, რაც საფრთხეს უქმნის მცდელობებს აივ-ის ეპიდემიის დასასრულს.
მოვუწოდებთ საქართველოს ხელისუფლებას გააუქმოს ეს კანონი, რადგან ის გამოიწვევს მხოლოდ მარგინალიზებული თემების შემდგომ იზოლაციას და საზოგადოებრივი ჯანმრთელობის გაუარესებას. სტიგმა კლავს, ხოლო სოლიდარობა სიცოცხლეს ხსნის. ლგბტქ+ ადამიანების უფლებების დაცვა გადამწყვეტია საზოგადოებრივი ჯანმრთელობის, სოციალური ერთობისა და თანასწორობის ხელშეწყობისთვის.” – აღნიშნულია განცხადებაში.
საქართველოს პარლამენტმა დისკრიმინაციული და ჰომოფობიური ანტი-ლგბტ კანონი 17 სექტემბერს მიიღო.
აღნიშნული კანონპროექტით “ქართული ოცნება” ამტკიცებს, რომ “ოჯახური ღირებულებების დაცვა” სურს, თუმცა რეალურად ეს კანონი ლგბტ თემის უფლებებს ზღუდავს და ცენზურას აწესებს.
პაკეტი 19 კანონპროექტისგან შედგება და სხვა საკითხებთან ერთად შეკრების თავისუფლების შეზღუდვასა და მედია ცენზურასაც ითვალისწინებს. საკანონმდებლო პაკეტში ძირითადი კანონის პროექტი “ოჯახური ღირებულებებისა და არასრულწლოვანების დაცვის შესახებაა”, დანარჩენი 18 კი მისგან გამომდინარეა.
ამავე ჰომოფობიური და პროპაგანდისტული ინიციატივის ფარგლებში “ქართული ოცნება” საკონსტიტუციო ცვლილებების განხორციელებასაც გეგმავს, რისთვისაც საკონსტიტუციო უმრავლესობა სჭირდება, რაც ამ ეტაპზე არ აქვთ. პარლამენტის სპიკერის, შალვა პაპუაშვილის თქმით, სწორედ ამიტომ გადაწყვიტეს ამ ეტაპზე კანონის მიღება, რისთვის საკმარისი უმრავლესობა აქვთ. რაც შეეხება საკონსტიტუციო ცვლილებს, მას არჩევნების შემდეგ, პარლამენტში საკონსტიტუციო უმრავლესობის მოპოვების შემთხვევაში გეგმავენ.
ასევე, “ქართულ ოცნებას” სურს საქართველოს კონსტიტუციის 30-ე მუხლს, რომელიც ოჯახს განიხილავს, როგორც ქალისა და მამაკაცის კავშირს, დაემატოს მესამე პუნქტი შემდეგი შინაარსით: “ოჯახურ ღირებულებათა და არასრულწლოვანთა დაცვა უზრუნველყოფილია საქართველოს კონსტიტუციური კანონით”.
რა წერია კანონპროექტში
● ქართულ ოცნებას სურს კანონში ჩაწეროს, რომ დაუშვებელია ქორწინების ალტერნატიული კავშირის რეგისტრირება, რომელიც არ იქნება კავშირი ქალს და კაცს შორის. ასევე, ქვიარ ადამიანებს არ შეეძლებათ არასრულწლოვანის შვილად აყვანა. აღსანიშნავია, რომ ამ ორი უფლებით საქართველოში ქვიარები ვერც ახლა სარგებლობენ, რადგან კანონი ისედაც აწესებს შეზღუდვებს.
● გარდა ამისა, ცვლილებები კიდევ უფრო აუარესებს ტრანსგენდერი ადამიანების უფლებებს, რადგან ზღუდავს სამედიცინო სერვისებზე ხელმისაწვდომობას, ტრანზიციას (სქესის შეცვლის პროცედურას), ასევე, ზღუდავს პირადობის დამადასტურებენ დოკუმენტებში გენდერული იდენტობის შესაბამისი სქესის ჩანაწერს.
● ცვლილებები ზღუდავს გამოხატვის თავისუფლებასაც. შალვა პაპუაშვილის განმარტებით, დაუშვებელი იქნება საგანმანათლებლო დაწესებულებაში ისეთი ინფორმაციის გავრცელების ხელშეწყობა, “რომელიც მიმართულია ადამიანის თავისი სქესისგან განსხვავებული სქესის მიკუთვნების, ერთი და იმავე სქესის წარმომადგენლებს შორის ურთიერთობის, ან ინცესტის პოპულარიზაციისკენ”.
● ამასთან, დაუშვებელი იქნება ამგვარი ინფორმაციის გავრცელება ტელევიზიების მხრიდანაც. სავარაუდოდ, აქ იგულისხმება ფილმებიდან კონკრეტული სცენების ამოჭრა ან მათი დაფარვა.
● კანონის მიღების შემთხვევაში, აიკრძალება საჯარო შეკრება და მანიფესტაციაც, “რომელიც მიმართულია ადამიანის თავისი სქესისგან განსხვავებული სქესის მიკუთვნების, ერთი და იმავე სქესის წარმომადგენლებს შორის ურთიერთობის, ან ინცესტის პოპულარიზაციისკენ.”
