პროკურატურის მტკიცებით, გივი თარგამაძის მანქანა სააკაშვილის დავალებით ააფეთქეს

გივი თარგამაძის აფეთქება

საქართველოს გენერალურმა პროკურატურამ 2016 წელს ოპოზიციური პარტია “ერთიანი ნაციონალური მოძრაობის“ დეპუტატის, გივი თარგამაძის მკვლელობის მცდელობის საქმეში ყოფილი პრეზიდენტის, მიხეილ სააკაშვილის მონაწილეობა გამოკვეთა.

2016 წლის 4 ოქტომბერს გივი თარგამაძის მკვლელობა მანქანის აფეთქების გზით სცადეს. თარგამაძე, რომელიც იმ დროს პარლამენტის დეპუტატი იყო, გადარჩა, თუმცა, დაშავდნენ გამვლელები. დამამძიმებელ გარემოებებში განზრახ მკვლელობის მცდელობაში ბრალდებული დავით ხეჩუაშვილი იძებნებოდა. იარაღისა და ასაფეთქებელი მოწყობილობის უკანონო შეძენა-შენახვაში ბრალდებული ბორის ჩაგუნავა კი, თბილისის საქალაქო სასამართლომ დამნაშავედ ცნო და 4 წლით თავისუფლების აღკვეთა მიუსაჯა, რაც 6-წლიანი პირობითი სასჯელით ჩანაცვლდა. 

სექტემბერში ქართულმა პოლიციამ მკვლელობის მცდელობის ორგანიზებისთვის დააკავა წარსულში ნასამართლევი და საქართველოს მიერ ძებნილი დავით ხეჩუაშვილი. როგორც საქართველოს პროკურატურაში აცხადებენ, მისი ჩვენების მიხედვით, 2016 წელს ის შეხვდა ვინმე შოთა ჭიჭიაშვილს, რომელმაც მას ბრძანება მისცა სააკაშვილისგან, რომ გივი თარგამაძეზე თვალთვალი დაეწყო.

“შოთა ჭიჭიაშვილმა შეხვედრისას მსჯავრდებულს განუცხადა, რომ იგი ცოტა ხნის წინ შინაგან საქმეთა მინისტრის ყოფილ მოადგილესთან გია ლორთქიფანიძის ერთად, უკრაინაში საქართველოს ყოფილ პრეზიდენტს მიხეილ სააკაშვილს შეხვდა. ჭიჭიაშვილის თქმით, სააკაშვილმა შეხვედრაზე საუბრისას თქვა, რომ არ ენდობოდა მისი პარტიის წევრს გივი თარგამაძეს, რადგან მისი ინფორმაციით, თარგამაძე 2016 წლის საპარლამენტო არჩევნების წინ, იმჟამინდელ საქართველოს ხელისუფლებასთან თანამშრომლობდა და აქედან გამომდინარე, სააკაშვილმა ჭიჭიაშვილს გივი თარგამაძის კონტროლი და თვალთვალი დაავალა.

თავის მხრივ შოთა ჭიჭიაშვილმა გივი თარგამაძის თვალთვალში და მისი გადაადგილების შესახებ ინფორმაციის მიწოდებაში დარჩო ხეჩუაშვილს დახმარება სთხოვა ოდესაში კარგ თანამდებობაზე დანიშვნის სანაცვლოდ, რაზეც მსჯავრდებული დათანხმდა და მათ საერთო ნაცნობ „დიმასთან“ ერთად, გივი თარგამაძის თვალთვალი და გადაადგილების კონტროლი დაიწყო.” – აცხადებენ პროკურატურაში.

საქართველოს პრემიერმინისტრი ოპოზიციის ლიდერებზე "თავდასხმის რისკებზე" საუბრობს

“ჩვენ მუდმივ რეჟიმში ვიღებთ ინფორმაციას ოპოზიციური პარტიებიდან და გვაქვს კონკრეტული ინფორმაცია”

დარჩო ხეჩუაშვილის ჩვენებით, ისინი გივი თარგამაძეს თავდაპირველად მისი კუთვნილი „მერსედესის“ მარკის ავტომანქანით უთვალთვალებდნენ, ხოლო შემდეგ „დიმამ“ ხეჩუაშვილის კუთვნილი ავტომანქანის იდენტური, ტრანზიტული სანომრე ნიშნების მქონე სხვა ავტომანქანა მიიყვანა და ხეჩუაშვილს განუცხადა, რომ გივი თარგამაძის სათვალთვალოდ ეს კონკრეტული მანქანა გადასცეს, რომელსაც თვალთვალის დროს ძირითადად ხეჩუაშვილი მართავდა.

“მსჯავრდებულის განცხადებით, ერთ-ერთი მორიგი თვალთვალის დღეს, კერძოდ 2016 წლის 4 ოქტომბერს, ქალაქ თბილისში, კოლმეურნეობის მოედანზე არსებულ „ნაციონალური მოძრაობის“ ოფისთან მყოფმა დარჩო ხეჩუაშვილმა ტელეფონის საშუალებით აცნობა შოთა ჭიჭიაშვილს, რომ გივი თარგამაძე „ნაციონალური მოძრაობის“ ოფისში შევიდა.

მას შემდგომ, რაც გივი თარგამაძემ დატოვა პარტიის ოფისი და ჩაჯდა ავტომანქანაში, აღნიშნულის შესახებ მსჯავრდებულმა კვლავ მიაწოდა ინფორმაცია შოთა ჭიჭიაშვილს, რის შემდეგაც გივი თარგამაძის ავტომანქანა აფეთქდა. ავტომანქანის აფეთქების შემდგომ ხეჩუაშვილმა შოთა ჭიჭიაშვილს შეატყობინა გივი თარგამაძის ავტომანქანის აფეთქების თაობაზე, რის შემდგომაც შოთა ჭიჭიაშვილის მითითებით, საქართველოს ტერიტორია დატოვა და საქართველოს სახელმწიფო საზღვრის გვერდის ავლით თურქეთის ტერიტორიაზე უკანონოდ გადავიდა.” – წერია პროკურატურის გავრცელებულ განცხადებაში.

ორი გვამი, გირგვლიანის საქმე, ციხის კადრები – რას ამბობს ხმაურიან საქმეებზე ვანო მერაბიშვილი

მოკლედ ყველაზე მთავარი

“ამ ცირკში მონაწილეობას არ ვაპირებ” – თარგამაძე თავისი მკვლელობის მცდელობის საქმეზე

“მე ამ ცირკში მონაწილეობას არ ვაპირებ, [ხეჩუაშვილი] ჩაჯდება ციხეში და იტყვის, მიშამ, ან ნაცებმა, ან გლობალური ომის პარტიამ და დამავალაო” – გივი თარგამაძე პროკურატურის განცხადებას 20 სექტემბერს გამოეხმაურა, როდესაც ცნობილი გახდა ინფორმაცია მისი მანქანის აფეთქებაში მსჯავრდებული ხეჩუაშვილის დაკავების შესახებ.

“ძალზედ ნათელია რასაც ივანიშვილი აკეთებს. ერთი ტერაქტით ორ არჩევნებზე ზემოქმედება, ჩემი აზრით, ქოცებისთვისაც ნამეტანია.

ისევ ძველი ვერსია – უკრაინა, თავისიანებმა გაწირეს…გამოძიება დაწყებულიც არ იყო, ტერაქტიდან წუთები იყო გასული, როცა ეს ვერსია შემოაგდო მთავრობამ

ახლაც, დღეების წინ უკვე დააანონსა კობახიძემ იგივე – უკვე იცოდა, როგორც ჩანს, რომ ხეჩუაშვილს “დააკავებდნენ”.

ახლა თავისივე დარჩო ხეჩუაშვილს თანხას ჩაახუტებენ.

ისიც ჩაჯდება და იტყვის, მიშამ, ან ნაცებმა, ან გლობალური ომის პარტიამ და ა.შ. დამავალაო.

მე ამ ცირკში მონაწილეობას არ ვაპირებ. სულ რაღაც ორ თვეში მოვა ის დრო, ყველაფერი რომ ცხადად გამოაშკარავდება.

მოთმინება მაქვს. ამ წარმოდგენის მსახიობებმა იდარდონ თავის ბედზე…

PS. მაშინ მთელი პროპაგანდა ხეჩუაშვილის მამის ერთმა კომენტარმა ჩამოუქცია – რა კიევი, რის კიევი – მოსკოვში დადიოდაო.” – წერდა თარგამაძე.