"ივანიშვილი, რა თქმა უნდა, დასავლეთთან ვაჭრობს ჩვენი ქვეყნის მომავლით" - ინტერვიუ გიორგი ბაჩიაშვილთან
გიორგი ბაჩიაშვილის ინტერვიუ
თანაინვესტირების ფონდის ყოფილმა ხელმძღვანელმა და ბიძინა ივანიშვილის გარემოცვის ერთ-ერთმა ყველაზე ახლო წევრმა (ის 10 წლის განმავლობაში ბიძინა ივანიშვილის ფულს განკარგავდა), გიორგი ბაჩიაშვილმა “ტვ პირველის” ეთერში ბიძინა ივანიშვილზე ისაუბრა. მისი თქმით, ივანიშვილის ქველმოქმედება “დიდი ტყუილია” და ის რუსი პენსიონერების ძარცვით გამდიდრდა.
გიორგი ბაჩიაშვილი დეტალურად ჰყვება, როდის და რატომ დაეძაბა ბიძინა ივანიშვილთან ურთიერთობა. თანაინვესტირების ფონდის ყოფილი ხელმძღვანელი პირდაპირ ამბობს, რომ დაპირისპირება მას შემდეგ დაიწყო, რაც მან უკრაინაში რუსული აგრესიის დაგმობა ღიად დაიწყო.
ბაჩიაშვილის თქმით, ოლიგარქი მაშინაც გაბრაზდა, როცა მისი თქმით, ბიძინა ივანიშვილს არ დაეთანხმა “იმ სიგიჟესა და სისულელეში”, რომელსაც მმართველი პარტიის ლიდერი ავითარებდა და ამბობდა, რომ ” გარე ძალები იყო ჩარეული მისი და Credit Suisse-ის საქმეში”.
გიორგი ბაჩიაშვილი ამბობს, რომ “ბიძინა ივანიშვილი, რა თქმა უნდა, დასავლეთთან ვაჭრობს ჩვენი ქვეყნის მომავლით.”
ბაჩიაშვილი ასევე აცხადებს, რომ “ქართულმა ოცნებამ” ოფშორების კანონი, ბიძინა ივანიშვილის სურვილით შემოიღო, რათა ოლიგარქმა თავი აარიდოს ქონებაზე დაკისრებულ გადასახადს.
“როცა პოლიტიკიდან გადიოდა, არაფერი იცვლებოდა. ისევ ისე დადიოდნენ პრემიერები, მინისტრები, პროკურორები. მე კვირაში ორ-სამჯერ მის რეზიდენციაში ვიყავი. იყო პოლიტიკაში თუ არ იყო, არაფერი იცვლებოდა.” – ამბობს ბაჩიაშვილი.
ივანიშვილი VS ბაჩიაშვილი
გიორგი ბაჩიაშვილს “ქართული ოცნების” დამფუძნებლის, ბიძინა ივანიშვილის კრიპტოვალუტის მითვისებას ედავებიან. პროკურატურის მტკიცებით, საქმე ეხება 2017 წლის ქმედებას. კერძოდ, გამოძიების ცნობით, გიორგი ბაჩიაშვილმა ინვესტორს ჩადებული ინვესტიციიდან მიღებული სრული მოგების სანაცვლოდ, მხოლოდ 536 900 დოლარი გადასცა, ხოლო დარჩენილი, ინვესტორის კუთვნილი, 8 253.13 ოდენობის ბიტკოინი მართლსაწინააღმდეგოდ მიითვისა, რომლის ღირებულება მისი დაუფლების პერიოდში 39 215 820 დოლარს შეადგენდა.
გასული წლის 6 ივლისს თანაინვესტირების ფონდის ყოფილ ხელმძღვანელს აღმკვეთი ღონისძიების სახით 2 მილიონ 500 ათას ლარიანი გირაო შეეფარდა. ამასთან, საქმის გამოძიების დასრულებამდე, მას ქვეყნის დატოვება აეკრძალა. რაც შეეხება ბაჩიაშვილის პოზიციას, როგორც მან განაცხადა, დანაშაული არასდროს ჩაუდენია და მისთვის გაურკვეველია, რატომ არის ამ პროცესში.
რა თქვა გიორგი ბაჩიაშვილმა
გლობალური ომის პარტიის შესახებ
“მე უბრალოდ ივანიშვილის გარემოცვაში ვიყავი ძალიან ცუდი მაგალითი ადამიანის, რომელსაც აქვს თავისი აზრი. მე ვიყავი ერთადერთი ივანიშვილის გარემოცვაში, სხვა არავინ არ ყოფილა, ვინც უკრაინის ომის დაწყებისას აქტიურად, სოციალურ მედიაში დავიწყე აქტიურად რუსეთის აგრესიის დაგმობა და უკრაინის მხარდაჭერა.ესეც ვერ აიტანა ივანიშვილმა.
ვერ აიტანა ის, რომ როდესაც მან საქართველოს გარე პოლიტიკური კურსის მოსატრიალებლად დაიწყო დასავლეთისგან მონსტრის შექმნა, გარე ძალებზე და გლობალურ ომის პარტიაზე და მსგავს სისულელეებზე მაქვს საუბარი – ამას თხზავდა ზუსტად მაშინ, როდესაც იწყებოდა რუსეთ-უკრაინის საბრძოლო მოქმედებები. მე ამაში არ ავყევი, არც დავეთანხმე.
თავადვე თუ სჯერა, რასაც ამბობს?! – რამხელა სისულელეა. მას სჭირდება ეს ნარატივი, რომ დასავლეთისგან დახატოს მონსტრი, რომ ვითომდა ზეწოლა არის ივანიშვილზე და ეს ვაჟკაცი ადამიანი უმკლავდება ამხელა გლობალური ომის პარტიას.
თუ ასეთი ვაჟკაცები არიან, მაგრები არიან და მთელ მსოფლიოს წინ უდგებიან, ვაჟკაცობა ეყოთ და ერთი კაცი დაასახელონ, ვინც არის გლობალურ ომის პარტიაში და ვის გადააყოლა ქვეყნის საგარეო კურსი. გამარჯობას რომ აღარ ეუბნება მთავრობას არცერთი თავმყოვარე ქვეყნის პრემიერი და მეთაური.”
“ბიძინა ივანიშვილი, რა თქმა უნდა, დასავლეთთან ვაჭრობს ჩვენი ქვეყნის მომავლით“
“დღეს ეს არის ჩვენი რეალობა – ივანიშვილი მთელი ცხოვრება ვაჭრობს. დღეს ივანიშვილის ამოცანა არის, რომ რადაც არ უნდა დაუჯდეს, მან შეინარჩუნოს ის გავლენა და ის კონტროლი საქართველოზე, რომელიც მას გააჩნია. ეს არის მისთვის ყველაზე მნიშვნელოვანი.
ბიძინა ივანიშვილი, რა თქმა უნდა, დასავლეთთან ვაჭრობს ჩვენი ქვეყნის მომავლით. ვაჭრობს თავისი ფულის დაბრუნებისთვისაც და, რა თქმა უნდა, ქართველი ხალხი, ამ შემთხვევაში, მას ნამდვილად არ ადარდებს. ივანიშვილს არც ერთხელ არ დაუყენებია ქვეყნის ინტერესი თავის პირად ინტერესზე წინ
ის პოლიტიკაშიც თავისი პირადი პრობლემის მოსაგვარებლად მოვიდა. ის როგორც ამბობს, მას იმდროინდელი ხელისუფლება უკვე ემტერებოდა და არ ენდობოდა, რადგან მას უკვე ჰქონდა შეწყვეტილი ხელისუფლების დაფინანსება. ამას პირდაპირ ამბობს. ივანიშვილი ხალხის სიყვარულით არ მოსულა პოლიტიკაში – ეს არის დიდი ტყუილი.
ცოტა გამეცინა, როდესაც სულიერებაზე და რწმენაზე დაიწყო საუბარი თავის ინტერვიუში, რადგან ივანიშვილი, სულიერება და რწმენა სხვადასხვა რამ არის…
“ივანიშვილის ქველმოქმედება დიდი ტყუილია”
ხშირად ახსენებს ხოლმე ივანიშვილი თავის ხელწერას, რომ “მე სუფთა ხელებით მოვედი და ა.შ… ივანიშვილმა რუსეთში შექმნა ბანკი – Россииский Кредит, ამავდროულად ის ყოველთვის ამისამართებს ხალხს თავის “ვედომოსტის” სტატიაზე. ანუ, თავისივე ინტერვიუზე აკეთებს რეფერენს, რომ ხალხს აჩვენოს, რომ თითქოს “როგორი სუფთა ხელებით მოვედიო”.
რეალურად, მან რა გააკეთა? – ბანკ Россииский Кредит-იდან აიღო დეპოზიტარების ფული, რუსი პენსიონერების და ხალხის თანხა. ამ თანხით შეიძინა დიდძალი აქტივები, რომლებმაც სწორედ ის გახადა მილიარდერი.
შემდეგ ამ ხალხს უთხრა 98-ში, რომ ბოდიში, მე ამ ფულს ვერ გიბრუნებთ, დაგიბრუნებთ 20 წელიწადში გაუფასურებულ რუბლებსო. ამავდროულად კი, ეს მთელი აქტივები თავისთვის დაიტოვა. ნებისმიერ ნორმალურ სახელმწიფოში ეს არის პირდაპირ კრიმინალი დღესაც და მაშინაც. შესაბამისად, ნურავის ნუ ატყუებს თავის სუფთად ნაშოვნ ფულზე.
ჩვეულებრივი თაღლითობაა, ყოველთვის ამბობენ ხოლმე, რომ ნუ მეტყვი როგორ იშოვე შენი პირველი მილიონიო. ეს სწორედ ის პირველი მილიონია, რომლის თქმაც ივანიშვილს ასე ძალიან არ უნდა და რასაც ასე საგულდაგულოდ, ამდენი ხანი მალავდა. ეს უნდა იცოდეს ქართულმა საზოგადოებამ მხოლოდ იმიტომ, რომ როდესაც ამბობს, მე სუფთა ხელებით მოვედი და მე ქველმოქმედი ვარ და კარგი ბიზნესმენი, ხალხმა ხომ უნდა იცოდეს სიმართლე, თუ ვის აძლევს ხმას.
ყველა მისი დიდი მოქმედება, რაც გაუკეთებია, ამ ტყუილით არის შეფარული. რა თქმა უნდა, მას თავის თავზე ლეგენდა აქვს აგებული ყველაზე დიდი ქველმოქმედის. რეალურად ხალხმა უნდა იცოდეს, რომ ეს არის, მხოლოდ და მხოლოდ, შირმა და არანაირი ქველმოქმედი ამ კაცის უკან არ დგას. ეს არის ადამიანი, რომელიც დღეს არის შეშლილი თავისი ძალაუფლებით. რაც უფრო დრო გადის, მით უფრო ძალიან ძლიერად ეჭიდება ამ თავის ხელისუფლებას.”
კრედიტ სუისზე
“მე ვიყავი ის ადამიანი, ვინც აღმოაჩინა საერთოდ კრედიტ სუისში თანხის გაფლანგვა – ივანიშვილის მხარეს ყოველ შემთხვევაში. კრედიტ სუისში არ ვიცი როდის აღმოაჩინეს… მქონდა ყველა დეტალი ამ საქმის გარშემო და ვიყავი მთავარი მოწმე ორივე სასამართლოში.
შესაბამისად, შეიძლება ითქვას, რომ იმ დროისთვის მე ვხელმძღვანელობდი ბიძინა ივანიშვილისთვის თავის ცხოვრებაში ყველაზე მნიშვნელოვან ფინანსურ საქმეს… ეს საქმე ბოლომდე ისე მივუყვანე, რომ ყველა სასამართლოში ყველა პუნქტი, რომელზეც ჰქონდა ნაჩივლები, დააკმაყოფილა სასამართლომ. ბერმუდამაც და სინგაპურმაც.
მე არ დავეთანხმე იმ სიგიჟეში, თითქოს რაღაც გარე ძალები იყო ჩარეული მის და კრედიტ სვისის საქმეში, თუკი რამე ძალები იყო ჩარეული მის და კრედიტ სუისის საქმეში, ყველა ძალა იყო ივანიშვილის სასარგებლოდ, რადგან აბსოლუტურად ყველა სასამართლო მოგებული გვაქვს.
მაგრამ არ დაგავიწყდეთ, რომ კრედიტ სუისი მსოფლიოში ერთ-ერთი ყველაზე დიდი საფინანსო ინსტიტუტია. იურისტების არმიაც ჰყავთ და მაგათ ყველაზე კარგად იციან, როგორ გაწელონ საქმეები. მოსამართლემ ამის გამო გააკრიტიკა კიდეც, მაგრამ იმის თქმა, რომ ვინმე ამაში ჩარეული იყო, არის უბრალოდ სიგიჟე.”
“ოფშორების კანონით, 1 სქემაში დაახლოებით $400 მლნ მოპარა ხალხს”
“დღეს შემოღებული ოფშორების კანონი – ეს კანონი რეალურად შემოიტანა ისეთ დროს, როცა იყო რუსული კანონის გარშემო აურზაური, ანუ მისთვის გასაგებად, რუსულად რომ ვთქვათ “პოდ შუმოკ” – გააძვრინა.
რეალურად რისთვის იყო ეს გაკეთებული: ივანიშვილმა 2022 წელს, და თვითონვე თქვა, თავის გამოსვლაში, ჩემი ნახატების კოლექციას არ მატანდნენ ამერიკიდანო თუ საიდანაც მოჰქონდა. გამოატანეს და მან შემოიტანა საქართველოში დაახლოებით 1 მილიარდი დოლარის ღირებულების კოლექცია. რა თქმა უნდა მას არ უნდოდა არც დღგ-ს გადახდა, არც ქონების გადახდა, და არც მოგების გადახდა ამ ნივთებზე.
შესაბამისად ეს კანონი ითვალისწინებს 3 რამეს:
1 – რომ ამ გადმოცემული აქტივებისგან, ეს აქტივები გათავისუფლდება მოგების გადასახადიდან, ანუ მომავალში რომ გაყიდის ამ აქტივებს მოგებით, გადასახადი ამას არ ექნება. შესაბამისად მილიარდის კოლექცია, 10 წელიწადში ან 5 წელიწადში რომ გაყიდოს 2 მილიარდად, ის 200 მილიონი დოლარი, რომელიც უნდა გადაიხადოს ბიუჯეტში, მან უბრალოდ ამოიღო ქართველი ხალხის ჯიბიდან.
ასევე ის განბაჟების და დღგ-ს საფასური, მილიარდ დოლარზე დაახლოებით უწევს 180 მილიონი დოლარი, მან ასევე ამოიღო ქართველი ხალხის ჯიბიდან. და ეს ქონების წლიური გადასახადი – 1%, რომელსაც ყველა იხდის თავის სახლზე, ქონებაზე, ყველა კომპანია იხდის თავის აქტივებზე – წელიწადში 10 მილიონი დოლარი პირდაპირ ამოიღო ქართველი ხალხის ჯიბიდან.
ანუ ერთ ოპერაციაში დაახლოებით 400 მილიონი დოლარი მოჰპარა სახელმწიფოს. ამავდროულად ყიდულობს ივანე ზოსიმეს ხელნაწერს, რომ რამენაირად ზემოქმედება გააკეთოს მორწმუნე ხალხის არჩევანზე. ამას აპიარებს და მეორე ხელით ჰპარავს მილიარდ ლარს თავის ქვეყანას. ასეთი ქველმოქმედია ბიძინა ივანიშვილი.”
“პირველად ვამბობ საჯაროდ, რომ 2012 წელს, როდესაც ბიძინა ივანიშვილს პირადად არც კი ვიცნობდი, კრიტიკულ მომენტში მნიშვნელოვანი დახმარება აღმოვუჩინე – როდესაც ქართუ ბანკში შესული იყო დროებითი მმართველი და მას დაყადაღებული ჰქონდა ყველაფერი.
საერთოდ ფინანსებზე წვდომა არ ჰქონდა, რომ განეხორციელებინა საარჩევნო კამპანია. მაშინ მას პირადი რისკის ფასად დავეხმარე, რამაც შესაძლებელი გახადა, რომ სრულად დაეფინანსებინა არჩევნები. მაშინ მე მტკიცე სამოქალაქო პოზიცია მქონდა და ვთვლიდი, რომ საქართველოში ხელისუფლება უნდა შეცვლილიყო, ამიტომ დავეხმარე მას. მე ამისთვის არაფერი მომითხოვია – არც გასამრჯელო, არაფერი. იმ დროს საქართველოს სჭირდებოდა ცვლილებები.
დღესაც, ჩემი სამოქალაქო პოზიციაა, რომ საქართველოში აუცილებელია ხელისუფლების დემოკრატიული გზით ცვლილება და ასეთ დროს გაჩუმება შენი თავისა და ქვეყნის ღალატია, რასაც საკუთარ თავს ვერასდროს ვაპატიებდი.”
“2022-ში ივანიშვილი მიხვდა, რომ მისი ავტოკრატიული ტიპის მმართველობა იყო შეუთავსებელი ევროკავშირთან”
“2022 წელს მისთვის გახდა ცხადი, რომ მისი ავტოკრატიული ტიპის მმართველობა იყო შეუთავსებელი ევროკავშირთან. ივანიშვილი იმ გავლენებით, როგორი გავლენაც ჰქონდა და როგორ მჭიდრო მარწუხებშიც ჰყავდა მთელი ქვეყანა მოქცეული, შეუთავსებელი იყო და ვერ შევიდოდი ევროკავშირში. შესაბამისად, მან გადაწყვიტა ამ დასავლეთის და ევროკავშირის დემონიზება.
ამისთვის, თავისი კრედიტ სუისის ქეისიც მოიხმარა, თითქოს, ვიღაცა, რაღაცით აშანტაჟებდა – მერე დაიწყო ზაზა შათირიშვილის მეშვეობით, წერილების გამოქვეყნება. მე ვიცი, ეგ ნაშრომები იწერებოდა – თვითონ წერს ამ ნაშრომებს. თავისი მონაწილეობით იწერება ეს ყველაფერი. მას სჭირდებოდა კარგი მიზეზი, რომ მოეტრიალებინა საგარეო ურთიერთობები და ეს კარგი მიზეზი იყო კრედიტ სუისის საქმე, სადაც არანაირი გავლენა, არანაირ დასავლურ ძალას არ ჰქონია. თუკი რაიმე გავლენა ვინმეს ჰქონდა, ეს მხოლოდ ივანიშვილის სასარგებლოდ იყო.”
________________________
გიორგი ბაჩიაშვილმა “ტვ პირველს” უთხრა, რომ მის მიერ გამოთქმული ინფორმაცია ეფუძნება მის 14 წლიან მუშაობას ბიძინა ივანიშვილთან და მის სტრუქტურებში. თანაინვესტირების ფონდის ყოფილი ხელმძღვანელის თქმით, მტკიცებულებები იქნა მოპოვებული და ეყრდნობა დოკუმენტებს, სხვადასხვა პირად საუბრებს ივანიშვილთან და მის გარემოცვასთან, მის ანალიზს და საჯარო ინფორმაციას. ბაჩიაშვილი ამბობს, რომ მის მიერ ამ ინტერვიუში გამოხატული შეხედულებები და მოსაზრებები გადაუდებელი ეროვნული ინტერესების საკითხია და არის მისი პირადი პოზიცია და შეხედულებები.
