პოლიტოლოგმა გია ხუხაშვილმა „პალიტრანიუსის“ გადაცემაში სალომე ზურაბიშვილზე ისაუბრა, რომელსაც 7 ივნისს მმართველი პარტია “ქართული ოცნება” დაუპირისპირდა და განაცხადა, რომ პრეზიდენტი მიზანმიმართულად უქმნის დაბრკოლებას ეროვნული ბანკის საქმიანობას.
გია ხუხაშვილი:
“სალომე ზურაბიშვილის მენეჯერული თვისებები კატასტროფაა, ორ ბატს ვერ ჩააბარებს ადამიანი, ამდენად, არც ბიძინა ივანიშვილისთვისაა სანდო. ეროვნული ბანკის საბჭოს ერთ-ერთ წევრად ლაშა ხუციშვილის კანდიდატურასთან დაკავშირებით „ქართულ ოცნებასა” და სალომე ზურაბიშვილს შორის არსებული დაპირისპირება პიროვნულ ჭრილში არსებული „გარჩევებია“.
სალომე ამით თამაშობს, რომ ვითომ პრინციპულ გადაწყვეტილებებს იღებს. თუ პრინციპული გადაწყვეტილების მიღება უნდა, მას ბევრად უფრო მნიშვნელოვანი გადაწყვეტილებების მიღება შეუძლია, ვიდრე ეროვნული ბანკის საბჭოს წევრების და სამომავლოდ სავარაუდო თავმჯდომარის წარდგენაა. ხუციშვილის თემა აქ არ არის პრინციპული, პრინციპული აქ ის არის, ვინ უფრო მაგარია და რაღაცას ვაჭრობს.
რაც შეეხება პრეზიდენტის იმპიჩმენტს: იმპიჩმენტის რესურსი არ აქვს „ქართულ ოცნებას“ – ეს იციან ძალიან კარგად და არც სჭირდებათ. მათი გაგებით სალომე „სასარგებლო ბრიყვის“ როლს თამაშობს საერთაშორისო არენაზე ამ ხელისუფლებისთვის იმიტომ, რომ ამათ მამაძაღლობას ყველაფერს პირს ბანს საერთაშორისო ტრიბუნაზე.
სალომე ზურაბიშვილი „მარტო სახლშია“, მშვენივრად ეპრანჭება დასავლეთს, ავტორიტეტი გაიმყარა დასავლეთში და აქაც სულ აჩენს ყალბ მოლოდინებს, იპოვა ეს ნიშა და ამ ნიშაშია.”
მმართველი პარტია “ქართული ოცნების” პოლიტიკური საბჭო პრეზიდენტ სალომე ზურაბიშვილს ეროვნული ბანკის “ჯეროვანი საქმიანობის დაბრკოლებაში” ადანაშაულებს. მათი განმარტებით, ზურაბიშვილი მზად იყო, ეროვნული საბჭოს ერთ-ერთ წევრად ლაშა ხუციშვილის კანდიდატურა წარედგინა, რითაც ბანკის პრეზიდენტის დანიშვნაც შესაძლებელი გახდებოდა, თუმცა ზურაბიშვილმა შეთანხმება დაარღვია.
“ქართული ოცნება” აცხადებს, რომ ასეთ პირობებში, საქართველოს პარლამენტს მოუწევს ვეტოს დაძლევა და საქართველოს ეროვნული ბანკის შესახებ ორგანულ კანონში შესატანი იმ ცვლილებების საბოლოოდ მიღება, რომლის მიზანი ეროვნული ბანკის შეუფერხებელი საქმიანობის უზრუნველყოფა იყო. ვეტოს დაძლევის პროცედურას საქართველოს პარლამენტი მომდევნო სასესიო კვირაში დაასრულებს.
განცხადებაში ასევე აღნიშნულია, რომ მმართველი გუნდი “ვერ დაუშვებს” ინსტიტუციურ კრიზისს ვერცერთ სახელმწიფო ინსტიტუტში და იზრუნებს თითოეული კონსტიტუციური ორგანოს გამართულ ფუნქციონირებაზე. მათივე თქმით, ეს არის მმართველი გუნდის პასუხისმგებლობა სახელმწიფოსა და ქართველი ამომრჩევლის წინაშე.
