ირაკლი ღარიბაშვილი: ჯერ ტერიტორიული პრობლემები უნდა გადავწყვიტოთ და შემდეგ გავხდეთ NATO-ს წევრი
ღარიბაშვილი NATO-ზე
საქართველოს პრემიერმინისტრის, ირაკლი ღარიბაშვილის თქმით, საქართველომ ჯერ ტერიტორიული პრობლემები უნდა გადაწყვიტოს და შემდეგ გახდეს NATO-ს წევრი. ამის შესახებ მან კატარის ეკონომიკურ ფორუმზე გამოსვლისას განაცხადა.
პრემიერმა ასევე ხაზი გაუსვა, რომ ხელისუფლების მოტივაციაა, საქართველო გახდეს NATO-ს წევრი და ეს დამოკიდებულია “ჩვენს სტრატეგიულ მზაობასა და მოთმინებაზე.”
მთავრობის მეთაურის განმარტებით, დღევანდელი მთავრობის პოლიტიკა შემდეგია – ტერიტორიული მთლიანობა და სუვერენიტეტი აღვადგინოთ მშვიდობიანი მოლაპარაკებების საფუძველზე:
“ვლადიმირ პუტინთან კონტაქტი არ გვქონია მას შემდეგ, რაც მოვედით ხელისუფლებაში. 2012 წლიდან არანაირი პოლიტიკური კონსულტაცია არ გვქონია, მხოლოდ ეკონომიკური სავაჭრო ურთიერთობები არსებობს.”
მისივე თქმით, 2008 წელს მსოფლიოში არავინ დაუთმო საკმარისი ყურადღება რუსეთის შემოჭრას საქართველოში – “მსოფლიოს ამაზე ადეკვატური, სწორი რეაქცია არ ჰქონია.”
“არანაირი სანქციები არ დაუწესდა რუსეთს, არაფერი! ამდენად, 2014 წელს მსოფლიო გაოცებული დარჩა, როდესაც ყველამ ვიხილეთ ყირიმის ანექსია. სულ ახლახან, 2022 წელს გავხდით უკრაინაში რუსეთის სრულმასშტაბიანი შეჭრის მომსწრე.” – ამბობს ღარიბაშვილი.
მთავრობის ინფორმაციით, პრემიერმინისტრი ირაკლი ღარიბაშვილი NATO-ს გენერალურმა მდივანმა, იენს სტოლტენბერგმა მადრიდის სამიტზე მიიწვია.
სამიტი 28-30 ივნისს გაიმართება. მთავრობის მიერ გამოქვეყნებულ წერილში აღნიშნულია, რომ სამიტის ფარგლებში გამართულ დისკუსიებში გლობალურ გამოწვევებზე უნდა იმსჯელონ.
წერილში აღნიშნულია ისიც, რომ სამიტზე აქცენტი უნდა გაკეთდეს გლობალურ გამოწვევებზე და მათ შორის განსაკუთრებით გამახვილდეს ყურადღება ჩინეთის მზარდ ძალაუფლებაზე და გავლენის არეალზე, ასევე ალიანსის ინტერესებისა და უსაფრთხოების სფეროში მის შედეგებზე:
“მადრიდის სამიტზე მოკავშირეებს შორის შეთანხმდება ახალ სტრატეგიული კონცეფცია, რომელიც ალიანსის საკვანძო პრინციპებისა და ამოცანების განსაზღვრას მოახდენს უფრო საშიში და არაპროგნოზირებადი სამყაროსადმი ალიანსის შესამზადებლად. ხსენებული კონცეფციით მოხდება ახალი პოლიტიკის განმტკიცება რუსეთის მიმართ.”
