"ვარჯიშის დროს მხარი იღრძო". სად გაქრა ღარიბაშვილი?
ღარიბაშვილი ამერიკულ ჰოსპიტალში
მმართველ პარტიაში, “ქართულ ოცნებაში” დაადასტურეს, რომ პარტიის თავმჯდომარე, საქართველოს ყოფილი პრემიერ-მინისტრი ირაკლი ღარიბაშვილი თბილისის ერთ-ერთ კლინიკაში, “ამერიკულ ჰოსპიტალში” მართლაც მოხვდა ჯანმრთელობის პრობლემის გამო.
“ოცნების” განმარტებით, პარტიის თავმჯდომარემ ირაკლი ღარიბაშვილმა „ვარჯიშისას მხარი დაიზიანა“, რის გამოც მას „მცირე სამედიცინო დახმარება“ დასჭირდა და ამიტომ იმყოფებოდა „ამერიკულ ჰოსპიტალში“.
ამ განცხადების გაკეთება მმართველ გუნდს მას შემდეგ მოუხდა, რაც მედიაში გავრცელდა ინფორმაცია, რომ ყოფილი პრემიერი მრავლობითი დაზიანებებით “ამერიკულ ჰოსპიტალში” მიიყვანეს.
“ჯემნიუსს” ორმა წყარომ სამედიცინო სფეროდან დაუდასტურა, რომ ყოფილი პრემიერი მართლაც იმყოფებოდა ჰოსპიტალში.
პირველმა აღნიშნული ინფორმაცია “მთავარმა არხმა” 10 დეკემბერს გაავრცელა. ინფორმაციაში ნათქვამი იყო, რომ ღარიბაშვილს ფიზიკურად გაუსწორდნენ მისივე თანაგუნდელები. თუ ვინ კონკრეტულად, არ იყო დასახელებული.
„ვრცელდება ცნობები ოლიგარქის გუნდში სავარაუდო ფიზიკური დაპირისპირების შესახებ,” – იუწყებოდა მთავარი არხი.
მანამდე, ივანიშვილთან წარსულში დაახლოებულმა პირმა, გიორგი ბაჩიაშვილმა, რომელსაც მედია „ივანიშვილის პირად ბანკირს“ უწოდებს, განაცხადა, რომ ირაკლი ღარიბაშვილი „ორ კვირაზე მეტია, არ გამოჩენილა ოფისში“.
ბაჩიაშვილის ვერსიით, ღარიბაშვილი განუდგა პარტიას და ჰქონდა პირდაპირი კონფლიქტი ირაკლი კობახიძესთან. მისი თქმით, ღარიბაშვილი თავის დროზე პრემიერობიდან იმიტომ გაათავისუფლეს, რომ მან უარი თქვა მეორედ “რუსული კანონის” ინიცირებაზე, ხოლო ყაველაშვილის პრეზიდენტად წარდგენის შემდეგ კი, კონფლიქტი კიდევ უფრო გამწვავდა. ბაჩიაშვილის თქმით, პარტიასთან კონფლიქტში იმყოფება ასევე იუსტიციის და კულტურის ყოფილი მინისტრი, “ქართული ოცნების” ერთ-ერთი ყველაზე სტაჟიანი და ოდიოზური სახე, თეა წულუკიანი.
10 დეკემბერს, ბაჩიაშვილმა უთხრა ტვ პირველს: „დღეს ხმა გამოვიდა, რომ ღარიბაშვილი ტრავმატოლოგიურში იყო სხვადასხვა დაზიანებით. არ ვიცი, რას უკავშირდება, მაგრამ საიდუმლოებით მოცული ამბავია“.
ღარიბაშვილის “ამერიკულ ჰოსპიტალში მკურნალობის ფაქტს ადასტურებს “რადიო თავისუფლების” წყაროც. წყაროს ცნობით, ღარიბაშვილმა „ამერიკულ ჰოსპიტალში“ გაიარა კონსულტაცია ტრავმატოლოგთან – მას დაბეჟილობა აღენიშნებოდა.
____________________________________
რამდენიმე დღის წინ ოპოზიციურ მედიაში გავრცელდა ინფორმაცია, რომ ღარიბაშვილმა დატოვა პარტია. ღარიბაშვილის ოჯახთან დაახლოებულმა წყარომ “ჯემნიუსს” ასევე დაუდასტურა, რომ ყოფილი პრემიერი “ბიზნესში” გადადის.
ექსპრემიერი „ქართული ოცნების“ საარჩევნო სიის მესამე ნომერი იყო – ბიძინა ივანიშვილისა და ირაკლი კობახიძის შემდეგ, თუმცა 10 დეკემბერს პარლამენტის სხდომაზე ირაკლი ღარიბაშვილს, მის რვა თანაგუნდელთან ერთად, გაუუქმდა პარლამენტის სადეპუტატო მანდატი.
