საერთაშორისო უფლებადაცვითმა ორგანიზაცია Freedom House-მა წლიური ანგარიში, „თავისუფალი ინტერნეტი 2021“, გამოაქვეყნა.
უფლებადამცველთა ანგარიშში გაანალიზებულია ინტერნეტის თავისუფლებასთან დაკავშირებით არსებული სიტუაცია მსოფლიოს ექვსი რეგიონის 70 ქვეყანაში. Freedom House-ი აღნიშნავს გლობალური თავისუფლების ზოგად გაუარესებას ბოლო 11 წლის განმავლობაში.
სამხრეთ კავკასიის ქვეყნებიდან საქართველოში ინტერნეტის თავისუფლება ყველაზე უკეთ, 77 ქულით შეფასდა. სომხეთს – 71 ქულა აქვს. ორივე ქვეყანა თავისუფალი ინტერნეტის ზონაში მოხვდა.
რაც შეეხება აზერბაიჯანს, აქ არსებული მდგომარეობა 35 პირობითი ქულით შეფასდა და არათავისუფალი ინტერნეტის მქონე ქვეყნებს არის მიკუთვნებული. ასეთივე ვითარებაა თურქეთში (34), ყაზახეთში (33), ბელარუსში (31), რუსეთსა (31) და ირანში (16)
ოფიციალური ბაქო ინტერნეტში ცენზურასთან დაკავშირებით არსებულ ბრალდებებს უარყოფს, აცხადებს, რომ მსოფლიო ქსელი აზერბაიჯანში სრულიად თავისუფალია.
ამის მიუხედავად, დღეისათვის, აზერბაიჯანში ადგილობრივი სასამართლოების გადაწყვეტილებით აკრძალულია წვდომა რამდენიმე დამოუკიდებელი მედიასაშუალების ვებგვერდზე. ცოტა ხნის წინ ცნობილი გახდა, რომ ხელისუფლება ჯაშუშური პროგრამა Pegasus-ის საშუალებით აზერბაიჯანში ათობით პოლიტიკურად აქტიურ მოქალაქესა და ჟურნალისტს უსმენდა.
