ფინანსთა მინისტრი: გაზრდილია ქვეყანაში შემომსვლელთა და გამსვლელთა რაოდენობა
ქვეყანაში შემომსვლელთა და გამსვლელთა რაოდენობა
საქართველოს ფინანსთა მინისტრი ლაშა ხუციშვილი ნაწილობრივი მობილიზაციის გამოცხადების შემდეგ რუსეთ-საქართველოს საზღვარზე შექმნილ ვითარებას ეხმაურება და ამბობს, რომ გაზრდილია როგორც ქვეყანაში შემომსვლელთა, ისე გამსვლელთა რაოდენობა.
“შემოსავლების სამსახური მუშაობს ნამდვილად განსაკუთრებული დატვირთვის პირობებში, რა თქმა უნდა, ყველა ვხედავთ, რომ გაზრდილია ნაკადები როგორც სატვირთო მიმართულებით, ასევე ფიზიკური პირების, რომლებიც კვეთენ საქართველოს საზღვარს. სიტუაცია ექვემდებარება კონტროლს, არანაირი დრამატული სიტუაცია არ არის საზღვრის კვეთასთან დაკავშირებით, გაზრდილია როგორც ქვეყანაში შემომსვლელთა რაოდენობა, ასევე, ქვეყნიდან გამსვლელების რაოდენობა და შესაბამისად, მკაცრად ხდება ამ საკითხების მონიტორინგი.” – განაცხადა ლაშა ხუციშვილმა.
დღეს ზემო ლარსის საკონტროლო-გამშვებ პუნქტთან რუსი სამხედროები ჯავშანტრანსპორტიორით გამოჩნდნენ. თავიდან გავრცელებული ინფორმაციით, საქართველოს საზღვართან, რუსეთის მხარეს, ოკუპანტებს ბლოკ-პოსტი უნდა გაემართათ, თუმცა მოგვიანებით ФСБ-მ განმარტა, რომ ჯავშანტრანსპორტიორი გაიგზავნა ზემო ლარსის სასაზღვრო გამშვებ პუნქტში იმ შემთხვევისთვის, თუ რიგში მდგომი ხალხი გადაწყვეტს საზღვრის გარღვევას.
„ეს არის, უხეშად რომ ვთქვათ, რეზერვი იმ შემთხვევისთვის, თუ იქ მდგომი ხალხი საგუშაგოს გარღვევას გადაწყვეტს”, – აცხადებენ უწყებაში.
მათივე ცნობით, საგუშაგო ჩვეულ რეჟიმში მუშაობს და სამხედრო ასაკის მამრობითი სქესის მოქალაქეების გასვლაზე არანაირი შეზღუდვა არ დაწესებულა.
26 სექტემბერს გამოცემა Meduza-მ რუსეთის პრეზიდენტის ადმინისტრაციასთან დაახლოებულ წყაროზე დაყრდნობით გაავრცელა ინფორმაცია, რომ რუსეთის ხელისუფლება სამობილიზაციო ასაკის კაცებისთვის საზღვრების ჩაკეტვას აპირებს. მისივე თქმით, აკრძალვის შემოღების ყველაზე სავარაუდო თარიღი 28 სექტემბერია.
ვლადიმერ პუტინმა რუსეთში ნაწილობრივი სამხედრო მობილიზაცია 21 სექტემბერს გამოაცხადა. პირველ ეტაპზე 18-35 წლის მამაკაცებს გაიწვევენ, შემდეგ 35-45 და ა.შ. რუსული მედია წერს, რომ რუსმა ახალგაზრდებმა უკვე მასობრივად მიიღეს გაწვევის ცნობები. მოსახლეობის ნაწილში პანიკაა. რუსეთის ქალაქებში საპროტესტო აქციები დაიწყო.
თავდაცვის მინისტრის სერგეი შოიგუს ცნობით, მობილიზაცია 300 000-მდე რუსეთის მოქალაქეს შეეხება, თუმცა გამოცემა Novaya Gazeta.Europe წყაროზე დაყრდნობით აცხადებს, რომ მობილიზაციის შესახებ დადგენილების მეშვიდე, საიდუმლო პუნქტი, თავდაცვის სამინისტროს საშუალებას აძლევს, 1 მილიონამდე ადამიანი გაიწვიოს.
