გამონაკლისი ბრძანება: ეროვნულმა ბანკმა ფარცხალაძეს ანგარიშებზე წვდომა აღუდგინა

ფარცხალაძეს ანგარიშებზე წვდომა აღუდგა

ყოფილი გენერალური პროკურორის, ოთარ ფარცხალაძის დასანქცირების შემდეგ, ეროვნულმა ბანკმა სანქციათა რეჟიმების წესში ცვლილება შეიტანა და ფარცხალაძეს ანგარიშებზე წვდომა აღუდგინა.

ეროვნული ბანკის განცხადებით, მიაჩნიათ, რომ საქართველოს მოქალაქეზე არ შეიძლება გავრცელდეს საერთაშორისო სანქციები, თუ ქართულ სასამართლოში მის მიმართ შესაბამის საქმეზე არ დადგა გამამტყუნებელი განაჩენი.

სებ-ი ასევე განმარტავს, რომ საქართველო არასდროს იქცევა სანქციების გვერდის არიდების ადგილად”, თუმცა, იქვე აღნიშნავს, რომ ოთარ ფარცხალაძის შემთხვევა საქართველოს მოქალაქისთვის სანქციის დაწესების “პირველი პრეცედენტია”.

ამ ცვლილებას წინ უძღოდა “ქართული ოცნების” თავმჯდომარის, ირაკლი კობახიძის განცხადება, რომელმაც არაკონსტიტუციური უწოდა ეროვნული ბანკის გადაწყვეტილებას ფარცხალაძისთვის ანგარიშებზე წვდომის შეზღუდვაზე. მისივე მტკიცებით, ირღვეოდა უდანაშაულობის პრეზუმფციის პრინციპიც.

ფარცხალაძის დასანქციერაბს გამოეხმაურა საქართველოს გენერალური პროკურატურაც. მათი განმარტებით, “ზოგიერთი პოლიტიკური გაერთიანების წარმომადგენლების მხრიდან” დეზინფორმაციის კამპანია მიზნად საზოგადოების შეცდომაში შეყვანასა და უწყების საქმიანობის ხელის შეშლას ისახავს. პროკურატურის მტკიცებით, ოთარ ფარცხალაძეს პროკურატურის საქმიანობასთან შემხემლობა 2013 წლის შემდეგ არ ჰქონია, მის საქმეს კი სახელმწიფო უსაფრთხოების სამსახური იძიებს.

პრეზიდენტი სალომე ზურაბიშვილი კი აცხადებს, რომ ოთარ ფარცხალაძის მოქალაქეობის შეწყვეტაზე დასკვნის მიღებას შემთხვევაში, მას დააკმაყოფილებს.

“პრეზიდენტი იუსტიციის სამინისტროდან ელოდება ოთარ ფარცხალაძისთვის საქართველოს მოქალაქეობის შეწყვეტაზე დასკვნას, რომელსაც დაუყოვნებლივ დააკმაყოფილებს.” – აღნიშნულია განცხადებაში, რომელიც პრეზიდენტმა გაავრცელა.

● არასამთავრობოები: საქართველოს სპეცსამსახურები რუსული გავლენების გასანეიტრალებლად არ მოქმედებენ
● საქართველოს პრეზიდენტი: ყველაზე დიდი უბედურებაა, როცა ქვეყანაში გენერალური პროკურორი „ეფესბეს“ აგენტი ყოფილა
● უკრაინა ბიძინა ივანიშვილის და მისი გარემოცვის სანქცირებას ითხოვს

14 სექტემბერს ოთარ ფარცხალაძეს ამერიკის შეერთებულმა შტატებმა სანქციები დაუწესა. სანქციების დაწესება ოთარ ფარცხალაძის ბიზნესსაქმიანობას და რუსულ “ეფესბესთან” თანამშრომლობას უკავშირდება. პაკეტის ოფიციალურად გამოცხადებამდე, მედიაში გავრცელდა ინფორმაცია, რომ სანქცირებულთა შორის იყო “ქართველი-რუსი ოლიგარქი”.

აშშ-ის სახელმწიფო დეპარტამენტის ინფორმაციით, რუსეთის უშიშროების ფედერალური სამსახური [“ეფესბე”] ოთარ ფარცხალაძესთან მუშაობდა, რათა მას გავლენა მოეხდინა ქართულ საზოგადოებასა და პოლიტიკაზე რუსეთის სასარგებლოდ.

გარდა ამისა, აშშ-ს სახელმწიფო დეპარტამენტის განცხადებაში ნათქვამია, რომ ფარცხალაძის გარდა, სანქციები დაუწესდა რუსეთის დაზვერვის სამსახურის ოფიცერს, ალექსანდრ ონიშჩენკოს. რომელიც, სავარაუდოდ, “თავის თანამზრახველ ფარცხალაძეს რუსული პასპორტის და, შესაძლოა, რუსეთის მოქალაქეობის მოპოვებაში” დაეხმარა. 

18 სექტემბერს ცნობილი გახდა, რომ საქართველოს ეროვნულმა ბანკმა ყოფილ გენერალურ პროკურორს და აშშ-ს მიერ სანქცირებულ ოთარ ფარცხალაძეს საბანკო აქტივებზე წვდომა და ფინანსური ტრანზაქციების შესრულება შეეზღუდა. მას ყველა ანგარიში გაუყინეს.

როგორც ეროვნულ ბანკში განმარტავენ, სანქცირებულ პირს ეზღუდება როგორც სახსრების განკარგვა, ისე ყველა სახის ფინანსური ოპერაციის განხორციელების შესაძლებლობა.