ევროპარლამენტარები: ვთხოვთ წევრ ქვეყნებს თავი შეიკავონ ქართული ოცნების ლეგიტიმაციისგან
ევროპარლამენტარების განცხადება
ევროპარლამენტარები განცხადებას ავრცელებენ, სადაც აღნიშნავენ, რომ ისინი მშვიდობიანი მომიტინგეების გვერდით დგანან. დეპუტატები ევროკავშირის წევრ ქვეყნებს მოუწოდებენ თავი შეიკავონ ქართული ოცნების “თვითგამოცხადებული ხელისუფლების” ლეგიტიმაციისგან და ამ კონტექსტში მოუწოდებენ ევროკავშირ-საქართველოს ასოცირების საბჭოს მუშაობის შეჩერებას.
ამასთან, მათი განცხადებით, ქართული ოცნება აღარც კი ცდილობს, თავი ევროპის დემოკრატიის მხარდამჭერად წარმოაჩინოს.
განცხადებას ხელს აწერენ:
● საგარეო ურთიერთობათა კომიტეტის თავმჯდომარე დევიდ მაკალისტერი;
● ევრონესტის საპარლამენტო ასამბლეის დელეგაციის თავმჯდომარე, სერგეი ლაგოდინსკი; ● სამხრეთ კავკასიასთან ურთიერთობის დელეგაციის თავმჯდომარე, ნილს უშაკოვსი; ●ევროპარლამენტის მუდმივი მომხსენებელი საქართველოში რასა იუკნევიჩიენე;
● 2024 წლის საპარლამენტო არჩევნებზე ევროპარლამენტის არჩევნებზე სადამკვირვებლო; მისიის ხელმძღვანელი, ანტონიო ლოპეს-ისტურიზ უაითი.
რა წერია განცხადებაში
“ჩვენ ღრმად შეშფოთებული ვართ საქართველოს პოლიტიკური მდგომარეობის კიდევ უფრო გაუარესებით. შოკირებულები ვართ ყოფილი პრემიერმინისტრის, გიორგი გახარიას სასტიკი თავდასხმით ბათუმის ერთ-ერთ სასტუმროში, რის შემდეგაც მას სამედიცინო დახმარება დასჭირდა. ეს არის კიდევ ერთი მაგალითი ძალადობის ესკალაციის, რომელსაც ქართული ოცნება და მისი მოკავშირეები მშვიდობიანი პროტესტისა და დისიდენტების წინააღმდეგ იყენებენ.
ჩვენ მხარს ვუჭერთ მშვიდობიან დემონსტრანტებს, რომლებიც უკვე 50 დღეა ყოველ საღამოს ქუჩებში გამოდიან საქართველოს დემოკრატიული და ევროატლანტიკური მომავლისთვის. წლების განმავლობაში საქართველო იყო ევროატლანტიკური მისწრაფებების ლიდერი, რაც ხალხის ფართო მხარდაჭერით სარგებლობდა. ეს პოზიცია არ შეცვლილა.
რაც შეიცვალა, ისაა, რომ ქართულმა ოცნებამ ქართველებს მომავალი წაართვა და აღარც კი ცდილობს, თავი ევროპის დემოკრატიის მხარდამჭერად წარმოაჩინოს
საქართველოში გაუარესებული მდგომარეობა უპასუხოდ არ უნდა დარჩეს. ჩვენ ვდგავართ იმ პოზიციაზე, რომ ამჟამად პრეზიდენტი სალომე ზურაბიშვილი არის ქართველი ხალხის ნების ერთადერთი აშკარად ლეგიტიმური წარმომადგენელი. ჩვენ არ ვაღიარებთ 2024 წლის 26 ოქტომბრის საპარლამენტო არჩევნების შედეგებს, რადგან ისინი იყო გაყალბებული და არ იცავდნენ დემოკრატიული არჩევნების საერთაშორისო სტანდარტებს. ჩვენ არ ვაღიარებთ ამ ორგანოს მიერ მიღებულ გადაწყვეტილებას.
ჩვენ მტკიცედ მოვუწოდებთ ევროკავშირს და მის წევრ ქვეყნებს, შემოიღონ პირადი სანქციები ყველა იმ პირის მიმართ, ვინც პასუხისმგებელია დემოკრატიის უკანდახევაზე, განსაკუთრებით ბიძინა ივანიშვილისა და ირაკლი კობახიძის მიმართ
ჩვენ მოვუწოდებთ ევროკავშირს და მის წევრ სახელმწიფოებს, შემოიღონ პირადი სანქციები ყველა იმ პირის წინააღმდეგ, ვინც საქართველოს დემოკრატიის უკუსვლაზეა პასუხისმგებელი, განსაკუთრებით ბიძინა ივანიშვილისა და ირაკლი კობახიძის წინააღმდეგ.
ასევე, ვთხოვთ წევრ ქვეყნებსა და რეგიონულ ორგანიზაციებს, თავი შეიკავონ ქართული ოცნების თვითგამოცხადებული ხელისუფლების ლეგიტიმაციისგან და ამ კონტექსტში მოვუწოდებთ ევროკავშირ-საქართველოს ასოცირების საბჭოს მუშაობის შეჩერებას
დაუყოვნებლივ ვთხოვთ, დაინიშნოს ვადამდელი არჩევნები, რომელიც ჩატარდება გაუმჯობესებულ საარჩევნო გარემოში, დამოუკიდებელი და მიუკერძოებელი საარჩევნო ადმინისტრაციის პირობებში, ფართო საერთაშორისო მონიტორინგით, რათა უზრუნველყოფილ იქნას რეალურად თავისუფალი, სამართლიანი და გამჭვირვალე პროცესი, რომელიც გამოხატავს ქართველი ხალხის ნება.”
ევროპარლამენტის საგარეო ურთიერთობათა კომიტეტის თავმჯდომარე დევიდ მაკალისტერი “ინტერპრესნიუსთან“ ინტერვიუში, საქართველოში შექმნილ ვითარებას აფასებს და ამბობს, რომ ევროპარლამენტი ძალიან მკაფიო იყო – ისინი არ ცნობენ საქართველოს მთავრობას და არ ცნობენ პრეზიდენტს.
ამასთან, მაკალისტერი კიდევ ერთხელ მოუწოდებს საქართველოს ხელისუფლებას, გადახედოს ევროკავშირთან მოლაპარაკებების 2028 წლის ბოლომდე შეჩერების თაობაზე მიღებულ გადაწყვეტილებას და ქვეყანაში მიმდინარე საპროტესტო აქციების მონაწილეების მოწოდებები გაითვალისწინოს.
ევროპარლამენტის საგარეო ურთიერთობათა კომიტეტის თავმჯდომარე ამბობს იმასაც, რომ “ქართული ოცნების“ მიერ ახალი არჩევნებისა და დაკავებულთა გათავისუფლების შესახებ მოწოდებების იგნორირების შემთხვევაში, ევროკავშირისგან და სავარაუდოდ, ამერიკის შეერთებული შტატებისგანაც, იქნება მკაცრი ნაბიჯები.
