ევროკომისიის მისია საქართველოში არჩევნების შესასწავლად უახლოეს კვირებში ჩამოვა
ევროკომისიის მისია საქართველოში
ევროკომისიის სპიკერის, პიტერ სტანოს თქმით, საქართველოში 26 ოქტომბრის საპარლამენტო არჩევნების დარღვევების შესწავლის მიზნით ტექნიკური მისია უახლოეს კვირებში ჩამოვა. როგორც “რადიო თავისუფლებასთან” სტანომ განაცხადა, მიმდინარეობს ვიზიტისთვის მზადება.
“საამისოდ მზადება მიმდინარეობს. მისიის შესახებ უფრო მეტი დეტალი შესაფერის დროს გახდება ცნობილი”, – უპასუხა პიტერ სტანომ წერილობით “რადიო თავისუფლებას”.
ევროპის ქვეყნების საგარეო საქმეთა მინისტრების შეხვედრის შემდეგ, ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში ჯოზეფ ბორელი ამბობს, რომ საქართველოში ჩატარებული არჩევნების გამოძიება უნდა ჩატარდეს. ასევე, ბორელის თქმით, ევროკავშირი საქართველოში გაგზავნის მისიას, რომელიც განიხილავს დარღვევებს.
ევროკავშირის წევრი ქვეყნების საგარეო საქმეთა მინისტრების შეხვედრამდე ოთხმა პროდასავლურმა ოპოზიციურმა პარტიამ, რომლებმაც 5%-იანი ბარიერი გადალახეს, 26 ოქტომბრის საპარლამენტო არჩევნების გაყალბების საკითხზე საგარეო პოლიტიკისა და უსაფრთხოების საკითხებში ევროკავშირის უმაღლეს წარმომადგენელს, ჯოზეფ ბორელსა და ევროკავშირის წევრი სახელმწიფოების საგარეო საქმეთა მინისტრებს ერთობლივი წერილით მიმართა, რომელშიც აცხადებს, რომ საპარლამენტო არჩევნებში ოთხმა ოპოზიციურმა ძალამ, ჯამში, ხმების 52% მიიღო, თუმცა “ქართულმა ოცნებამ” შედეგები გააყალბა.
გაყალბების მტკიცებულებად, ოპოზიციის წერილში მაგალითად მოყვანილია დამოუკიდებელი კვლევითი ორგანიზაციების, როგორიცაა Edison Research და HarrisX-ის მიერ ჩატარებული ეგზიტპოლების შედეგები, ამავდროულად, არასამთავრობო ორგანიზაციების ანგარიშები საარჩევნო დარღვევებთან დაკავშირებით.
შეხვედრის დაწყებამდე კომენტარი გააკეთა ჯოზეფ ბორელმა. მისი თქმით, არ შეიძლება რომ თქვა, რომ არჩევნები არ იყო სამართლიანი და ის არ გამოიძიო.
