ექვსმა დეპუტატმა "ქართული ოცნება" დატოვა. ისინი გახარიას გუნდის წევრები არიან
მმართველი პარტია “ქართული ოცნება” ექვსმა დეპუტატმა დატოვა. ისინი ექსპრემიერ გიორგი გახარიასთან ერთად ახალი პარტიის შექმნას და აქტიურობას გეგმავენ. მათივე თქმით, დეპუტატები გიორგი გახარიას გუნდის წევრები არიან და გადაწყვეტილება მასთან ერთად მიიღეს.
ოცნება დატოვეს მეათე მოწვევის პარლამენტის დეპუტატებმა: გიორგი ხოჯევანიშვილმა, მიხეილ დაუშვილმა, ბექა ლილუაშვილმა, ანა ბუჩუკურმა, ალექსანდრე მოწერელიამ და შალვა კერესელიძემ.
“ჩვენ ვიყავით ქართული ოცნების წევრები და, შესაბამისად, ვიზიარებთ იმ წარმატებებსა და წარუმატებლობებს, რაც ამ პერიოდში მოხდა. ამავე დროს, ვგრძნობთ პასუხისმგებლობას შეცდომებზეც და სწორედ ამ პასუხისმგებლობის გრძნობით ვდგამთ ამ ნაბიჯს“, – განაცხადა გიორგი ხოჯევანიშვილმა.
დეპუტატების თქმით, დღეს მოსახლეობას აწუხებს პანდემია, ეკონომიკური კრიზისი, უმუშევრობა და სიდუხჭირე, და არა ის დაუსრულებელი პოლიტიკური პარტიების დაპირისპირება და კინკლაობა, რაც დღეს ქვეყანაში ხდება.
დეპუტატები ამბობენ, რომ საზოგადოებას მეტ ინფორმაციას გიორგი გახარიასთან ერთად უახლოეს მომავალში მიაწვდიან.
პარლამენტის თავმჯდომარემ, არჩილ თალაკვაძემ განაცხადა, რომ დიდი ალბათობით, გიორგი გახარიას გუნდი ვადამდელი არჩევნების მოთხოვნას შეუერთდება, რადგან “ისინი პრაქტიკულად გადავიდნენ ოპოზიციაში.”
“დაველოდებით ვნახავთ რა პარტიას შექმნიან, რა იქნება მათი პოზიციონირება. არსებობს ძალიან ბევრი კითხვა და ამ კითხვებზე პასუხი იქნება გასაცემი. ასეთი ნაბიჯი არის გაუმართლებელი. უბრალოდ სირცხვილია, როდესაც საერთო პასუხისმგებლობას ტოვებ, გადიხარ აქედან და საუბრობ ზუსტად იმ პრობლემებზე, რომელზეც შენც გეკისრება პასუხისმგებლობა და შენც გაქვს ვალდებულება, რომ ამის მოსაგვარებლად იმუშაო”, – აღნიშნა თალაკვაძემ.
_______________________________
● IRI: პატრიარქის შემდეგ, ქვეყანაში ყველაზე რეიტინგული ადამიანი ექსპრემიერი გიორგი გახარიაა
● მესამე ძალა თუ ივანიშვილის სატელიტი? ვინ როგორ აფასებს გახარიას პოლიტიკაში დარჩენას
● რას ნიშნავს გახარიას გადადგომა და ღარიბაშვილის დაბრუნება? გია ნოდიას თვალსაზრისი
________________________________
გიორგი გახარიამ პრემიერ-მინისტრის თანამდებობა 18 თებერვალს დატოვა.
როგორც გახარიამ განმარტა, მისი გადადგომის ერთ-ერთი მთავარი მიზეზი ნიკა მელიას მიმართ გამოტანილი სასამართლოს გადაწყვეტილებაა. მისი თქმით, მას გაუმართლებლად მიაჩნია ნიკა მელიას დაპატიმრება იმ პირობებში, როდესაც არსებობს პოლიტიკური ესკალაციის საფრთხე.
გახარიას თქმითვე, გადადგომის მიზეზია ისიც, რომ აღნიშნულთან დაკავშირებით გუნდთან შეთანხმებას ვერ მიაღწია.