ენტონი ბლინკენი: ფრანგ კოლეგასთან შეხვედრისას საქართველოს საკითხზეც ვიმსჯელეთ
ენტონი ბლინკენის განცხადება
აშშ-ს სახელმწიფო მდივანმა, ენტონი ბლინკენმა საფრანგეთის საგარეო საქმეთა მინისტრთან, ჟან-ნოელ ბაროსთან ერთად გამართულ პრესკონფერენციაზე განაცხადა, რომ შეხვედრაზე მათ საქართველოს საკითხზეც იმსჯელეს.
მან კიდევ ერთხელ გაიმეორა, რომ ქართული ოცნების დემოკრატიული უკუსვლა “ღრმად შემაშფოთებელია” და აღნიშნა, რომ “ქართული ოცნების” მაღალჩინოსნებისთვის სანქციების დაწესება, ასევე მთავრობისთვის განკუთვნილი დახმარების შეჩერება ქართული ოცნების ქმედებების, მათ შორის, არჩევნების შედეგია, რომელმაც “ბევრი კითხვა” გააჩინა.
რას ამბობს ბლინკენი
საქართველოს რაც შეეხება, ჩვენ ამ საკითხზეც ვისაუბრეთ და რაც როგორც აშშ-მ და საფრანგეთმა ნახა, დემოკრატიული უკუსვლაა, რაც ღრმად შემაშფოთებელია. და არა მხოლოდ დემოკრატიული უკუსვლა, არამედ გადახვევა ქართველი ხალხის დიდი უმრავლესობის მისწრაფებებისგან. მისწრაფება, რომ ააშენონ მომავალი, რომელიც უფრო და უფრო ახლოსაა ევროპასთან.
ასე რომ, ამ უკუსვლის გათვალისწინებით; ისეთი მთავრობის ნახვის შემდეგ, რომელიც იმ ხალხის აშკარა ნების წინააღმდეგ მოქმედებს, რომელთა წარმომადგენლობის პრეტენზიაც მას აქვს; იმ არჩევნების გათვალისწინებით, რომელმაც მრავალი კითხვა გააჩინა; მთავრობის მხრიდან რეპრესიული ქმედებების ნახვის შემდეგ იმ ხალხის წინააღმდეგ, რომლებიც ცდილობენ, თავისუფლად და ღიად ლაპარაკს, ჩვენ, ისევე, როგორც ჩვენმა პარტნიორებმა, ნაბიჯები გადავდგით:
ჩვენ სანქციები დავუწესეთ ქართული ოცნების პარტიის ლიდერს, ბიძინა ივანიშვილს, ისევე, როგორც მთავრობის სხვა წევრებს; ჩვენ შევაჩერეთ ამერიკული დახმარება საქართველოს მთავრობისთვის; ეუთო-ში თითქმის ყველა ჩვენს პარტნიორთან ერთად მოქმედებით, მათ შორის, საფრანგეთთან ერთად, ავამოქმედეთ ვენის მექანიზმი ეუთო-ს მეშვეობით, რათა ცხადად გამოგვეხატა, რომ გადადგმული ნაბიჯები, მათ შორის, კანონპროექტი, რომელიც სიღრმისეულად ზღუდავს სამოქალაქო საზოგადოებისთვის გამოხატვისა და მოქმედების თავისუფლების სივრცეს, ეს უნდა შეიცვალოს.
ასე რომ, მგონი აშკარა ერთიანობას ხედავთ ჩვენი მიზნის მხრივ, როცა საქმე ეხება აშშ-ს, საფრანგეთს და მრავალ სხვა ქვეყანას, როდესაც საქართველოში მთავრობის სამწუხარო ქმედებების პირისპირ ვდგავართ.
6 იანვარს საფრანგეთის პრეზიდენტმა ემანუელ მაკრონმა საფრანგეთის ელჩების ყოველწლიურ შეხვედრაზე, საქართველოსა და სხვა პოსტსაბჭოთა ქვეყნების მიმართ რუსეთის აგრესიულ პოლიტიკაზე ისაუბრა და მაგალითად ოქტომბრის საპარლამენტო არჩევნების დესტაბილიზაცია დაასახელა.
“ბოლო წლების განმავლობაში რუსეთმა გაზარდა აგრესია და შეცვალა ამ აგრესიის ხასიათი ევროპელებისა და მსოფლიოს სხვა ნაწილების მიმართ, ჩვენ ამას ვხედავთ სომხეთში, სადაც რუსეთმა უეცრად შეცვალა თავისი მოკავშირეობა და აზერბაიჯანის მოკავშირე გახდა მხოლოდ იმიტომ, რომ სომხები მათ წინააღმდეგობას უწევდნენ, საქართველოში საარჩევნო პროცესების დესტაბილიზაციითა და ბიულეტენების ყუთებში ჩაყრით.“ – განაცხადა მაკრონმა.
მაკრონის განცხადებას გამოეხმაურა საფრანგეთის ელჩი საქართველოში. შერაზ გასრის თქმით, ემანუელ მაკრონი ხაზს უსვამს, რომ საქართველოში ახალი არჩევნები შეიძლება პოლიტიკური კრიზისიდან გამოსავალი იყოს. ამის შესახებ გასრი X-ზე წერს.
“ემანუელ მაკრონი დემოკრატიისა და თავისუფლებისთვის მებრძოლების მხარდაჭერას ჩვენი საგარეო პოლიტიკის პრიორიტეტად ასახელებს. ის საქართველოში დემონსტრანტებისა და სალომე ზურაბიშვილის გამბედაობას აფასებს და ხაზს უსვამს, რომ ახალი არჩევნები შეიძლება პოლიტიკური კრიზისიდან გამოსავალი იყოს.” – წერს გასრი.
