ათი წელიწადი დინკის მკვლელობიდან

19 იანვარს სტამბულში ათასობით ადამიანი გამოვიდა ქუჩაში სომხური წარმოშობის თურქი ჟურნალისტის ჰრანტ დინკის მკვლელობის მე-10 წლისთავის აღსანიშნავად. დინკი 2017 წლის 19 იანვარს მოკლეს გაზეთ „აგოსის“ რედაქციის შენობასთან, რომლის მთავარი რედაქტორიც იყო.

მკვლელობის საქმესთან დაკავშირებით გასამართლდა 18 ადამიანი, ორ მათგანს სამუდამო პატიმრობა მიესაჯა, დანარჩენებს კი – პატიმრობის სხვადასხვა ვადა.კიდევ ერთი – დაზვერვის ყოფილი ოფიცერი, ამ დრომდე ეჭვმიტანილად არის მიჩნეული, თუმცა დაპატიმრებული არ არის.

მოკლული ჟურნალისტის ოჯახის წევრებს მიაჩნიათ, რომ მკვლელობა სათანადოდ არ იყო გამოძიებული და ამ დანაშულთან დაკავშირებულია ზოგიერთი თანამდებობის პირი, რომლებმაც იცოდნენ, რომ დინკს საფრთხე ემუქრებოდა, მაგრამ არაფერი მოიმოქმედეს.

ევროპის ადამიანის უფლებების სასამართლომ დინკის ოჯახის საჩივარი 2010 წელს გაინიხილა და დაადგინა, რომ თურქულმა სამართალდამცავმა ორგანოებმა სათანადო ყურადღება არ მიაქციეს მკვლელობაში თანამდებობის პირების შესაძლო მონაწილეობას.

დინკის ხსოვნისადმი მიძღვნილ ცერემონიაზე სიტყვით გამოვიდა მისი ქვრივი რაკელ დინკი, რომელმაც აღნიშნა, რომ „როგორც ჩანს, ამ მკვლელობაში დამნაშავე სახელმწიფოა მთელი თავისი უწყებებიანად“. ჟურნალისტის მკვლელობის თარიღთან დაკავშირებით განცხადებები გააკეთეს ოპოზიციური პარტიების ლიდერებმაც. სახალხო-დემოკრატიული პარტიის ლიდერმა სელახატინ  დემიტრაშმა აღნიშნა, რომ „ბოლო ათი წელიწადის განმავლობაში ჩვენ, სამწუხაროდ, ვერ შევძელით, ჩვენი ქვეყანა ცხოვრებისა და თავისუფლებისთვის ვარგისიან ადგილად გვაქცია“. სახალხო-რესპუბლიკური პარტიის ლიდერმა კემალ კილიჩდაროღლუმ  ასევე განაცხადა, რომ იმედი აქვს, თურქეთში „ძმობა, თანასწორობა და სამართლიანობა დაისადგურებს“.

თურქეთში აშშ-ს საელჩომ ტრაგიკულ თარიღთან დაკავშირებით განცხადება ტვიტერის საშუალებით გააკეთა: “ჩვენ ყოველთვის გვამახსოვრება მისი გზავნილები, რომლებიც მშვიდობას, შერიგებას და ადმიანის უფლებების პატივისცემას ეძღვნებოდა“.

ჰრანტ დინკი გაზეთ „აგოსის“ დამფუძნებელი და რედაქტორი იყო – პირველი თურქული გამოცემის, რომელიც სომხურ და თურქულ ენებზე გამოდიოდა. მისი საქმიანობის ერთ-ერთ მთავარ თემას სომხების გენოციდის აღიარება წარმოადგენდა, რამაც თურქი ნაციონალისტები განარისხა.