კომენტარი: სიტუაცია სერიოზულია, მაგრამ არავითარ შემთხვევაში უიმედო

დავით ზურაბიშვილის კომენტარი

პოლიტიკური მიმომხილველი დავით ზურაბიშვილი საქართველოში ბოლოდროინდელ მოვლენებს ეხმაურება და ამბობს, რომ ქვეყანაში სიტუაცია სერიოზულია, მაგრამ არავითარ შემთხვევაში უიმედო.

მასშტაბური საპროტესტო ტალღა საქართველოში  აგორდა მას შემდეგ, რას პრემიერმინისტრმა ირაკლი კობახიძემ განაცხადა, რომ ქვეყანა ოფიციალურად აჩერებს ევროკავშირთან მოლაპარაკებების გახსნას.

ამ განცხადების შემდეგ თბილისში მრავალათასიანი მიტინგები არ წყდება. უკვე ოთხი ღამეა, აქციის მონაწილეებს სასტიკად არბევენ, სცემენ, მათ წინააღმდეგ იყენებენ წყლის ჭავლს, წიწაკის სპრეის, მხუთავ აირს, მაგრამ, აქციები არ იშლება.

პროევროპული პროტესტის 300-ზე მეტი მონაწილე ნაცემი და დაკავებულია. აქ მათ ისტორიებს ვაგროვებთ. განახლებადი

აქ გიყვებით პროევროპულ აქციაზე სასტიკად ნაცემი, დაკავებული და დაშავებული ადამიანების ისტორიებს

დავით ზურაბიშვილი: “ამ აქციების გამო ბიძინა ივანიშვილს ხუხულასავით ენგრევა სტაბილურობის გარანტის იმიჯი, რაც მნიშვნელოვანია მისი ლეგიტიმაციისთვის როგორც ქვეყნის შიგნით, ისე მის ფარგლებს გარეთ. მეტიც, ხელისუფალი, რომელიც სტაბილურობას ვერ უზრუნველყოფს, რუსეთსაც კი არ ჭირდება. შესაბამისად ბიძინა ცდილობს ჩაახშოს პროტესტი და რაც შეიძლება სწრაფად. კერძოდ, ის რუსულ-ოლიგარქიული პრაქტიკიდან გამომდინარე ფიქრობს, რომ თუ დაიჭერს და გაანეიტრალებს აქციის ორგანიზატორებს, აქციებიც ჩაცხრება.

ეს ყველაფერი შეიძლება გასაგები და ახსნადი იყოს ავტორიტარიზმის პოზიციიდან, მაგრამ აქ პრობლემა ისაა, რომ ამ აქციებს არ ჰყავს კონკრეტული ორგანიზატორი. არც რომელიმე ორგანიზაციაა ასეთი და არც რომელიმე პიროვნება. ივანიშვილს კი ვერ წარმოუდგენია, რომ ასეთი მასშტაბური აქციები თვითდინებით და თვითორგანიზებით ხდება. ასეთ რამეს ის უბრალოდ არ უშვებს. ამიტომ ჯიუტად ეძებს კატას ბნელ ოთახში, მიუხედავად იმისა, რომ იგი იქ არ იმყოფება

არავინ იცის მისი ეს არაადეკვატური ძიებები რა დონის რეპრესიებში გადაიზრდება. დიქტატურის დამყარების მცდელობის საფრთხე არის სრულიად რეალური, ამის პასუხი კი ქართული საზოგადოებისგან შეიძლება იყოს მხოლოდ მეტი სიმტკიცე, მეტი ორგანიზებულობა და მეტი პროტესტი. სხვა გზა უბრალოდ არ არსებობს. ასევე ბევრი რამეა დამოკიდებული იმაზე, თუ რა დონის ზეწოლა იქნება დასავლეთიდან და რა ბერკეტები იქნება გამოყენებული ამ რუსული ტიპის “ბესპრედელის” შესაჩერებლად. ამ მიმართულებითაც საჭიროა სერიოზული მუშაობა.

მოკლედ, სიტუაცია სერიოზულია, მაგრამ არავითარ შემთხვევაში უიმედო. რას არ მოვსწრებივარ ეროვნული მოძრაობიდან მოყოლებული, ოღონდ ასეთი მრავალრიცხოვანი აქციები მთელი საქართველოს მასშტაბით მე არ მახსოვს. ამხელა ენერგია ვერ გაქრება და ვერ აორთქლდება (იხ. ფიზიკაში ენერგიის მუდმივობის კანონი). მით უმეტეს, რომ ივანიშვილის ძალაუფლება დღეს მხოლოდ ძალადობაზე, ძალოვანი სტრუქტურებისა და ზონდერი კრიმინალების მხარდაჭერაზე დგას. ისინი ცოტანი არიან, ჩვენ ბევრნი ვართ. მაგათ მართლა 54 პროცენტი ხომ არ ჰგონიათ თავი?”

უკრაინამ ბიძინა ივანიშვილს და მისი გარემოცვის 18 წევრს სანქციები დაუწესა

ზელენსკის თქმით, სანქციები მიმართულია ხელისუფლების იმ ნაწილის მიმართ, რომელიც “საქართველოს პუტინს გადასცემს”