თავდაცვის სამინისტრო ადასტურებს, რომ დავით ხიდაშელი მინისტრის მრჩევლად მუშაობდა
დავით ხიდაშელი თავდაცვის სამინისტროში
update: „სტატიის თავდაპირველ ვერსიაში მითითებული სათაური და ინფორმაცია იმის შესახებ, რომ დავით ხიდაშელი დაკავშირებულია რუსეთის სპეცსამსახურებთან და რომ თავდაცვის სამინისტრო ადასტურებს, იმის შესახებ, რომ დავით ხიდაშელი რუსულ სპეცსამსახურებთან არის დაკავშირებული, არ შეესაბამება სიმართლეს“.
საქართველოს თავდაცვის სამინისტრო ადასტურებს, რომ დავით ხიდაშელი მინისტრის მრჩევლად მუშაობდა. როგორც სამინისტროში აცხადებენ, ეს პოზიცია მას 2020 წლიდან 2024 წლის 9 თებერვლამდე ეკავა.
უწყებაში ამტკიცებენ, რომ დავით ხიდაშელს თავდაცვის სამინისტროში მუშაობის პერიოდში სახელმწიფო საიდუმლო ცნობებზე დაშვება არ ჰქონია. ხიდაშელის თავდაცვის სამინისტროში მრჩევლად მუშაობას ადასტურებს ყოფილი მინისტრი ჯუანშერ ბურჭულაძეც.
“ნუ იცით თქვენ, რომ ვმუშაობდით დავით გარეჯის [ე.წ. კარტოგრაფების საქმე – JAMnews} საქმეზე და ჩართული იყო დავითიც ამ საკითხზე და ამ საკითხთან დაკავშირებით, თუ რაღაცაში დაგვჭირდებოდა, ვკითხავდით… არ მგონია, დღეს, ალბათ არ იქნება გაფორმებული.” – ამბობს ბურჭულაძე “მთავარ არხთან”.
თავდაცვის სამინისტროს განცხადება
“მედიაში გავრცელებულ ინფორმაციაზე თავდაცვის სამინისტროში დავით ხიდაშელის თავდაცვის მინისტრის მრჩევლად მუშაობასთან დაკავშირებით, საზოგადოებისათვის სრულყოფილი ინფორმაციის მიწოდების მიზნით, გვსურს განვმარტოთ შემდეგი: 2020 წლიდან 2024 წლის 9 თებერვლამდე დავით ხიდაშელი მუშაობდა თავდაცვის სამინისტროში მრჩევლად.
იმჟამინდელი თავდაცვის მინისტრისთვის უფლებამოსილების შეჩერების შემდეგ, კანონმდებლობის შესაბამისად, დავით ხიდაშელს საჯარო სამსახურის შესახებ საქართველოს კანონის 81-ე მუხლის, მე-2 პუნქტის მიხედვით, შეუწყდა ადმინისტრაციული ხელშეკრულება და მას შემდეგ თავდაცვის უწყებაში აღარ მუშაობს. ამასთან, დავით ხიდაშელს თავდაცვის სამინისტროში მუშაობის პერიოდში არ ჰქონია სახელმწიფო საიდუმლო ცნობებზე დაშვება.” – წერია თავდაცვის უწყების მიერ გავრცელებულ განცხადებაში.
● ვოლსკი-ხიდაშელის შეხვედრა. საუბრის მთავარი თემა ოკუპირებულ აფხაზეთთან ურთიერთობების აღდგენა იყო
● ივანიშვილისა და რუსი ბიზნესმენის სატელეფონო ჩანაწერის გამო, არახამია პერსონალურ სანქციებს მოითხოვს
ვინ არის დავით ხიდაშელი
დავით ხიდაშელი ქართული წარმოშობის რუსეთში მოღვაწე ბიზნესმენია, რომელსაც ახლო კავშირი აქვს რუს ოლიგარქ ვლადიმირ ევტუშენკოვთან. ევტუშენკოვი, მსხვილი რუსული კორპორაცია „სისტემის“ მფლობელი, რუსეთის უკრაინაში შეჭრის შემდეგ ერთ-ერთი პირველი იყო, ვისაც ბრიტანეთმა სანქციები დაუწესა. თავის მხრივ ევტუშენკოვი ბიძინა ივანიშვილთან დაახლოებული პირია.
ხიდაშელი ერთხელ უკვე გამოჩნდა ქართულ პოლიტიკურ სივრცეში და მაშინაც წინასაარჩევნოდ.
მას საქართველოს ფართო საზოგადოება ე.წ. კარტოგრაფების საქმიდან იცნობს. სწორედ დავით ხიდაშელის მიერ რუსეთიდან ჩამოტანილი და თითქოსდა არქივებში მოპოვებული რუკის საფუძველზე დაიწყო საქართველოში სისხლის სამართლის გამოძიება სახელმწიფო საზღვრის დელიმიტაციისა და დემარკაციის კომისიის ყოფილი წევრების, ივერი მელაშვილისა და ნატალია ილიჩოვას წინააღმდეგ.
გამოძიების თანახმად, ილიჩოვა და მელაშვილი წინა ხელისუფლების დავალებით რუკებს აყალბებდნენ აზერბაიჯანის სასარგებლოდ და დავით გარეჯის ნაწილი აზერბაიჯანს მიაკუთვნეს. ეს ყველაფერი წინასაარჩევნოდ ხდებოდა და მთელი წინასაარჩევნო კამპანია “ქართულმა ოცნებამ” სწორედ ამ პატრიოტულ ლოზუნგზე ააგო, რომ “გარეჯი საქართველოა”.
“ოცნება” ხიდაშელის დახმარებით შეეცადა თავი წარმოეჩინა როგორც ქართული მიწების დამბრუნებელი და ამით გავლენა მოეხდინა საზოგადოებაზე წინასაარჩევნოდ. ამისთვის ივანიშვილმა მადლობაც კი გადაუხადა ხიდაშელს საჯაროდ და “გმირი” უწოდა.
მიმდინარე წლის 8 მარტს ცნობილი გახდა, რომ საქართველოს პარლამენტის პირველი ვიცე-სპიკერი, გია ვოლსკი პარლამენტის შენობასთან მდებარე კაფე „მელოგრანოში“ შეხვდა კრემლთან დაახლოებულ ბიზნესმენს, დავით ხიდაშელს. ამ შეხვედრის შესახებ ცნობილი გახდა ელენე ხოშტარიას ოპოზიციური პარტიის “დროას” წევრების, ნათია ლეთოდიანის და ზურა სარჯველაძის მიერ გავრცელებული ინფორმაციიდან. საუბრის მთავარი თემა ოკუპირებულ აფხაზეთთან ურთიერთობების აღდგენა იყო.
