covid-19-ის 87 ახალი შემთხვევა - საქართველო მწვანედან ნარინჯისფერ ზონაში გადავიდა
საქართველოში კორონავირუსის 87 ახალი შემთხვევა გამოვლინდა, რაც ქვეყანაში ეპიდემიის გავრცელების დღიდან, 26 თებერვლიდან დღემდე დღიური ინფიცირების ყველაზე მაღალი მაჩვენებელია.
87 ახალი შემთხვევიდან 39 აჭარაში გამოვლინდა, აქედან 29 – ბათუმში.
covid-19 დაუდგინდა ქუთაისის 32-ე საჯარო სკოლის 24 მასწავლებელსაც.
კორონავირუსით ახლად ინფიცირებულთაგან სამი სამედიცინო პერსონალია.
ეპიდემიოლოგების კონტროლის ქვეშ არის გურია და ცაგერიც.
მაღალი ეპიდემიოლოგიური რისკის გამო, ცაგერის მუნიციპალიტეტის სოფლებში – ორბელსა და ლაჯანაში, შესასვლელებთან სპეციალური საკონტროლო პუნქტები მოეწყო, სადაც ყველა შემსვლელს და გამომსვლელს სავალდებულო თერმოსკრინინგი და ტესტირება უტარდება.
ამ სოფლებში კორონავირუსის 7 შემთხვევა გამოვლინდა. თუმცა, იქ საკარანტინო შეზღუდვები არ ამოქმედებულა და სოფლებში შესვლა-გამოსვლა შეზღუდული არ არის.
კორონავირუსი დაუდასტურდა ერთ ადამიანს საჩხერის სამთო მომზადების ბაზაზეც. თვითიზოლაციაში იმყოფება 14 სამხედრო მოსამსახურე, რომელთაც უშუალო შეხება ჰქონდათ ინფიცირებულთან.
კორონავისრუსის ერთი შემთხვევა დაფიქსირდა კახეთშიც. შეიძლება ითქვას, რომ covid-19 ამჟამად საქართველოს ყველა რეგიონშია გავრცელებული.
თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, ათი პაციენტის ინფიცირების წყარო ამ ეტაპზე უცნობია და ეპიდემიოლოგიური კვლევა მიმდინარეობს.
საქართველო ნარინჯისფერ ზონაში გადავიდა
ევროპის დაავადებათა კონტროლის ცენტრის (ECDC) მიერ შემუშავებული „კოვიდ-შუქნიშნის“ პრინციპის თანახმად, ქვეყანაში არსებული ეპიდემიოლოგიური ვითარება მწვანე, ნარინჯისფერი და წითელი ფერით ფასდება.
• დააბრუნეთ მკაცრი ზომები!“ – აფხაზეთში კორონავირუსით ინფიცირებულთა რიცხვი სწრაფად იზრდება
ამ შუქნიშანზე მწვანე ყველაზე დაბალ რისკს ნიშნავს, ნარინჯისფერი – მომატებული რისკის ზონად, ხოლო წითელი – საფრთხის შემცველ ზონად ითვლება.
“კოვიდ-შუქნიშანზე” ფერების შეცვლის მთავარი კრიტერიუმი კი 100 ათას ადამიანზე ინფიცირებულების რაოდენობაა.
● თუ ქვეყანაში 100 ათას ადამიანზე 1-დან 10-მდე ინფიცირებული მოდის, ის მწვანე ზონად ითვლება.
● როცა 100 000 ადამიანზე ინფიცირებულთა რაოდენობა 10-დან 30-მდე იზრდება, ქვეყანა ნარინჯისფერ ზონაში გადადის.
● 30-ის ზევით კი ქვეყანა წითელ ზონაში ინაცვლებს.
ამჟამად საქართველოში ყოველ 100 000 ადამიანზე 10,2 კოვიდინფიცირებული მოდის.
„გადავინაცვლეთ შედარებით მომატებული სიფრთხილის ზონაში“, – ამბობს ჯანდაცვის მინისტრის მოადგილე, თამარ გაბუნია.
„წითელ ზონად“ გამოცხადდა ჭარა, სადაც სექტემბრის დასაწყისიდან ყოველდღიურად კორონავირუსით ინფიცირების 20-ზე მეტი ახალი შემთხვევა ვლინდება. ამჟამად აჭარაში 100 000 ადამიანიდან კოვიდინფიცირებულია 52.
მთავარი დამნაშავე – მობილობა
დაავადებათა კონტროლის ეროვნული ცენტრის ხელმძღვანელის, ამირან გამყრელიძის განმარტებით, ეპიდემიოლოგიური მდგომარეობის გაუარესებაში მთავარი დამნაშავე ზაფხულში გაზრდილი მობილობაა.
![](https://jam-news.net/app/uploads/2020/09/119056909_10220836782723616_5424907801236054301_o-1024x552.jpg)
„ინფექცია ქვეყანაში ყველა ეტაპზე ცირკულირებდა სხვადასხვა ინტენსივობით, და ეს ინტენსივობა გაზრდილია. ზაფხულში, განსაკუთრებით აგვისტოში, ეს მოსალოდნელი იყო – გაზრდილია მობილობა, აჭარაში განსაკუთრებით. ამიტომაც დაიწყო ეს აჭარიდან. იქ ადამიანების ძალიან დიდი მასა შეიკრიბა. გარდა მაგისა, იქ იყო დიდი ლოკალური თავშეყრები კლუბებში, გასართობ ადგილებში, სადაც ელემენტარული რეკომენდაციები არ იყო დაცული“, – ამბობს გამყრელიძე.
ეპიდემიოლოგიური მდგომარეობის გაუარესების გამო საქართველოში ახალი რეგულაციები ამოქმედდა: აიკრძალა ქორწილები და ქელეხები, გადაიდო კინოთეატრების გახსნაც. აჭარის სკოლებსა და უმაღლეს სასწავლებლებში კი 15 სექტემებერს სწავლა დისტანციურად განახლდება.