ვლადიკავკაზში, 1500 ადამიანი კორონავირუსის შესახებ ინფორმაციასა და ხელისუფლების ცვლილებას ითხოვს
20 აპრილს, ვლადიკავკაზში, ათას ხუთასამდე ადამიანი (ადგილობრივი მედიის ცნობით) გამოვიდა საპროტესტო აქციაზე, რომელიც კორონავირუსის პანდემიის პირობებში, ჩრდილოეთ ოსეთის ხელისუფლების ქმედებების წინააღმდეგ გაიმართა.
ეს ძირითადად იმ ადამიანების ბუნტია, რომლებსაც კორონავირუსის ეპიდემიის არ სჯერათ. ისინი იზოლაციის გაუქმებას, ბიზნესებისა და სკოლების გახსნას, თავიანთი არაფორმალური ლიდერის გათავისუფლებასა და ჩრდილოეთ ოსეთის ხელმძღვანელის, ვიაჩესლავ ბიტაროვის გადადგომას მოითხოვენ.
საპროტესტო აქციის მონაწილეები, ახალი მეთაურის პოსტზე, დეპუტატ კალოევის კანდიდატურას უჭერენ მხარს, რომელიც იმით არის ცნობილი, რომ შვეიცარიელი ავიადისპეტჩერი მოკლა და ასე იძია შური მეუღლისა და შვილების ავიაკატასტროფაში დაღუპვის გამო.
ყველა დეტალი.
აქციის მონაწილეების ნაწილი – ეს აქტივისტების საკმაოდ დიდი ჯგუფია, რომელთაც მიაჩნიათ, რომ არც კორონავირუსი და არც პანდემია არ არსებობს და ეს ხელისუფლების ფანტაზიის ნაყოფია, რათა მოსახლეობის ხარჯზე იცხოვრონ.
ისინი არა მხოლოდ იზოლაციის გაუქმებას, არამედ თავიანთი არაფორმალური ლიდერის გათავისუფლებას ითხოვენ. ეს ადგილობრივი ოპერის მომღერალი, ვადიმ ჩელდიევია, რომელსაც კატეგორიულად არ სჯერა კორონავირუსისა და პანდემიის არსებობის და აღნიშნული მიტინგის გამართვის ინიციატივით გამოვიდა.
- „მიმაჩნია, რომ არანაირი კორონავირუსი არ არსებობს“ – ამის დასამტკიცებლად ვლადიკავკაზში საავადმყოფოს შეუტიეს
- რუსეთი: ვირუსის გავრცელება პიკს უახლოვდება, მედიცინა მზად არ არის, ხელისუფლება კი იზოლაციის შესუსტებაზე ფიქრობს
- კორონავირუსი ჩრდილოეთ კავკასიაში: ინფიცირებულია ყველა რეგიონი, გარდაიცვალა ინგუშეთის მთავარი მუფთი
ჩელდიევი ორი დღის წინ, ცრუ ინფორმაციის გავრცელების ბრალდებით დააკავეს. მას ასევე ბრალად ედება ხელისუფლების წარმომადგენლის მიმართ ძალადობა, რაც 5 წლამდე პატიმრობას ითვალისწინებს.
20 აპრილისთვის არსებული ოფიციალური მონაცემებით, ჩრდილოეთ ოსეთში, კორონავირუსით 145 ადამიანია ინფიცირებული, გარდაიცვალა – ორი პაციენტი.
აქციაზე მისული სხვა ადამიანები ამტკიცებენ, რომ მათ პანდემიასთან დაკავშირებული სიტუაციის შესახებ არასაკმარის ინფორმაციას აწვდიან.
აქტიურად ისმის მოწოდებები „თვითიზოლაციის“ რეჟიმის წინააღმდეგ, რომლის გამოც, ბევრმა ადამიანმა დაკარგა სამსახური. მიტინგზე აქტიურად საუბრობენ იმის შესახებ, რომ, ამავდროულად, მუშაობას აგრძელებს ლუდსახარში კომპანია „ბავარია“, რომელიც რესპუბლიკის მეთაურის ოჯახს ეკუთვნის.
ბევრი ასევე აქტიურად გამოდის ლოზუნგით: „გახსენით სკოლები!“.
მაგრამ, როგორც ჩანს, ყველა თანხმდება მთავარ მოთხოვნაზე – თანამდებობა დატოვოს ჩრდილოეთ ოსეთის რესპუბლიკის მეთაურმა, ვიაჩესლავ ბიტაროვმა.
ბიტაროვი ხალხთან გავიდა, მაგრამ უშედეგოდ
აქცია ხელისუფლებასთან შეთანხმებული არ იყო, ამიტომ უკვე დაიწყო დაკავებები. თუმცა, რესპუბლიკის ხელმძღვანელმა, ბიტაროვმა მოსახლეობას განუცხადა, რომ მალე ყველას გაათავისუფლებენ.
ვიაჩესლავ ბიტაროვი აქციის მონაწილეებთან გავიდა და მათ სახლში დაბრუნებისა და იზოლაციის რეჟიმის დასრულებამდე, იქ დარჩენისკენ მოუწოდა. მაგრამ მოსახლეობის აღშფოთებას იმასთან დაკავშირებით, რომ ვირუსი გამოგონილია, ასე უპასუხა:
„თუკი ვინმე დამიმტკიცებს, რომ კორონავირუსი არ არსებობს, ყველაფერს გავხსნი“.
მას უსტვენდნენ და ხელს უშლიდნენ ლაპარაკში.
რესპუბლიკის მეთაურსა და აქციის მონაწილეთა დიდ ნაწილს არც ნიღბები ეკეთა და არც რაიმე სახის ინდივიდუალური თავდაცვის საშუალება.
- გადაჭედილი სპირტის საწყობები და აფთიაქები, სადაც ანტისეპტიკური საშუალებები არ არის
- „მათ ბესლანის დავიწყება უნდათ?“ – რატომ დანიშნა მოსკოვმა მეორე მსოფლიო ომისადმი მიძღვნილი დღესასწაული ბესლანის ტრაგედიის დღეს
შემდეგ, ბიტაროვი მთავრობის სახლში დაბრუნდა, მოქალაქეებს კი შს მინისტრმა, მიხაილ სკოკოვმა მიმართა. მან ყველას დაშლისკენ მოუწოდა და გააფრთხილა, რომ წინააღმდეგ შემთხვევაში, ძალას გამოიყენებენ.
თუმცა, ადამიანები ქუჩაში რჩებიან და ბიტაროვის გადადგომას ითხოვენ.
ხელმძღვანელად – კალოევი, რომელმაც საკუთარი ოჯახის დაღუპვის გამო შურისძიების მიზნით, შვეიცარიელი ავიადისპეტჩერი მოკლა
მიტინგზე ასევე აქტიურად ისმის იმ ადამიანის სახელი და გვარი, რომლის რესპუბლიკის ხელმძღვანელად ნახვაც აქციაზე მყოფთა დიდ ნაწილს სურს. ეს არის ვიტალი კალოევი, ჩრდილოეთ ოსეთში ფართოდ ცნობილი მას შემდეგ, რაც შვეიცარიელი ავიადისპეტჩერი მოკლა, რომლის მიზეზითაც ავიაკატასტროფაში დაიღუპა მისი ცოლი და ორი შვილი.
ყველაფერი 2004 წელს მოხდა. კალოევის ოჯახი ესპანეთში მოგზაურობის შემდეგ, შინ ბრუნდებოდა. შვეიცარიელი დისპეტჩერის, პიტერ ნილსენის შეცდომის გამო, სამგზავრო თვითმფრინავი ბოდენის ტბის თავზე, DHL-ის სატვირთო თვითმფრინავს შეეჯახა. დაიღუპა ბორტზე მყოფი სამოცივე მგზავრი და ეკიპაჟის ცხრა წევრი.
2005 წლის ოქტომბერში, ვიტალი კალოევი შვეიცარიაში ჩავიდა და ეს დისპეტჩერი მოკლა. მას რვა წლით თავისუფლების აღკვეთა მიუსაჯეს.
2007 წლის დეკემბერში, შვეიცარიის სასამართლომ ის სამაგალითო ქცევისთვის გაათავისუფლა, რის შემდეგაც ვიტალი კალოევი რუსეთში დაბრუნდა.
2019 წელს, ვიტალი კალოევი ვლადიკავკაზის საკრებულოს დეპუტატობის კანდიდატი გახდა მმართველი პარტია „ედინაია როსიადან“.
თავად ვიტალი კალოევს არანაირი კომენტარი არ გაუკეთებია საპროტესტო აქციასთან დაკავშირებით და არც მონაწილეობა მიუღია.
2017 წელს, ჰოლივუდში, კალოევის ისტორიის მიხედვით გადაღებული ფილმი Aftermat გამოვიდა, რომელშიც მთავარი როლი არნოლდ შვარცნეგერმა შეასრულა.
კომენტარი
ალან ცხურბაევი
ბლოგი რუსული გამოცემა „კავკაზსკი უზელის“ ვებგვერდზე
„რა უნდოდა ჩელდიევს, მაინც ვერ გავიგე. რა იდეის გამო შეიძლება დაზარალდეს ახლა ეს ხალხი, ესეც არ მესმის.
მესმის, რომ ადამიანები დაიღალნენ სახლში უმუშევრად ყოფნით, რომ ამ სიტუაციის გამო ისინი ნერვიულობენ, მაგრამ რის გამო გამოვიდნენ?
რამდენიმე დღის განმავლობაში ვადევნებდი თვალს ჩელდიევის არხს და აი, რა გავიგე:
● ვირუსი არ არსებობს და ჩვენთვის ჩიპების ჩადგმა სურთ
● რუსეთის ხელისუფლება ფაშისტურია
● სტალინი კარგია, სიღარიბეში გარდაიცვალა
● ოსები აღარ არიან ისინი, ვინც ადრე
● ოსები ხანდახან მაინც არიან ისინი, ვინც ადრე
● სსრკ ცოცხალია
● ყველამ უნდა გავიღვიძოთ.
ეს ყველაფერი, რბილად რომ ვთქვათ, უპასუხისმგებლობაა“.
