ჩხუბი და ხმაური პარლამენტში: სხდომა, სადაც "აგენტების კანონს" განიხილავენ, დეპუტატებს ძალით დაატოვებინეს
ჩხუბი და ხმაური პარლამენტში
პარლამენტში, სადაც ე.წ. აგენტების კანონის მორიგი საკომიტეტო განხილვა მიმდინარეობს, ხმაური და დაპირისპირებაა. სხდომათა დარბაზში ცოტა ხნის წინ მანდატურები შევიდნენ. კანონპროექტების განხილვის პარალელურად პარლამენტის მიმდებარე ტერიტორიაზე მოქალაქეების აქცია მიმდინარეობს.
მანდატურებმა ოპოზიციონერ დეპუტატებს, მათ შორის გიორგი ვაშაძეს, ნაციონალური მოძრაობის თავმჯდომარეს, ლევან ხაბეიშვილსა და პარლამენტის წევრ ანი წითლიძეს სხდომათა დარბაზი დაატოვებინეს. გიორგი ბოტკოველის თქმით, მანდატურებმა ოპოზიციონერ დეპუტატებს სხდომათა დარბაზი ძალის გამოყენებით დაატოვებინეს.
კომიტეტის მსვლელობის დროს სიტყვიერი შელაპარაკება მოხდა კომიტეტის თავმჯდომარეს, ანრი ოხანაშვილსა და ოპოზიციის წარმომადგენლებს შორის.
“შენ ხარ უსამშობლო, ვის ინტერესებს ატარებ? უსამშობლო კაცი ხარ. სახელმწიფოს განცდა არ გაქვს შენ”. – კომიტეტის თავმჯდომარე ანრი ოხანაშვილი სტრატეგია აღმაშენებლის ლიდერს, გიორგი ვაშაძეს მიმართავს.
“ამათ ჰგონიათ, რომ დღეს ჩვენ იქ ვართ 10-15 ოპოზიციონერი დეპუტატი და შეძლებენ, ასე ქვეყნის გარუსებას, არა! აქ იქნება ბევრი ადამიანი! დარწმუნებული ვარ, ქართველი ხალხი არ მისცემს იმის საშუალებას, რომ გაიტანონ ეს კანონი და გაარუსონ ქვეყანა. ის რომ ფიზიკურად გაგვისწორდნენ, რამეს კი არ ნიშნავს, მე ფეხს ჩამარტყამენ თუ წიხლს ჩამარტყამენ, არა, ამით ურტყამენ წიხლს საკუთარი შვილების მომავალს, მეტი არაფერი. ანრი ოხანაშვილის დავალებით, პუტინის მონის დავალებით, შემოცვივდნენ ერთად, როგორც მანდატურები, ისე გაურკვეველი ხალხი, ფიზიკურად გაგვისწორდნენ, ოცნების დეპუტატები ფიზიკურად იწევდნენ ჩვენზე“, – ამბობს ენმ-ის წევრი გიორგი ბოტკოველი.
“ერთიანი ნაციონალური მოძრაობის” თავმჯდომარე, ლევან ხაბეიშვილი პარლამენტის იურიდიულ საკითხთა კომიტეტიდან გამოძევების შემდეგ ამბობს, რომ “დედა უნდა ვუტიროთ ამ პუტინისტებს და რუსებს.”
● რას ნიშნავს კანონი უცხოელი აგენტების შესახებ, რომელსაც “ქართული ოცნება” იღებს. რა ვიცით ამ დროისთვის
● “რუსული კანონის მსგავსია” – ამერიკელი სენატორების ვიზიტი საქართველოში. მთავარი
●რას ფიქრობენ უცხოელი და ქართველი ექსპერტები “უცხოური აგენტების” შესახებ კანონპროექტზე. სპოილერი: კარგს არაფერს
მანამდე ქართული ოცნების” თავმჯდომარის, ირაკლი კობახიძის ახალი პროპაგანდისტული ციტატებით თბილისში პლაკატები გააკრეს, რომელზეც წერია: “ეკლესიის მაგინებელი ჯაშუშები.”
პლაკატებზე გამოსახულია ყოფილი ომბუდსმენი, ნინო ლომჯარია, სახალხო დამცველის მოადგილე გიორგი ბურჯანაძე, დეპუტატები ხათუნა სამნიძე და თამარ კორძაია, აქტივისტი ზუკა ბერძენიშვილი, ლევან ბერძენიშვილი, პოლიტოლოგი გია ნოდიაპარტია ლელოს ლიდერი, მამუკა ხაზარაძე, პარტია ევროპული საქართველოს ლიდერი, გიგა ბოკერია და სხვა პირები.
ირაკლი კობახიძემ, ტელეკომპანია იმედის ეთერში განაცხადა, რომ პირები, რომლებიც რუსულ კანონს ეწინააღმდეგებიან დაკავებულები არიან “ანტიეკლესიური პროპაგანდით და ამას მიზანმიმართულად აკეთებენ, რადგან იდენტობა შეარყიონ.” კობახიძემ ასევე თქვა, რომ 3 მარტს რუსული კანონის წინააღმდეგ პარლამენტთან გამართული აქცია “ეკლესიის მაგინებლების აქცია” იყო.
საქართველოს პარლამენტის საგარეო ურთიერთობათა კომიტეტმა 2 მარტს პირველი მოსმენით მიიღო კანონი, რომლის მიხედვით, ის არასამთავრობო და მედია ორგანიზაციები, რომლებიც უცხოეთიდან ფინანსდებიან, „უცხოური გავლენის აგენტებად“ უნდა დარეგისტრირდნენ.
27 თებერვლის მდგომარეობით, პარლამენტში ორი კანონპროექტია დარეგისტრირებული: ერთი 14 თებერვალს დარეგისტრირდა და ის რუსული კანონის ანალოგია; მეორე კი, ალტერნატივის სახით დარეგისტრირდა მას შემდეგ, რაც პირველს დიდი კრიტიკა მოჰყვა. ეს მეორე, მისი ავტორების თქმით, არის ამერიკული კანონის (FARA-ს) ანალოგი. მათ თქვეს, რომ FARA პირდაპირ თარგმნეს.
ორივე კანონპროექტის ავტორია მოძრაობა „ხალხის ძალა“, რომელიც მმართველი გუნდისგან ფორმალურად გამოყოფილმა დეპუტატებმა ჩამოაყალიბეს. „ხალხის ძალა“ მკვეთრად ანტიდასავლური განცხადებებით გამოირჩევა. მეტიც, მისი წევრები პირდაპირ აღიარებენ, რომ ეს პარტია შეიქმნა იმისთვის, რომ “ხალხს სიმართლე უთხრას დასავლეთის შესახებ, რომელიც საქართველოს ომში ჩათრევას ცდილობს”.
კანონპროექტს აკრიტიკებს ყველა, მმართველი პარტიის გარდა: ადგილობრივი არასამთავრობო და მედია სექტორი, ოპოზიცია, ექსპერტები და ის პოლიტიკოსები, რომლებიც ცოტა ხნის წინ “ქართული ოცნების” ხელისუფლებაში იყვნენ და საქართველოს პრეზიდენტიც კი.
კანონპროექტს მკაცრად აკრიტიკებენ საქართველოს დასავლელი პარტნიორები სხვადასხვა საერთაშორისო ორგანიზაციებიდან, ამერიკელი სენატორები თუ ევროპელი დეპუტატები. ამერიკის ელჩმა კი მას პირდაპირ უწოდა “რუსული კანონი”.
ამერიკის სახელმწიფო დეპარტამენტის პრესსპიკერი, ნედ პრაისი უკვე მესამე განცხადებას აკეთებს “აგენტების კანონზე” და ამბობს, რომ კანონის მხარდამჭერები პასუხისმგებლები იქნებიან ქვეყნის მომავლისთვის რისკის შექმნაზე.
20 თებერვალს საქართველოს ამერიკელი სენატორები, ჯინ შაჰინი და დიკ დურბინი ესტუმრნენ. ჯინ შაჰინმა პრესკონფერენციაზე “ქართული ოცნებიდან” ფორმალურად გასული დეპუტატების, “ხალხის ძალის” მიერ ინიციირებულ “უცხოური აგენტების” კანონზე განაცხადა, რომ კანონპროექტი არაა აშშ-ის კანონმდებლობის მსგავსი და ის რუსული კანონის მსგავსია.
