ჩხრეკები პარტიების ოფისებში და აქტივისტების სახლებში. დაკავებულია ნიკა გვარამია
ჩხრეკები პარტიების ოფისებში და აქტივისტების სახლებში
პარტია “ნაციონალური მოძრაობის” ახალგაზრდული ფრთის, ასევე კოალიცია “ცვლილებებისთვის” ოფისებში და აქტივიტ ილო ღლონტის სახლში ჩხრეკები მიმდინარეობს. ილო ღლონტის თქმით, წაიღეს მისი ლეპტოპი და ტელეფონი.
პარტია „დროას“ ოფისთან სამართალდამცველებმა ნიკა გვარამია დააკავეს. ამ დროისთვის უცნობია, სად გადაიყვანეს გვარამია. დაკავებულია ასევე პარტიის წევრი გელა ხასაია.
ფაქტს წინ უძღოდა სიტყვიერი და ფიზიკური დაპირისპირება. უფრო კონკრეტულად, შელაპარაკება მოჰყვა გვარამიას მოთხოვნას, რომ როგორც წარმომადგენელი, ოფისში შეუშვან, რათა ჩხრეკას დააკვირდეს, რის შესაძლებლობასაც მას პოლიციის წარმომადგენლები არ აძლევდნენ. სამართალდამცველებმა მას უთხრეს, რომ საგამოძიებო მოქმედებები უკვე დაწყებულია, ადგილზე იმყოფება წარმომადგენელიც და „ხელის შეშლის შემთხვევაში კანონის შესაბამისად იმოქმედებენ“.
“დროას” წევრი გიგა ლემონჯავა ამბობს, რომ პოლიცია დაკეტილ ოფისში შევიდა, როცა შიგნით არავინ იყო.
შსს-ს თანამშრომლებმა ადგილზე მისულ ნაციონალური მოძრაობის წევრს, სოფო ჯაფარიძეს განუცხადეს, რომ “სასამართლო განჩინების საფუძველზე, შენობაში საგამოძიებო მოქმედებები მიმდინარეობს”, რის გამოც მას ოფისში ვერ შეუშვებდნენ.
რამდენიმე წუთის წინ, პარტია “ახალის” ოფისში პოლიციამ ჩხრეკა ჩაატრა – ამის ამსახველი ლაივ ვიდეო, პარტია “ახალის” ერთ-ერთმა ლიდერმა, ნიკა გვარამიამ სოციალურ ქსელში გაავრცელა.
გვარამიას თქმით, მისთვის უცნობია, რის საფუძველზე შევიდნენ შსს-ს თანამშრომლები პარტიის ოფისში. მოგვიანებით, გვარამიამ ტელეკომპანია “მთავართან” აღნიშნულ ფაქტზე კომენტარიც გააკეთა.
“ეს არის ავტორიტარიზმი, უკვე გადადის დიქტატურაში და შესაბამისად, პოლიტიკური პარტიების ჩხრეკა, დაყადაღება, პოლიტიკური ლიდერების დაჭერა, ეს ნორმალური მოვლენაა დიქტატურებისთვის.
ამის ნორმალიზაცია ხდება რეალურად, მოდი ასე ვთქვათ – პოლიტიკოსები ამისთვის მზად ვართ და ვინც არ არის, უნდა იყოს ამისთვის მზად იმიტომ, რომ კიდევ ერთხელ ვამბობ, ეს არის განმათავისუფლებელი მოძრაობა ფაქტობრივად.” – თქვა გვარამიამ.
ცოტა ხნის წინ ცნობილი გახდა, რომ ჩხრეკა მიმდინარეობს ფეისბუქ ჯგუფ “დაიტოვეს” ერთ-ერთი ადმინის, ნენსი ვოლანდის სახლშიც.
