“ჩემი გზა მიშას გზაა და ჩვენ გავიმარჯვებთ” - მიხეილ სააკაშვილი

საქართველოს ყოფილი პრეზიდენტი და ამჟამად უკრაინის რეფორმების აღმასრულებელი კომიტეტის თავმჯდომარე, მიხეილ სააკაშვილი პოსტში, რომელსაც ფეისბუკის საკუთარ გვერდზე აქვეყნებს, წერს, რომ მას უკრაინაში, ისევე როგორც საქართველოში, “დიდი გეგმები აქვს” და შემოდგომაზე საქართველოში “გადამწყვეტი გარღვევისათვის” ემზადება. 

„მისი ყოველი განცხადება იმით მთავრდება, რომ უკრაინის ელჩს საქართველოს საგარეო საქმეთა სამინისტროში იწვევენ და გამოხატავენ უკმაყოფილებას,” – წუხს უკრაინის საგარეო საქმეთა მინისტრი, დმიტრი კულება.

მიხეილ სააკაშვილმა ვრცელ პოსტში, რომელშიც ის ძირითადად რეფორმების კომიტეტის საქმიანობას მიმოიხილავს, საქართველოზეც ისაუბრა.

“შემოდგომაზე საქართველოში გადამწყვეტი გარღვევისთვის ვემზადები. ჩვენ დავამთავრებთ ჩემი სამშობლოს, საქართველოს დამცირებას რუსეთის პროტეჟეს, ოლიგარქი ივანიშვილის მხრიდან და დავაბრუნებთ საქართველოს სახელმწიფოებრიობას განვითარების სწრაფ რელსებზე, თუნდაც ამისთვის ყველაზე დიდი ფასის გადახდა მომიწიოს. დიახ, მე ვიბრძვი უკრაინაში და საქართველოში. დიახ, მე არ მაქვს პრეტენზია მაღალ თანამდებობებზე არცერთ ქვეყანაში, თუმცა ზუსტად ვიცი, რომ ვარ რეგიონული ლიდერი და ბევრისთვის დაკავშირებული ვარ გაუმჯობესებასთან და რეფორმებთან და ამ ადამიანებს მე იმედს ვერ გავუცრუებ, რაც უნდა მოხდეს და რადაც არ უნდა დამიჯდეს ეს”, – წერს სააკაშვილი პოსტში, რომელსაც ამ სიტყვებით ასრულებს:

“ჩემი გზა მიშას გზაა და ჩვენ გავიმარჯვებთ!”

• მოსაზრება: სააკაშვილის “მესამედ მოსვლა” უკრაინაში
• უკრაინული მიშა
• ბრიყვული და სამარცხვინო – ასე აფასებენ ექსპერტები თბილისის რეაქციას სააკაშვილის შესაძლო დანიშვნაზე უკრაინაში

მიხეილ სააკაშვილის გამონათქვამებს საქართველოზე დღეს უკრაინის საგარეო საქმეთა მინისტრი, დმიტრი კულება გამოეხმაურა. 

„მისი ყოველი განცხადება იმით მთავრდება, რომ უკრაინის ელჩს საქართველოს საგარეო საქმეთა სამინისტროში იწვევენ და გამოხატავენ უკმაყოფილებას ბატონი სააკაშვილის განცხადებების გამო. დისბალანსი იმაში მდგომარეობს, რომ კერძო პირი საუბრობს და ამის გამო ბოდიშებს სახელმწიფო იხდის“, – განაცხადა უკრაინის საგარეო საქმეთა მინისტრმა.

მისი სიტყვებით, უკრაინა საქართველოსთან მეგობრობას აფასებს.

„საგარეო საქმეთა სამინისტროს პოზიცია მაქსიმალურად მკაფიოა: ბატონი სააკაშვილი კერძო პირია და საქართველოს შესახებ თავის კომენტარებში არ წარმოადგენს უკრაინის პოზიციას“, – ამბობს დმიტრი კულება.

ეს არ არის პირველი შემთხვევა, როცა მიხეილ სააკაშვილი უკრაინაში სახელმწიფო თანამდებობაზე დანიშვნის შემდეგ საქართველოში მიმდინარე პროცესების შესახებ აკეთებს შეფასებებს.

ერთ-ერთი ასეთი განცხადების შემდეგ, რომელშიც წერდა, რომ საქართველოს განადგურებას მშვიდად ვერ უყურებს და ის ხელისუფლების შეცვლისთვის ბრძოლაში წინა ხაზზე იქნება, საქართველოში უკრაინის ელჩი განმარტებისთვის საგარეო საქმეთა სამინისტროში დაიბარეს.  

9 ივლისს, მიხეილ სააკაშვილის მიერ გავრცელებული ვიდეომიმართვის გამო, სადაც ის ამბობს, რომ “საქართველოს მთავრობა არის მთლიანად არალეგიტიმური” და არ ცნობს მის კანონიერებას, საქართველოს საგარეო საქმეთა სამინისტრომ უკრაინულ მხარეს საპროტესტო ნოტა გადასცა.

საქართველოს მესამე პრეზიდენტი, მიხეილ სააკაშვილი უკრაინის რეფორმების ეროვნულ საბჭოს აღმასრულებელი კომიტეტის თავმჯდომარედ უკრაინის პრეზიდენტმა ვოლოდიმირ ზელენსკიმ 7 მაისს დანიშნა. 

უკრაინაში სააკაშვილის თანამდებობაზე დანიშვნის გამო უკრაინაში საქართველოს ელჩი, თეიმურაზ შარაშენიძე კონსულტაციისთვის თბილისში გამოიძახეს.