ჩეჩნეთში "ნოვაია გაზეტას" ჟურნალისტს და მის ადვოკატს სცემეს, თითები დაამტვრიეს და დანით დაჭრეს
ჩეჩნეთში სცემეს და დაჭრეს ჟურნალისტი და ადვოკატი
ჩეჩნეთში უცნობი პირები თავს დაესხნენ ელენა მილაშინას, “ნოვაია გაზეტას” ჟურნალისტს და ალექსანდრე ნემოვს, მის ადვოკატს.
გამოცემის ინფორმაციით, აეროპორტიდან გროზნოში მიმავალი ავტომობილი, რომელშიც მილაშინა და ნემოვი ისხდნენ, ნიღბიანმა პირებმა გააჩერეს. ორივე მათგანი სასტიკად სცემეს, გაანადგურეს ტექნიკა და დოკუმენტები.
ცენტრ მემორიალის განცხადებით, ჟურნალისტსა და ადვოკატს ურტყეს ფეხები, მათ შორის სახეში, ემუქრებოდნენ მოკვლით, დაადეს იარაღიც. ცემის დროს კი ეუბნებოდნენ: “გაფრთხილებდნენ. წადით აქედან და არაფერი დაწეროთ.”
ცენტრის ინფორმაციით, ნემოვს უჭირს მოძრაობა და საუბარი, მილაშინას მოტეხილი აქვს თითები.
მილაშინა და ნემოვი გროზნოში ზარემა მუსაევას განაჩენის გამოცხადებაზე ჩავიდნენ. ზარემა მუსაევა არის აბუბაკარ იანგულბაევის, “წამების წინააღმდეგ კომიტეტის” ყოფილი ადვოკატისა და ჩეჩნური ოპოზიციური მოძრაობა “ადათის” ერთ-ერთი დამფუძნებლის, იბრაგიმ იანგულბაევის დედა.
2022 წლის იანვარში ჩეჩნეთის უსაფრთხოების ძალებმა მუსაევა ნიჟნი ნოვგოროდში გაიტაცეს და ჩეჩნეთში წაიყვანეს. იგი 15 დღით დააკავეს, შემდეგ კი გროზნოს წინასწარი დაკავების იზოლატორში პოლიციელზე ძალადობის ბრალდებით გადაიყვანეს. ჩეჩნეთის ლიდერმა რამზან კადიროვმა განაცხადა, რომ ნიჟნი ნოვგოროდიდან გადმოყვანისას მუსაევა “თავს დაესხა პოლიციელს და კინაღამ თვალი დააკარგვინა.”
