ბოლო ათ დღეში საქართველოს საზღვარი რუსეთის 78 742 მოქალაქემ გადმოკვეთა
საქართველოს საზღვარი ბოლო ათ დღეში
შინაგან საქმეთა სამინისტრო აქვეყნებს ბოლო 10 დღის სტატისტიკას, თუ რამდენმა რუსეთის მოქალაქემ გადმოკვეთა და გადაკვეთა რუსეთ-საქართველოს საზღვარი, საიდანაც ვიგებთ, რომ ბოლო 10 დღეში, საქართველოს საზღვარი რუსეთის 78 742-მა მოქალაქემ გადმოკვეთა, ქვეყანა კი დატოვა რუსეთის 62 120-მა მოქალაქემ.
რუსეთის მოქალაქეების მიერ საქართველოს საზღვრის ყველა გამშვები პუნქტის გადმოკვეთისა და გადაკვეთის სტატისტიკა ასეთია:
(შემომსვლელი – გამსვლელი)
- 17 სექტემბერს 6986 – 7406
- 18 სექტემბერს 6606 – 6743
- 19 სექტემბერს 6411 – 6782
- 20 სექტემბერს 5603 – 6199
- 21 სექტემბერს 6402 – 6011
- 22 სექტემბერს 6150 – 6050
- 23 სექტემბერს 9307 – 6214
- 24 სექტემბერს 9330 – 6249
- 25 სექტემბერს 11 143 – 5519
- 26 სექტემბერს 10 804 – 4947
მობილიზაციის გამოცხადების შემდეგ რუსეთის მოქალაქეების ნაწილი საქართველოში გამოქცევას ცდილობს. ლარსის გამშვები პუნქტთან რამდენიმე დღე დაახლოებით 13-15-კილომეტრიანი საცობებია.
შს მინისტრი ვახტანგ გომელაური ამბობს, რომ მობილიზაციის გამოცხადების შემდეგ გადმომსვლელთა მაჩვენებელმა 40-45%-ით მოიმატა.
ჩრდილოეთ ოსეთის ვიცე-პრემიერის განცხადებით კი, ბოლო ერთი კვირის განმავლობაში ზემო ლარსის გამშვებ პუნქტზე ორივე მიმართულებით საზღვარი 37 500 ათასმა მანქანამ და 115 200 ადამიანმა გადაკვეთა.
შსს-ს განმარტებით, სასაზღვრო გამშვებ პუნქტში მუდმივ რეჟიმში იმყოფება სახელმწიფო უსაფრთხოების სამსახურის შესაბამისი დანაყოფი, უსაფრთხოების უზრუნველყოფისა და რისკების გამოვლენის მიზნით.
“ბოლო პერიოდში მომატებულია იმ მოქალაქეთა რაოდენობაც, რომელთა შემოშვებაც საქართველოს ტერიტორიაზე კანონმდებლობით გათვალისწინებული მიზეზების გამო არ ხდება. შესაბამისად, უფრო ხშირად ისმის კითხვები შემოშვების წესებსა და უარის თქმის მიზეზებთან დაკავშირებით.
როგორც ცნობილია, უცხოელთა და მოქალაქეობის არმქონე პირთა სამართლებრივი მდგომარეობის შესახებ საქართველოს კანონის მე-12 მუხლის თანახმად, საქართველოში შემოსვლისას ნებისმიერი უცხო ქვეყნის მოქალაქე გადის ინსპექტირებას სასაზღვრო გამტარ პუნქტში, რის შედეგადაც მას ან ეძლევა თანხმობა საქართველოში შემოსვლაზე, ან იღებს უარს და ვერ კვეთს საქართველოს საზღვარს. უცხო ქვეყნის თითოეული მოქალაქის ინსპექტირება/გამოკითხვა საერთაშორისოდ აღიარებული საუკეთესო პრაქტიკის შესაბამისად ხორციელდება”. – ნათქვამია შსს განცხადებაში.
უწყება ხაზს უსვამს, რომ უცხო ქვეყნის მოქალაქისთვის შემოსვლის თანხმობის ან უარის თქმის გადაწყვეტილებას მესაზღვრე სხვადასხვა ფაქტორისა და გარემოებების შეფასების შედეგად იღებს – ითვალისწინებს პირის ხელთ არსებული დოკუმენტაციის შესაბამისობას მგზავრობის მიზნობრიობასთან, საქართველოში ყოფნის პერიოდში და საქართველოდან გამგზავრებისას ფინანსური სახსრების საკმარის ოდენობას, წარსულში ქვეყანაში ყოფნის ვადებს და ა.შ.
“სასაზღვრო-გამტარ პუნქტებში რისკის შემცველი პირების გამოვლენის მიზნით, მოქალაქეთა ინსპექტირება/გამოკითხვა და მომატებული რაოდენობის პირობებში, სასაზღვრო-გამტარი პუნქტისა და საგზაო ინფრასტრუქტურის მოწყობა გადაადგილებისას გარკვეულწილად იწვევს რიგების წარმოქმნას, რაც, პარალელურად, რეგისტრაციისთვის დროის გაზრდილ მონაკვეთს საჭიროებს”. – ნათქვამია განცხადებაში.
● “მალე საქართველოს მოსახლეობის 10 პროცენტი რუსი იქნება”. ვითარება ლარსზე – ხელისუფლების და ოპოზიციის რეაქცია
● “ყოველ მესამე მანქანას Z ასო აქვს მიწებებული” – რუსეთის მოქალაქე ყვება რა გზა გამოიარა მოსკოვიდან თბილისში ლარსის გავლით
● როგორია სამყარო, რომელსაც პუტინი აშენებს
ვლადიმერ პუტინმა რუსეთში ნაწილობრივი სამხედრო მობილიზაცია 21 სექტემბერს გამოაცხადა. პირველ ეტაპზე 18-35 წლის მამაკაცებს გაიწვევენ, შემდეგ 35-45 და ა.შ. რუსული მედია წერს, რომ რუსმა ახალგაზრდებმა უკვე მასობრივად მიიღეს გაწვევის ცნობები. მოსახლეობის ნაწილში პანიკაა. რუსეთის ქალაქებში საპროტესტო აქციები დაიწყო.
თავდაცვის მინისტრის სერგეი შოიგუს ცნობით, მობილიზაცია 300 000-მდე რუსეთის მოქალაქეს შეეხება, თუმცა გამოცემა Novaya Gazeta.Europe წყაროზე დაყრდნობით აცხადებს, რომ მობილიზაციის შესახებ დადგენილების მეშვიდე, საიდუმლო პუნქტი, თავდაცვის სამინისტროს საშუალებას აძლევს, 1 მილიონამდე ადამიანი გაიწვიოს.
მას შემდეგ, რაც რუსეთში ნაწილობრივი მობილიზაცია გამოცხადდა, რუსეთის მოქალაქეებმა ქვეყნის მასობრივი დატოვება დაიწყეს, მათ შორის საქართველოს მიმართულებით.
ტელეგრამში ვრცელდება ფოტოები, სადაც ჩანს, რომ ზემო ლარსის სასაზღვრო-გამშვები პუნქტის რუსეთის მხარეს გადაადგილდება ჯავშანტრანსპორტიორი, რომელზეც სამხედრო ფორმაში ჩაცმული ნიღბიანი ადამიანები სხედან.
რუსეთის “ეფესბე” გამოეხმაურა ამ ინფორმაციას – უწყებაში აცხადებენ, რომ მას გამოიყენებენ იმ შემთხვევაში, თუ ვინმე საზღვრის გარღვევას შეეცდება.
